ရန်ကုန်ဘူတာကြီးမှတဆင့် အနယ်နယ်အရပ်ရပ်သို့ ပြေးဆွဲပေးလျက်ရှိသည့် မြန်မာ့မီးရထားမှ ရထား လက်မှတ်များ အား Online စနစ်ဖြင့် ရောင်းချရန်စီစဉ်လျက်ရှိကြောင်း မြန်မာ့မီးရထားမှ သိရသည်။
“မီးရထားရုံးချုပ်ကတော့ အွန်လိုင်းစနစ်နဲ့ရောင်းဖို့ စီစဉ်နေပါတယ် အခုမှအစပျိုးစီစဥ်နေတာပဲရှိပါတယ်”ဟု မြန်မာ့မီးရထားမှ တာဝန်ရှိသူတစ်ဦးကပြောသည်။
ပြည်ပနိုင်ငံများတွင် သွားရောက်အလုပ်လုပ်ကိုင်နေသည့် မြန်မာနိုင်ငံသားများ မြန်မာနိုင်ငံသို့ နိုင်ငံခြားသုံး ငွေရောင်းဝယ် ဖောက်ကားသည့် လုပ်ငန်းလိုင်စင်ရဘဏ်များမှ တစ်ဆင့် လုပ်ခလစာလွဲပြောင်းပေးရာတွင် နိုင်ငံတော်မှပံ့ပိုးပေးသည့် အပိုဆောင်းငွေကိုပါ ထည့်သွင်းပေးလျက်ရှိကြောင်း သိရသည်။
မြန်မာနိုင်ငံသားများအနေဖြင့် မိသားစုဝင်များထံ လုပ်ခလစာလွှဲပို့ရာတွင် အမေရိကန် ၁ ဒေါ်လာ (သို့) ၎င်းနှင့် ညီမျှသည့် နိုင်ငံခြားငွေအပေါ်တွင် ပုဂ္ဂလိကဘဏ်များက နိုင်ငံတော်မှပံ့ပိုးပေးသည့် အပိုဆောင်းငွေ ၃၀ ကျပ် ကိုလည်း ငွေလွှဲထုတ်ယူသည့်အခါတွင် ထပ်မံထည့်သွင်းပေးလျက်ရှိကြောင်း သိရသည်။
အချက်အလက်မှန်ကန်စွာ ဖြည့်စွက်ထားခြင်းမရှိသည့် SIM Card များ ပိတ်သိမ်းမည်ဖြစ်၍ ၂၀၂၃ ခုနှစ် ဇန်နဝါရီ ၃၁ ရက်နောက်ဆုံးထား ပြင်ဆင်ရန် ဆက်သွယ်ရေးညွှန်ကြားမှုဦးစီးမှုဌာနက နိုဝင်ဘာ ၃ ရက်တွင် ထုတ်ပြန်ခဲ့ပါသည်။
တောင်ကိုရီးယားနိုင်ငံတွင် ကုန်ထုတ်လုပ်သား၊ Re-entry လုပ်သားအဖြစ် ဝင်ရောက်လုပ်ကိုင်မည့် မြန်မာလုပ်သား ၁၀၉ ဦးသည် နိုဝင်ဘာ ၁ ရက်က တောင်ကိုရီးယားနိုင်ငံသို့ ထပ်မံရောက်ရှိခဲ့ကြောင်း ဆိုးလ်မြို့ မြန်မာသံရုံးက သတင်းထုတ်ပြန်ထားသည်။
ရန်ကုန်တိုင်း၊သာကေတမြို့နယ်၊ဒဂုံမြို့သစ်(ဆိပ်ကမ်း) မြို့နယ်တို့အပါအဝင် နေရာ ၃ ခု၌ နိုဝင်ဘာ ၂ ရက် မွန်းတည့်ပိုင်းက ကလေး၊လူကြီး ၁၀၀ ဦးခန့်အစုလိုက်အပြုံလိုက် အစာအဆိပ်သင့်မှုဖြစ်ပွားခဲ့သဖြင့် ဆေးရုံများသို့ ပို့ဆောင်ပေးခဲ့ရကြောင်း သာကေတမြို့နယ်လူမှုကူညီရေးအဖွဲ့မှ သိရသည်။
သာကေတမြို့နယ်၊(၁၀)မြောက်ရပ်ကွက်ရှိ အ.မ.က(၂ ၉)တွင် နေ့လည်ပိုင်းက လာရောက်လှူဒါန်းသည့် ကြာဆံကြော်စားမိရာမှ ကလေးငယ်များ အစာအဆိပ်သင့်ခဲ့၍ ရန်ကင်း ကလေးဆေးရုံနှင့်ဟယ်ပင်ဆေးရုံတို့သို့ ပို့ဆောင်ပေးခဲ့ရကြောင်း သာကေတမြို့နယ်လူမှုကူညီရေးအဖွဲ့မှ သိရသည်။
ကွမ်ရှီးပြည်နယ် Beibu ပင်လယ်ကွေ့ဆိပ်ကမ်း ချင်းကျိုးဆိပ်ကမ်းဇုန်သို့ ရန်ကုန်မြို့မှ တိုက်ရိုက်ရေကြောင်း ကုန်စည်ပို့ဆောင်ခြင်းကို အောက်တိုဘာ ၂၈ ရက်က ဖွင့်လှစ်နိုင်ခဲ့ကြောင်း မြန်မာနိုင်ငံဆိုင်ရာ တရုတ်သံရုံးမှ နိုဝင်ဘာ ၁ ရက်က ထုတ်ပြန်ခဲ့သည်။
ရန်ကုန်မြို့မှ ချင်းကျိုးဆိပ်ကမ်းဇုန်သို့ SITC Venus သင်္ဘောစတင်ရောက်ရှိခြင်းဖြင့် ဖွင့်လှစ်နိုင်ခြင်းဖြစ်ကြောင်း ဆိုထားသည်။
(၃၁-၁၀-၂၀၂၂) ရက်နေ့၊ ည (၈:၀၀) နာရီမှ (၁-၁၁-၂၀၂၂) ရက်နေ့၊ ည (၈:၀၀) နာရီအတွင်း ဓာတ်ခွဲနမူနာစုစုပေါင်း (၉,၇၅၇) ခုအား စစ်ဆေးပြီးစီးခဲ့ရာ COVID-19 ရောဂါ ဓာတ်ခွဲအတည်ပြုလူနာသစ် (၈၁) ဦး တွေ့ရှိရသဖြင့် ရောဂါပိုးတွေ့ရှိမှု ရာခိုင်နှုန်းမှာ (၀.၈၃) ရာခိုင်နှုန်း ရှိပါသည်။
ပညာရေးဝန်ကြီးဌာန၊အဆင့်မြင့်ပညာဦးစီးဌာနရှိ တက္ကသိုလ်၊ ဒီဂရီကောလိပ်နှင့် ကောလိပ်များတွင် ၂၀၂၂ ခုနှစ် တက္ကသိုလ်ဝင်စာမေးပွဲအောင်မြင်သူများ၏ တက္ကသိုလ်နေ့သင်တန်း ပထမနှစ်(ပထမနှစ်ဝက်)ဝင်ခွင့်ရသူများ စာရင်းအား နိုဝင်ဘာ ၃ ရက်တွင် ကြေညာသွားမည်ဟု ပညာရေးဝန်ကြီးဌာန၊ အဆင့်မြင့်ပညာဦးစီးဌာနမှ ထုတ်ပြန်ခဲ့သည်။
သက်ဆိုင်ရာတက္ကသိုလ် ၊ ဒီဂရီကောလိပ် နှင့် ကောလိပ်များ ၊ ပညာရေးဝန်ကြီးဌာန website http://www.moe.gov.mm နှင့်အဆင့်မြင့်ပညာဦးစီးဌာန website http://www.dhe.gov.mm တို့တွင် ကြေညာထားမည်ဟု အသိပေးထုတ်ပြန်ခဲ့သည်။
ရန်ကုန်မြို့ရဲ့ ပထမဆုံး ရေပေါ်ညဈေးကို လာမယ့်နိုဝင်ဘာ ၄ ရက်ကနေစတင်ပြီး ရန်ကုန်မြို့ ဗိုလ်တထောင် ဘုရားအနီးရှိ ဆိပ်ခံတံတားအမှတ် ၅ မှာ ဖွင့်လှစ်တော့မယ်လို့သိရပါတယ်။ အဲဒီရေပေါ်ညဈေးကို နိုဝင်ဘာ ၄ ရက်ကနေစတင်ပြီး ၁၃ ရက်အထိ ဖွင့်လှစ်သွားမှာဖြစ်ပါတယ်။
ဂျပန်ကုမ္ပဏီများက မြန်မာလုပ်သား ၇၀၀ နီးပါး ထပ်မံခေါ်ယူမည်ဖြစ်ကြောင်း တိုကျိုမြို့ရှိ မြန်မာသံရုံး၏ ထုတ်ပြန်ချက်အရ သိရသည်။
မြန်မာသံရုံး၊ တိုကျိုမြို့အနေဖြင့် အလုပ်သမား ဝန်ကြီးဌာနက နိုင်ငံခြားရေးဝန်ကြီး ဌာနမှတစ်ဆင့် ပေးပို့လာသည့် အလုပ်ကမ်း လှမ်းစာ (Demand Letter) များကို စိစစ် ဆောင်ရွက်နေကြောင်း၊ ထိုသို့ စိစစ်ရာတွင် ဂျပန်နိုင်ငံရှိ အလုပ်သမားကြီးကြပ်ရေး ကုမ္ပဏီနှင့် အလုပ်ခေါ်ယူသည့် စက်ရုံ/ကုမ္ပဏီများသည် ဂျပန်နိုင်ငံတွင် တရားဝင် တည်ထောင်ထားခြင်း ရှိ/မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချက်များ၊ သဘောထားမှတ်ချက်များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက် ရှိသည် ဟု သံရုံးက ဆိုသည်။
