ဂျာကာတာ၊ဇွန် ၂၃
အင်ဒိုနီးရှားသမ္မတ ဂျိုကို ဝီဒိုဒို သည် ဒေါ်လာ ၃၄ ဘီလီယံ ကုန်ကျမည်ဖြစ်သော မြို့တော်သစ်အား အမြန်တည်ဆောက်ရန် တွန်းအားပေးနေသောကြောင့် ဩဂုတ်လ၌ ၎င်းမြို့တော်သစ်တွင် အစိုးရ အဆောက်အအုံများ စတင်ဆောက်လုပ်သွားမည် ဖြစ်ကြောင်း သိရသည်။ အဆိုပါမြို့တော်သစ်အား နူစန်တာရာ ၌ ဆောက်လုပ်သွားမည်ဖြစ်ကာ သမ္မတ သည် ယင်းနေရာသို့ သွားရောက် ကြည့်ရှုခဲ့ပြီးဖြစ်သည်။
အစ္စရေးဝန်ကြီးချုပ် နက်ဖ်တာလီ ဘဲနက် ဦးဆောင်တဲ့ ညွန့်ပေါင်းအစိုးရဟာ ပါလီမန်ကို ဖျက်သိမ်းပြီး ရွေးကောက် ထပ်ကျင်းပဖို့ တနင်္လာနေ့က သဘောတူလိုက်ပါတယ်။ ဒီရွေးကောက်ပွဲဟာ သုံးနှစ်အတွင်း ငါးကြိမ်မြောက် ကျင်းပရတဲ့ ရွေးကောက်ပွဲဖြစ်လာမှာပါ။ ဆောင်းဦးပေါက်မှာ ကျင်းပဖွယ်ရှိနေတဲ့ ဒီရွေးကောက် ပွဲကနေ ဝန်ကြီးချုပ် ဘင်ဂျမင် နေတန်ညာဟု ဦးဆောင်တဲ့ ဘာသာရေးအားသန်တဲ့ အမျိုးသားရေးဝါဒီအစိုးရ တစ်ကျော့ပြန်လာနိုင်သလို နိုင်ငံရေး မတည်ငြိမ်တဲ့ အခြေအနေတစ်ရပ် ပေါ်ပေါက်လာနိုင်ဖွယ်ရှိနေပါတယ်။
ဇွန်လ ၂၂ ရက် ဗုဒ္ဓဟူးနေ့အစောပိုင်း၌ အာဖဂန်နစ္စတန်နိုင်ငံရှိ ပက်တီကာ ပြည်နယ်အရှေ့ပိုင်းတွင် ငလျင်လှုပ်ခတ်ခဲ့သဖြင့် အနည်းဆုံး လူ ၉၂၀ ဦးထက်မနည်း သေဆုံးခဲ့ကြောင်း နိုင်ငံပိုင်သတင်းဌာနမှ ထုတ်ပြန်ကြေငြာခဲ့သည်။ အဆိုပါငလျင်သည် ပါကစ္စတန်နယ်စပ်အနီး ကော့စ်မြို့မှ ၄၄ ကီလိုမီတာအကွာ၌ အနက် ၅၁ ကီလိုမီတာကို ဗဟိုပြုကာလှုပ်ခတ်ခဲ့ကြောင်း အမေရိကန်ဘူမိဗေဒလေ့လာရေးဌာနမှ ပြောကြားခဲ့သည်။
ရုရှားရေနံစိမ်းနှင့် ထုတ်ကုန်များသည် ၂၀၂၃ ခုနှစ်တွင် အာရှဈေးကွက်များသို့ ဦးတည်သွားမည်ဖြစ်ပြီး ဥရောပ အနေဖြင့် ဒီဇယ်ဝယ်ယူရန်အတွက် အရှေ့အလယ်ပိုင်းသို့ပို ဦးတည်သွားမည်ဖြစ်ကြောင်း Vitol ကုမ္ပဏီ၏ အမှုဆောင်အရာရှိချုပ် Russell Hardy က အင်္ဂါနေ့တွင် ပြောကြားခဲ့သည်။
၎င်းက ” ဝယ်လိုအားနည်းသွားသည့်တိုင်စွမ်းအင်စျေးကွက်ကဆက်လက်မြဲနေဦးမည်” ဟုဆိုခဲ့သည်။
ရှရှား က ဓါတ်ငွေ့ ပေးပို့တာတွေကို လျှော့ချလိုက်လို့ ရုရှားဆီက ဓာတ်ငွေကို အများဆုံး ဝယ်ယူနေကြတဲ့ ဥရောပနိုင်ငံတွေ က တခြားလောင်စာအရင်းအမြစ်တွေကို အပူတပြင်း စတင်ရှာဖွေနေကြပြီး ကျောက်မီးသွေးဆီ ပြန်လည်ဦးလှည့်ရဖွယ် ရှိနေပါတယ်။ အကယ်၍သာ ပြန်ပြီး မဖြည့်တင်းခဲ့ရင် သူတို့အနေနဲ့ ဆောင်းရာသီမှာ စွမ်းအင် အကျပ်အတည်းနဲ့ ရင်ဆိုင်ရနိုင်ပါတယ်။
ခတ္တမန္ဒူ၊ ဇွန် ၂၀
နီပေါနိုင်ငံ၏မြို့တော် ခတ္တမန္ဒူ၌ ဇွန်လ ၂၀ ရက် တနင်္လာနေ့တွင် လောင်စာဆီဈေးနှုန်းမြင့်တက်လာမှုနှင့် ပတ်သက်၍ ဆန့်ကျင်ဆန္ဒပြနေသူများအား ရဲများက မျက်ရည်ယိုဗုံးများသုံးကာ လူစုဖြိုခွဲခဲ့ရကြောင်း မျက်မြင်သက်သေများနှင့် ရဲအရာရှိများက ပြောကြားခဲ့သည်။
မနီလာ၊ဇွန် ၁၉
ဖိလစ်ပိုင်သမ္မတဟောင်း ဒူတာတေး၏သမီးဖြစ်သူ ဆာရာဒူတာတေးကာပီရိုသည်နိုင်ငံ၏ ၁၅ ဦးမြောက် ဒုတိယသမ္မတအဖြစ် ဇွန်လ ၁၉ ရက်က ကျမ်းသစ္စာကျိန်ဆိုခဲ့ပြီး သဘောထားကွဲလွဲမှုများရှိခဲ့သော ရွေးကောက်ပွဲ မဲဆွယ်မှုများအပြီး အမျိုးသားပြန်လည်စည်းလုံးညီညွတ်မှုရရှိရန်တောင်းဆိုခဲ့သည်။
“ရှေ့ဆက်ရမဲ့ခရီးမှာ စိန်ခေါ်မှုတွေပြည့်နှက်နေမှာမို့ နိုင်ငံသားချင်းစည်းလုံးဖို့လိုအပ်ပါတယ်” ဟုသူမရဲ့ဇာတိမြို့ Davao ၌မိဘများနဲ့အတူ ကျမ်းသစ္စာကျိန်ဆိုပွဲအခမ်းအနားတွင်ပြောကြားခဲ့သည်။
ဟောင်ကောင်၊ ဇွန် ၂၀
ကမ္ဘာ့အကြီးဆုံးလောင်းကစားစင်တာ မကာအိုသည် ပြီးခဲ့သည့်အပတ် ပြည်တွင်း၌ ကိုဗစ်-၁၉ ကပ်ရောဂါ ကူးစက်ဖြစ်ပွားမှု များစွာတွေ့ရှိပြီးနောက် ဇွန်လ ၂၀ ရက် တနင်္လာနေ့တွင် ၎င်း၏ ဒုတိယမြောက်ရက်အနေဖြင့် လူပေါင်းများစွာအား ကိုဗစ်-၁၉ ရောဂါ စစ်ဆေးမှုစတင်ခဲ့ပြီး စီးပွားရေးလုပ်ငန်းအများစုကိုလည်း ပိတ်ထားကြောင်း သိရသည်။ သို့ရာတွင် ၎င်း၏ ကာစီနိုလုပ်ငန်းများကိုမူ ဆက်လက်ဖွင့်ထားဆဲရှိကြောင်း သိရသည်။
အမေရိကန်တွင် အသက်ငါးနှစ်အောက် ကလေးငယ်များကို ကိုဗစ်(၁၉) ကာကွယ်ဆေးထိုးနှံရန်နှင့် ပတ်သက်၍ အစားအသောက်နှင့် ဆေးဝါးကွပ်ကဲရေးဌာန (အက်ဖ်ဒီအေ)က ဇွန် ၁၇ ရက်တွင် ခွင့်ပြုလိုက်သည်။
မွေးကင်းစ ကလေးများ၊ အသက်ခြောက်လမှ လေးနှစ်အရွယ်များအတွက် ဖိုင်ဇာကာကွယ်ဆေးကို အရေးပေါ် အသုံးပြုခွင့်နှင့် အသက်ခြောက်လမှ (၁၇) နှစ်ကြားအရွယ်များအတွက် မိုဒါးနားကာကွယ်ဆေး ထိုးနှံခြင်းကို အက်ဖ်ဒီအေက ခွင့်ပြုလိုက်သည်။
လောင်စာဆီရှားပါးပြတ်လပ်လာမှုကြောင့် အစိုးရဝန်ထမ်းများအနေဖြင့် မိမိတို့နေအိမ်များမှပင် သီတင်းနှစ်ပတ်ကြာ အလုပ်လုပ်ပေးကြရန် သီရိလင်္ကာအစိုးရက ဇွန် ၁၇ရက်တွင် ညွှန်ကြားထားကြောင်း သိရသည်။
သီရိလင်္ကာနိုင်ငံသည် ကိုရိုနာဗိုင်းရပ်စ်ကပ်ဘေး နောက်ဆက်တွဲအကျိုးဆက်အဖြစ် နိုင်ငံခြားအရန်ငွေ လက်ဝယ် ထားရှိနိုင်သည့် ပမာဏကျဆင်းခဲ့ရပြီး နှစ်ပေါင်း ၇၀ အတွင်း အဆိုးရွားဆုံး ဘဏ္ဍာရေးအကျပ်အတည်းနှင့် ရင်ဆိုင်ခဲ့ရသည်။
