ရုရှားနိုင်ငံခြားရေးဝန်ကြီး ဆာဂျီ လာရော့ဗ်သည် လာမည့်အပတ်အတွင်း အင်ဒိုနီးရှား၌ ကျင်းပမည့် G20 အစည်းအဝေးကို မတက်ရောက်မှီဗီယက်နမ်နိုင်ငံသို့ နှစ်ရက်တာ ခရီးစဉ်အဖြစ် ဇူလိုင်လ ၅ ရက်မှ ၇ရက်နေ့ထိ လာရောက် လည်ပတ်မည်ဖြစ်ကြောင်း ဗီယက်နမ် အစိုးရက ပြောကြားခဲ့သည်။
လာရော့ဗ်အား ၎င်းတို့နှစ်နိုင်ငံ၏ ဘက်စုံမဟာဗျူဟာမြောက် မိတ်ဖက်ဆက်ဆံရေး(၁၀) နှစ်မြောက် အထိမ်းအမှတ်အဖြစ် လာရောက်ရန် ဗီယက်နမ်နိုင်ငံခြားရေးဝန်ကြီး ဗွီတန်ဆွန်း က ဖိတ်ကြားခဲ့ခြင်းဖြစ်ကြောင်း အစိုးရ၏ ထုတ်ပြန်ချက်တွင် ဖော်ပြထားသည်။
ပြည်တွင်းလောင်စာဆီစျေးမြင့်တက်မှုနှင့်ပတ်သက်၍ ရေနံကုမ္ပဏီများက စျေးလျှော့ရောင်းကြရန် အမေရိကန် သမ္မတ ဂျိုးဘိုင်ဒင်၏ တောင်းဆိုမှုအပေါ် Amazon ကုမ္ပဏီပိုင်ရှင်နှင့် တည်ထောင်သူ ဘီလျံနာ Jeff Bezos က ပြင်းထန်စွာဝေဖန်လိုက်သည်။
“ခုချိန်ဟာ စစ်ဖြစ်နေတဲ့အချိန်ဖြစ်တာကြောင့် ကမ္ဘာလုံးဆိုင်ရာအခက်အခဲလဲဖြစ်နေပါတယ်။ ဒါကြောင့် ဆီဆိုင်တွေ ဖွင့်ကြဖို့နဲ့ စျေးကိုပြန်ညှိကြဖို့ ကျွန်တော်က ရေနံကုမ္ပဏီတွေကိုတောင်းဆိုတဲ့ မက်ဆေ့ချ်က ရှင်းပါတယ်”ဟု ဘိုင်ဒင်က သူ၏ တွစ်တာတွင်ရေးသားခဲ့သည်။
ဩစတြေးလျနိုင်ငံ ဆစ်ဒနီမှာ ဒေသခံ ၃ သောင်းကျော်ဟာ ရေကြီးမှုအန္တရာယ်ကို ရှောင်ရှားဖို့ နေအိမ်တွေကနေ စတင်ရွှေ့ပြောင်းနေကြရပါပြီ။ ဩစတြေးလျရဲ့ အကြီးဆုံးမြို့ဖြစ်တဲ့ ဆစ်ဒနီဟာ လပေါင်း ၁၈ လအတွင်း အဆိုးဆုံး ရေကြီးရေလျှံမှုနဲ့ ရင်ဆိုင်နေရတာဖြစ်ပါတယ်။ တနင်္လာနေ့ သတင်းစာရှင်းလင်းပွဲမှာ နယူးဆောက်ဝေးလ်ပြည်နယ် ဝန်ကြီးချုပ်က ဘေးလွတ်ရာရွှေ့ပြောင်းရေး အမိန့်ညွှန်ကြားချက်အတွင်းမှာ လူပေါင်း ၃ သောင်း ၂ထောင်ကျော် အကျုံးဝင်မှာဖြစ်တယ်လို့ ပြောပါတယ်။ ပြည်သူတွေကို အများပြည်သူ ယာဉ်လိုင်းတွေအပါအဝင် တခြား မလိုအပ်ဘဲ ခရီးသွားတာမျိုးရှောင်ရှားဖို့ အာဏာပိုင်တွေက ညွှန်ကြားထား ပါတယ်။ တချို့လမ်းမကြီးတွေဟာ ရေမြှုပ်နေပြီဖြစ်ပြီး ရုတ်တရက် ရေမြင့်တက်မှုဖြစ်ပေါ်နိုင်ခြေရှိနေတာပါ။ မိုးလေဝသဗျူရိုက ဆစ်ဒနီမှာ တနင်္လာနေ့က မိုးရေချိန်လက်မ ၄.၇၂ လက်မထိ ရွာသွန်းနိုင်တယ်လို့ ကြေညာထားပါတယ်။
ဗြိတိန်တွင် လောင်စာဆီစျေးနှုန်းများ စံချိန်တင်မြင့်တက်လာပြန်သဖြင့် ယာဉ်မောင်းများ မိမိတို့၏ ကားများကို လမ်းမပေါ်တွင် ဖြည်းညှင်းစွာမောင်းနှင်ခြင်း(Go-Slow)ဖြင့် ဆန္ဒပြခဲ့ကြသည်။ယာဉ်မောင်းများသည် အဓိကအားဖြင့် ၃လမ်းသွား ယာဉ်ကြောများတွင် အဓိကထားပြီး ဖြည်းညှင်းစွာမောင်းကာ ဆန္ဒဖော်ထုတ်ခဲ့ကြသည်။
နိုင်ငံတစ်ဝန်း ကိုဗစ်ကူးစက်ခံရသူ အရေအတွက် တဖြည်းဖြည်းမြင့်တက်လာခြင်းကြောင့် ပါကစ္စတန်မြို့ပြ လေကြောင်းအာဏာပိုင်အဖွဲ့က ပြည်တွင်း လေကြောင်းလိုင်းများတွင် နှာခေါင်းစည်းများ မဖြစ်မနေတပ်ဆင် ရမည်ဟု ထုတ်ပြန်ချက်တွင်ဖော်ပြထားသည်။ ပါကစ္စတန်၏အကြီးဆုံးမြို့ ကာရာချီတွင် ကိုဗစ်လူနာတွေ့ရှိမှု အချိုးသည် တစ်နိုင်ငံလုံးရာခိုင်နှုန်းနှင့်နှိုင်းယှဉ်ပါက ၂၁ ရာခိုင်နှုန်းအထိမြင့်တက်လာကြောင်းအစီရင်ခံပြီး နောက်တစ်ရက်တွင် အဆိုပါအမိန့်ထွက်ပေါ်လာခြင်း ဖြစ်သည်။
“ယခုအခြေအနေများကြောင့် ပြည်တွင်းလေကြောင်းလိုင်းများတွင် နှာခေါင်းစည်းမဖြစ်မနေတပ်ဆင်ရန် လိုအပ်လိမ့်မည်” ဟု ပါကစ်စတန်မြို့ပြလေကြောင်းအာဏာပိုင်(PCAA) က တနင်္ဂနွေနေ့ထုတ်ပြန်ချက်တွင် ပြောကြားခဲ့သည်။
ယူကရိန်းနိုင်ငံအရှေ့ပိုင်း လူဟန့်စ် ပြည်နယ်မှာ ယူကရိန်းတပ်ဖွဲ့တွေ နောက်ဆုံးခြေကုပ်ယူထားတဲ့ လိုင်စီချန့်စ်မြို့ ကို အပြည့်အဝ ဝိုင်းရံထားပြီဖြစ်ကြောင်း ရုရှားစစ်ဘက် က ပြောကြားခဲ့ပေမယ့် အဲဒီမြို့မှာ တိုက်ပွဲတွေ ဆက်လက်ဆင်နွဲနေဆဲဖြစ်ကြောင်း ယူကရိန်းအရာရှိတွေ က ပြောကြားကြပါတယ်။
ရုရှားသမ္မတ ဗလာဒီမာပူတင်က ဇွန် ၃၀ ရက် ကြာသပတေးနေ့၌ ၎င်း၏မွေးရပ်မြေ စိန့်ပီတာစ်ဘတ်မှာ ပြုလုပ်သော ဥပဒေရေးရာ ဆွေးနွေးပွဲတွင် ရုရှားသည် မဟာဗျူဟာမြောက် တည်ငြိမ်မှု ရှိစေရေး၊ အဖျက်စွမ်းအားကြီး လက်နက်များ မပြန့်ပွားရေး အတွက် ချမှတ်ထားသည့် စနစ်များအား ထိန်းသိမ်း စောင့်ရှောက်ရေးနှင့် လက်နက်ထိန်းချုပ် အခြေအနေများ ပိုမိုတိုးတက်လာစေရေးအတွက် ဆွေးနွေးမှုများပြုလုပ်ရန် တံခါးဖွင့်ထားကြောင်း ပြောကြားခဲ့သည်။ မော်စကိုနှင့် ဝါရှင်တန်တို့သည် နျူကလီးယားလက်နက်ကိစ္စနှင့် ပတ်သက်၍ အဆက်အသွယ်မပျက် ဆွေးနွေးပြောဆိုရန် အရေးကြီးကြောင်း အလေးပေးပြောကြားထားသည်။
ယူကရိန်းအပေါ် ရုရှားကျူးကျော်စစ်နဲ့ပတ်သက်ပြီး နေတိုးအဖွဲ့က စစ်ရေးအရ တုန့်ပြန်ပုံပြောင်းလဲဖို့ သဘော တူလိုက်တဲ့ နောက်ပိုင်း အမေရိကန်ကလည်း ဥရောပတဝန်းမှာ စစ်အင်အား တိုးချဲ့ချထားဖို့ ဆုံးဖြတ်လိုက်ကြောင်း BBC သတင်းဌာနက ဖော်ပြခဲ့ပါတယ်။ အထူးသဖြင့် အမေရိကန်အစိုးရဟာ ပိုလန်မှာ အမြဲတမ်း စစ်အခြေစိုက် စခန်းတစ်ခုတည်ဆောက်ထားရှိမှာဖြစ်ပြီး စပိန်ကိုလည်း စစ်သင်္ဘောအုပ်စုတွေ စေလွှတ်မယ်လို့သိရပါတယ်။ ဒါ့အပြင် ရိုမေးနီးယားကို တပ်ဖွဲ့ဝင်တွေ စေလွှတ်ပြီး တိုက်လေယာဉ်အုပ်စုကို ဗြိတိန်လေတပ်နဲ့ပူးပေါင်းစေမယ်လို့ သိရပါတယ်။ နေတိုးအဖွဲ့ကတော့ ဥရောပမှာ လက်ရှိတပ်ဖွဲ့ဝင်အင်အား ၄၀၀၀၀ ခန့်ကနေ ၃ သိန်းကျော်အထိ အသင့်ချထားမှာဖြစ်ပြီး ဒါဟာ စစ်အေးခေတ်နောက်ပိုင်း နေတိုးရဲ့အကြီးမားဆုံးအပြောင်းအလဲဖြစ်လာမှာပါ။ (BBC)
စပိန်နိုင်ငံရှိ ရိုတာအခြေစိုက်ရေတပ်စခန်းသို့ နောက်ထပ်ဖျက်သင်္ဘောနှစ်စီး စေလွှတ်မည်ဟု အမေရိကန်သမ္မတ ဂျိုးဘိုင်ဒင်က အင်္ဂါနေ့တွင် ကြေညာခဲ့ပြီး အဆိုပါနေရာ၌အခြေစိုက်ထားသည့် အမေရိကန်ဖျက်သင်္ဘောပေါင်း ခြောက်စီးအထိ ရှိလာမည်ဖြစ်သည်။
“စစ်ပွဲမစခင်မှာ ကျွန်တော်တို့ပြောခဲ့သလိုပဲ ပူတင်က ယူကရိန်းကို တိုက်ခိုက်ခဲ့မယ်ဆိုရင် အမေရိကန်က ဥရောပမှာ ကျွန်တော်တို့ရဲ့ အင်အား အနေအထားကို မြှင့်တင်ပြီး ဥရောပလုံခြုံရေးနယ်ပယ်အသစ်ရဲ့ လက်တွေ့ကျမှုအတွက် တုံ့ပြန်မှာပါ။” ဟု စပိန်ဝန်ကြီးချုပ် ပီဒရိုဆန်းချက်ဇ်နှင့်အတူ ပြောကြားခဲ့သည်။
ဂျပန်နိုင်ငံတွင် စံချိန်တင်အပူဆုံးနေ့များကျော်ဖြတ်နေရချိန် လျှပ်စစ်ဓာတ်အားပြတ်တောက်မည်ကို စိုးရိမ်နေကြရသည်။
ထို့ကြောင့် ဝန်ကြီးချုပ် က နျူကလီးယား စွမ်းအင် သုံးစွဲမှု မြှင့်တင်ရန် တောင်းဆိုခဲ့သည်။
တိုကျိုမြို့အနီးတစ်ဝိုက်တွင် အပူချိန် ၄၀ ဒီဂရီစင်တီဂရိတ် ရှိနေပြီး ဇူလိုင် ၅ ရက်ထိတိုကျိုအပူချိန်သည် ၃၀ ဒီဂရီ စင်တီဂရိတ်အောက်သို့ ပြန်လည်ကျဆင်းမည်မဟုတ်ကြောင်း ဂျပန်မိုးလေဝသအေဂျင်စီကခန့်မှန်းထားသည်။
