ငြိမ်းချမ်းရေးအတွက် နိုင်ငံရေး ဆွေးနွေးမှုများ ပြုလုပ်မည့် ပြည်ထောင်စုငြိမ်းချမ်းရေး ညီလာခံ (၂၁ ရာစုပင်လုံ) သြဂုတ် ၂၃ ရက်မှ ၂၇ ရက်ကြားကျင်းပနိုင်ဟု ဗိုလ်မှူးကြီး ခွန်ဥက္ကာ ပြောကြား
ပြည်တွင်းငြိမ်းချမ်းရေးရရှိရေးအတွက် နိုင်ငံရေးဆွေးနွေးမှုများ ပြုလုပ်မည့် ပြည်ထောင်စုငြိမ်းချမ်းရေး ညီလာခံ (၂၁ ရာစုပင်လုံ) ကို ယခုနှစ် သြဂုတ် (၂၃) ရက်မှ (၂၇) ရက်ကြား ကျင်းပနိုင်ဟု တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ထိုးထားသည့် တိုင်းရင်သားအဖွဲ့ ရှစ်ဖွဲ့မှ ထိပ်သီးခေါင်းဆောင် ရှစ်ဦးဖြင့် ဖွဲ့စည်းထားသော ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) အဖွဲ့ဝင် ဗိုလ်မှူးကြီး ခွန်ဥက္ကာက ခန့်မှန်းပြောကြားသည်။
အဆိုပါညီလာခံကို ယခုနှစ် သြဂုတ်လမတိုင်မီကျင်းပနိုင်ရေး ကြိုးစားမည်ဟု ဇွန် (၂၈) ရက်က နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် PPST အဖွဲ့တို့ နေပြည်တော်၌ တွေ့ဆုံစဉ် ဆွေးနွေးသဘောတူထားသည်။
ငြိမ်းချမ်းရေး လုပ်ငန်းစဉ်တွင် NCA လက်မှတ် မထိုးရသေးသည့် တိုင်းရင်းသားအဖွဲ့များ ပါဝင်လာနိုင် ရေးအတွက် စဉ်းစားဆောင်ရွက်ရန် NCA လက်မှတ်ထိုးထားသည့် တိုင်းရင်းသားအဖွဲ့ ရှစ်ဖွဲ့တွင် တာဝန်ရှိသည်ဟု ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) ဦးဆောင်နာယက လည်း ဖြစ်သူ ဗိုလ်မှူးကြီး ခွန်ဥက္ကာက ဆိုသည်။
အစိုးရသစ်ကဦးဆောင်မည့် ၂၁ ရာစုပင်လုံကို မရရအောင် ပူးပေါင်းပါဝင်ပြီး လိုက်ပါဖို့ ကြိုးပမ်း သွားမည်ဖြစ်ကြောင်း၊ ငြိမ်းချမ်းရေးလုပ်ငန်းစဉ်တွင် ကျန်နေသူများ ပါလာရေးကို ပူးပေါင်းလုပ်ဆောင် ရန်ဆိုသည်ကို အစိုးရနှင့် NCA လက်မှတ်ထိုးထားသည့် တိုင်းရင်းသား လက်နက်ကိုင်အဖွဲ့ ရှစ်ဖွဲ့တို့က လိုလားကြသည်ဟု ၎င်းက ဆိုသည်။
လက်ရှိတွင် NCA လက်မှတ်မထိုးရသေးသည့် တိုင်းရင်းသားလက်နက်ကိုင်အဖွဲ့များ ၂၁ ရာစု ပင်လုံ ညီလာခံသို့ ပါဝင်လာနိုင်ရေးအတွက် အစိုးရက ညီလာခံအကြိုပြင်ဆင်ရေးကော်မတီ ဖွဲ့စည်းကာ လက်မှတ်မထိုးရသေးသည့် အဖွဲ့အစည်းများနှင့် တွေ့ဆုံညှိနှိုင်းလျက် ရှိသည်။
အဆိုပါ အကြိုပြင်ဆင်ရေးကော်မတီ၏ လုပ်ငန်းဆောင်ရွက်မှုများအရ ယခုဇူလိုင်လလယ်တွင် အစိုးရ ၏ ငြိမ်းချမ်းရေးလုပ်ငန်းဆောင်တာများကို ဦးဆောင်လုပ်ကိုင်နေသည့် ဒေါ်အောင်ဆန်းစုကြည်နှင့် NCA လက်မှတ် မထိုးရသေးသည့် တိုင်းရင်းသား လက်နက်ကိုင်အဖွဲ့အစည်းများနှင့် စုဖွဲ့ထားသည့် ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ (UNFC) အဖွဲ့ဝင်ခေါင်းဆောင်များ ရန်ကုန်မြို့၌ တွေ့ဆုံဆွေးနွေးရန် နှစ်ဖက် သဘောတူညီထားသည်။
၂၁ ရာစုပင်လုံတွင် တိုင်းရင်းသားလက်နက်ကိုင်အဖွဲ့များ ပါဝင်နိုင်ရေးနှင့်ပတ်သက်၍ ဆွေးနွေးရန် NCA လက်မှတ်ထိုးထားသည့် အဖွဲ့များနှင့် မထိုးရသေးသည့်အဖွဲ့များ ပါဝင်သော တိုင်းရင်းသား လက်နက်ကိုင်အဖွဲ့ ထိပ်သီးခေါင်းဆောင်များ စုံညီအစည်းအဝေးကို ကချင်ပြည်နယ် မိုင်ဂျာယန် ဒေသတွင် ယခု ဇူလိုင်လအတွင်း ကျင်းပနိုင်ရေး တိုင်းရင်းသားအဖွဲ့များက ဆောင်ရွက်လျက် ရှိသည်။
Eleven
