မြန်မာပြည်တွင်းရေးအား ဖိအားပေးသော မလေးရှားဝန်ကြီးချုပ်ကို မျိုးချစ်သံဃာတော်များနှင့် ပြည်သူများ ဆန္ဒပြ
မြန်မာနိုင်ငံ၏ ပြည်တွင်းရေးကို ဖိအားပေးသည့် မလေးရှားဝန်ကြီးချုပ် နာဂျစ်ရာဇက်ကို မျိုးချစ်သံဃာတော်များနှင့် ပြည်သူများက ဆန္ဒပြပွဲတစ်ခုကို ဒီဇင်ဘာ (၄)ရက် မွန်းလွဲ ၂ နာရီခန့်က ရန်ကုန်မြို့ မြို့တော်ခန်းမရှေ့၌ ပြုလုပ် ခဲ့ကြောင်း သိရသည်။
ရခိုင်ပြည်နယ်တွင် ဖြစ်ပွားနေသည့် အကြမ်းဖက်တိုက်ခိုက်မှုများနှင့်ပတ်သက်ပြီး ရိုဟင်ဂျာတွေကို နှိမ်နင်းနေသည့် အတွက် မြန်မာအစိုးရကို ဖိအားပေးဖို့ မလေးရှားဝန်ကြီးချုပ်က စီစဉ်နေသည့်အတွက် တုန့်ပြန်ဆန္ဒပြခြင်းဖြစ် ကြောင်း ဆန္ဒပြသူတွေက ဆိုသည်။
ဆန္ဒပြပွဲတွင် “အကြမ်းဖက်အားပေးတဲ့ မလေးရှားဝန်ကြီးချုပ် သမိုင်းမှန်ကိုလေ့လာပါ၊ ကမ္ဘာကို အလိမ်ညာဝါဒဖြန့် နေသူတွေ ကျရှုံးပါစေ” စသည့် ကြွေးကြော်သံများ ရွတ်ဆိုခဲ့ပြီး မျိုးချစ်သံဃာတော်များနှင့် ပြည်သူများ ၁၀၀ နီးပါးခန့် ပူးပေါင်းပါဝင်ခဲ့သည်။
မလေးရှားဝန်ကြီး နာဂျစ်ရာဇတ်သည် ယနေ့ မလေးရှားနိုင်ငံ ကွာလာလမ်ပူမြို့၌ ကျင်းပသည့် လူထုအစည်းအဝေး တွင် မြန်မာအစိုးရသည် နိုင်ငံ၏ အနောက်ဘက်ဒေသရှိ ရိုဟင်ဂျာတွေအပေါ် သွေးထွက်သံယိုဖြစ်အောင် နှိမ်နှင်း မှုတွေကို ရပ်တန့်ရမည်ဖြစ်ကြောင်း၊ ထောင်နှင့်ချီသည့် ရိုဟင်ဂျာတွေသည် နိုင်ငံ၏ အနောက်ဘက်ဒေသမှ ထွက်ပြေးတိမ်းရှောင်နေရပြီး သတ်ဖြတ်ခံရမှု၊ နှိပ်စက်ခံရမှု၊ မုဒိန်းကျင့်ခံရမှု စသည့် ဖြစ်စဉ်တွေကိုလည်း ကြားနေ ရကြောင်းပြောဆိုခဲ့သည်ဟု ဘန်ကောက်ပိုစ့်သတင်းစာတွင် ရေးသားဖော်ပြထားသည်။
ယင်းအပြင် မွတ်ဆလင်လူမျိုးများအနေဖြင့် စည်းလုံးရန်လိုအပ်ကြောင်း ပြောကြားခဲ့သည်ဟု CNN သတင်းဌာန တွင်လည်း ဖော်ပြထားသည်။
မကွေးကျောင်းတိုက်ဆရာတော် ဦးပါမောက္ခက ဒီဇင်ဘာ ၃ရက်ကလည်း မြန်မာနိုင်ငံဆိုင်ရာ မလေးရှားသံရုံး ရှေ့တွင် မလေးရှားဝန်ကြီးချုပ်ကို ကန့်ကွက်ကြောင်း တစ်ကိုယ်တော် ဆန္ဒဖော်ထုတ်ခဲ့သေးသည်ဟု သိရသည်။
# Mizzima
