ယခုနှစ်ဝင်ဘယ်ဒန် တင်းနစ်ပြိုင်ပွဲမှာ ဆုကြေးငွေ စံချိန်တင် ပေးအပ်မည်
ယခုနှစ်ဝင်ဘယ်ဒန်တင်းနစ်ပြိုင်ပွဲတစ်ရပ်လုံးမှာ ဆုကြေးငွေ စံချိန်တင်ပေါင်(၄၀.၃)သန်း ပေးအပ်သွားမယ်လို့ ပြိုင်ပွဲကျင်းပရေးအဖွဲ့က ထုတ်ပြန်ကြေညာခဲ့ပါတယ်။ ဒါပေမယ့် အမျိုးသား၊ အမျိုးသမီး တစ်ဦးချင်းပြိုင်ပွဲမှာ ချန်ပီယံဖြစ်တဲ့သူတွေက ဆုကြေးပေါင်(၂)သန်းစီသာ ရရှိမှာဖြစ်ပါတယ်။ ဒါဟာ ပရိသတ်တွေကွင်းလုံးပြည့် ကြည့်ခွင့်ရခဲ့တဲ့ ၂၀၁၉ခုနှစ်ကပေးအပ်ခဲ့တဲ့ ဆုကြေးပေါင်(၂.၃၅)သန်းထက် အနည်းငယ်လျှော့နည်းနေပါတယ်။ ပြိုင်ပွဲတစ်ရပ်လုံးမှာတော့ ဆုကြေးငွေ ပေါင်(၃၈)သန်းပေးအပ်ခဲ့တဲ့ ၂၀၁၉ နဲ့နှိုှုင်းယှဉ်ရင် (၅.၄)ရာခိုင်နှုန်းနဲ့ ၂၀၂၁ ကထက် ၁၁ ရာခိုင်နှုန်း တိုးမြင့်လာခဲ့ပါတယ်။ ၂၀၂၀ ဝင်ဘယ်ဒန်တင်းနစ်ပြိုင်ပွဲကို ကိုဗစ်ကပ်ရောဂါကြောင့် ဖျက်သိမ်းခဲ့ရပြီး ပြီးခဲ့တဲ့နှစ်ဝင်ဘယ်ဒန်တင်းနစ်ပြိုင်ပွဲမှာ ကိုဗစ်ကန့်သတ်ချက်တွေကြောင့် ပွဲကြည့်ပရိသတ် လျှော့ချပြီး ကျင်းပခဲ့ရပါတယ်။ အခုနှစ်ဝင်ဘယ်ဒန်တင်းနစ်ပြိုင်ပွဲကို ဇွန်လ(၂၇)ရက်မှာကျင်းပမှာဖြစ်ပြီး ပရိသတ်အပြည့်အဝကြည့်ရှုခွင့်ပေးဖို့ စီစဉ်ထားပါတယ်။
