ပြည်ခိုင်ဖြိုးပါတီဌာနချုပ် ဒဿမအကြိမ် ဝါဆိုသင်္ကန်းဆပ်ကပ်လှူဒါန်း

နေပြည်တော်၊ ဇူလိုင် ၁၄

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဌာနချုပ်၏ ဒဿမအကြိမ် ဝါဆိုသင်္ကန်း ဆပ်ကပ်လှူဒါန်းခြင်းနှင့် နေ့ဆွမ်းဆပ်ကပ်ခြင်း အလှူမင်္ဂလာအခမ်းအနားကို ၁၄-၇-၂၀၂၂ ရက်နေ့ နံနက် ၉ နာရီခွဲအချိန်က ပါတီဌာနချုပ်ရှိ ဧည့်ခန်းမတွင် ပြုလုပ်ခဲ့ကြပါသည်။

အခမ်းအနားကို နမောတဿ သုံးကြိမ်ရွတ်ဆို၍ဖွင့်လှစ်ခဲ့ပြီး ကြွရောက်တော်မူကြသော ဆရာတော် သံဃာတော်များထံမှ ငါးပါးသီလခံယူဆောက်တည်ခြင်း၊ ဆရာတော်များမှ ပရိတ်တရားတော်များ ရွတ်ဖတ်ချီး​​မြှင့်ခြင်း၊ ပါတီဥက္ကဋ္ဌကြီးနှင့် ပါတီတာဝန်ရှိသူများက ဝါဆိုသင်္ကန်းနှင့် လှူဖွယ်ဝတ္ထုအစုစုတို့အား ဆပ်ကပ် လှူဒါန်းခြင်း၊ ပေါက်မြိုင်ကျောင်းတိုက်ဆရာတော် အဂ္ဂမဟာပဏ္ဍိတ ဘဒ္ဒန္တဇနိန္ဒိထံမှ ရေစက်ချတရားနာယူ၍  ပြုပြုသမျှသော ကောင်းမှုတို့အား အမျှဝေခြင်း၊ နေ့ဆွမ်း ဆက်ကပ်လှူဒါန်းခြင်း ဆောင်ရွက်ခဲ့ပြီးနောက် ဗုဒ္ဓသာသနံစိရံတိဌတု သုံးကြိမ်ရွတ်ဆိုကာ အခမ်းအနားအား ရုပ်သိမ်းခဲ့ကြသည်။

အခမ်းအနားတွင် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဥက္ကဋ္ဌ ဦးသန်းဌေးနှင့် ဇနီး၊ ဒုတိယဥက္ကဋ္ဌဦးလှထွန်း၊ အထွေထွေအတွင်းရေးမှူး ဦးသက်နိုင်ဝင်းနှင့်ဇနီး၊ ဗဟိုအတွင်းရေးမှူးများ၊ ဗဟိုအလုပ်အမှုဆောင်များ၊ ပြောရေးဆိုခွင့်ရှိသူများနှင့် ဦးစီးရုံးအဖွဲ့ဝင်များက ဝါဆိုသင်္ကန်းနှင့် လှူဘွယ်ပစ္စည်းများအား ဆပ်ကပ်လှူဒါန်းခဲ့ ကြပါသည်။