ဉာဏ်ရည်တုနည်းပညာဆိုင်ရာ နိုင်ငံတကာ ပူးပေါင်းဆောင်ရွက်မှုကို မြှင့်တင်ရန် ကုလသမဂ္ဂလက်အောက် အဖွဲ့အစည်းသစ်တစ်ခု ထူထောင်မည်

==================

(နိုင်ငံတကာ) ဩဂုတ် ၂၈

ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်က ဉာဏ်ရည်တုနည်းပညာဆိုင်ရာ နိုင်ငံတကာ ပူးပေါင်းဆောင်ရွက်မှုကို မြှင့်တင်ရန် ရည်ရွယ်ချက်ဖြင့် ကုလသမဂ္ဂလက်အောက် အဖွဲ့အစည်းအသစ်တစ်ခု ထူထောင် ရန် ကုလသမဂ္ဂအထွေထွေ ညီလာခံ၏ဆုံးဖြတ်ချက်ကို ကြိုဆိုကြောင်း ပြောကြားခဲ့သည်။

ဉာဏ်ရည်တု နည်းပညာ ဆိုင်ရာ ကုလသမဂ္ဂ လွတ်လပ်သော နိုင်ငံတကာသိပ္ပံနည်းကျအဖွဲ့ကို တည်ထောင်ခြင်းနှင့် ဉာဏ်ရည်တု နည်းပညာ အပေါ် စီမံထိန်းချုပ်မှုဆိုင်ရာဆွေးနွေးပွဲ ကျင်းပမည့်အစီအစဉ်သည် အဆိုပါ နည်းပညာနှင့်ဆက်စပ်သည့် အန္တရာယ် များကို ဖြေရှင်းရန်နှင့် ၎င်း၏အကျိုးကျေးဇူးများကို အသုံးချရန်အတွက် သိသာထင်ရှားသော ခြေလှမ်းတစ်ရပ် ဖြစ် ကြောင်း ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်၏ ပြောရေးဆိုခွင့်ရှိသူ ဒူဂျာရစ်က သတင်းစာ ရှင်းလင်းပွဲ တွင် ပြောကြားခဲ့သည်။

၂၀၂၄ ခုနှစ် စက်တင်ဘာလတွင် ချမှတ်ခဲ့သည့် ကမ္ဘာ့ဉာဏ်ရည်တုနည်းပညာဆိုင်ရာ သဘောတူညီချက်၏ ကတိကဝတ်ကို လိုက်နာခြင်းဖြစ်ကြောင်းလည်း ၎င်းက ပြောကြားသည်။

ကုလသမဂ္ဂ လွတ်လပ်သော နိုင်ငံတကာ သိပ္ပံနည်းကျအဖွဲ့ သည်နောက်ဆုံးပေါ်ဉာဏ်ရည်တုနည်းပညာဆိုင်ရာ သုတေသနနှင့် မူဝါဒချမှတ်ခြင်းစသည့် အရေး ကြီးသော လုပ်ငန်းစဉ်များကို ဆောင်ရွက်ပေးမည်ဖြစ်သည်။

ယခုချမှတ်သည့် ပဏာမခြေလှမ်းကို ထောက်ခံပြီး လူသားအားလုံး၏ကောင်းကျိုးကို ဆောင်ရွက်ပေးမည့် ဉာဏ်ရည်တုတည်ဆောက်ရေးလုပ်ငန်းတွင် ပါဝင်ကူညီရန် သက်ဆိုင်သည့် နိုင်ငံအားလုံးကို တောင်းဆိုပါကြောင်း ကုလသမဂ္ဂအတွင်းရေးမှူးချုပ် ဂူတာရက်စ်က ပြောကြားခဲ့ သည်ဟု NHK သတင်းဌာနဖော်ပြချက်အရ သိရသည်။