ပြုံယမ်း၊ သြဂုတ် ၃
မြောက်ကိုရီးယားနိုင်ငံသည် ပင်လယ်တွင်းသို့ နောက်ထပ် ဖျက်အားပြင်း ဒုံးကျည်တစ်စင်း စမ်းသပ်ပစ်လွှတ်ခဲ့ ကြောင်း တောင်ကိုရီးယား ကာကွယ်ရေးဝန်ကြီးဌာနက ပြောသည်။
မြောက်ကိုရီးယားအရှေ့ဖက်ကမ်းရိုးတန်းတွင် ဒုံးကျည်ကို ပစ်လွှတ်ခြင်းဖြစ်သည်ဟု တောင်ကိုရီးယားစစ်ဖက်က ဆိုသည်။
တောင်ကိုရီးယားနိုင်ငံအတွင်း ဒုံးကျည်ကာကွယ်ရေးစနစ် ထားရှိရန် အမေရိကန်နှင့် တောင်ကိုရီးယားတို့ စီစဉ်လျက် ရှိသည့်အပေါ် မြောက်ကိုရီးယားက ကိုယ်ထိ လက်ရောက် တုံ့ပြန်မည်ဟု ကြွေးကြော်ထားသည်။
နယူးယောက်၊ သြဂုတ် ၃
FBI တွင် ထိပ်တန်းလျှို့ဝှက်လုံခြုံရေးအချက်အလက်များ အသုံးပြုခွင့်ရှိသူ ဝန်ထမ်းတစ်ဦးက တရုတ်အစိုးရအတွက် သူလျှိုလုပ်ပေးနေသူဖြစ်ကြောင်း ဝန်ခံပြောကြားသည်။
တရုတ်နိုင်ငံတွင် မွေးဖွားသော အမေရိကန်နိုင်ငံသား ခံယူထားသူ ကန်ရှန်းချန်ကို တရုတ်အရာရှိတစ်ဦးထံ အရေးကြီး သတင်းအချက်အလက်များ ပေးပို့ပေးသည်ဟု တရားရုံးတင် အမှုစစ်ရာ၌ ၎င်းက ယခုကဲ့သို့ ဝန်ခံပြောကြားခြင်း ဖြစ်သည်။
Floridaမှာ ဇီကာဗိုင်းရပ်စ်တိုက်ဖျက်နေပုံ
ဇီကာဗိုင်းရပ်စ် ကူးစက်ခံရသူ နောက်ထပ် လူနာ ၁၀ ယောက် ထပ်မံတွေ့ရှိခဲ့ရတဲ့ အမေရိကန် အရှေ့တောင်ပိုင်း ဖလော်ရီဒါပြည်နယ် တောင်ဘက်စွန်းက စတုရန်း ၂ ကီလိုမီတာခွဲရှိတဲ့ အရပ်မှာ ရောဂါကူးစက်မှုကို တိုက်ဖျက်ဖို့အတွက် ပြည်နယ် တာဝန်ရှိသူတွေက ဗဟိုအစိုးရထံ အကူညီတောင်းခံထားပါတယ်။
အန်ကာရာ သြဂုတ် ၂
တူရကီနိုင်ငံ၏ မအောင်မြင်သော အာဏာသိမ်းမှုအပြီး အနောက်အုပ်စု၏ တူရကီနိုင်ငံအပေါ် တောင်းဆိုမှုများ အရာမရောက်သည့် အတွက် အမေရိကန် တပ်ဖွဲ့ ပူးပေါင်းစစ်ဆင်ရေး အကြီးအကဲ ဗိုလ်ချုပ်ဂျိုးဆက်ဒန်ဖော့ဒ်သည် တူရကီ နိုင်ငံသို့ သွားရောက်ခဲ့သည်။
ဝါရှင်တန် သြဂုတ် ၂
စင်ကာပူဝန်ကြီးချုပ် လီရှန်လုံးသည် သမ္မတ ဘာရက်အိုဘားမား၏ ဖိတ်ကြားချက်အရ အမေရိကန် ပြည်ထောင်စုသို့ ရောက်ရှိနေကြောင်း၊ စင်ကာပူ-အမေရိကန် သံတမန်ဆက်ဆံရေးထူထောင်မှု နှစ် (၅ဝ)ပြည့်အထိမ်းအမှတ် အခမ်းအနားကို အိမ်ဖြူတော်တွင် ကျင်းပသည့်အခါ ဝန်ကြီးချုပ်လီရှန်လုံးတက်ရောက်ရန် စီစဉ်ထားကြောင်း ဒေသဆိုင်ရာ သတင်းဌာနများက သြဂုတ် ၂ ရက် တွင် သတင်းထုတ်ပြန်သည်။
ထိုင်းစစ်အစိုးရ၏ ရွေးကောက်ပွဲသစ်များ ကျင်းပရေးလမ်းပြမြေပုံ (Roadmap) ၏ အရေးပါသော အပိုင်းဖြစ်သည့် ထိုင်းအခြေခံဥပဒေမူကြမ်းဆန္ဒခံယူပွဲတွင် မဲပေးခွင့်ရှိသူ သန်း ၅ဝ က မည်သည့်ဘက်ကို ရွေးမည်ဆိုခြင်းမှာ မရေမရာ ဖြစ်နေဆဲဖြစ်ကြောင်း စစ်တမ်းများကို ကိုးကားပြီး VOA သတင်းက ဖော်ပြသည်။ စစ်တမ်းများအရ မဲဆန္ဒရှင် ၆ဝ ရာခိုင်နှုန်းမှာ မည်သည့်ဘက်ကို ပေးရမည်မှန်း မဆုံးဖြတ်ရသေးဟု ဆိုသည်။
ဟောင်ကောင် သြဂုတ် ၂
တိုင်ဖုန်းမုန်တိုင်းနီဒါကြောင့် စီးပွားရေးမြို့တော်ဟောင်ကောင်တွင် လေပြင်းများတိုက်ခတ်ခဲ့ပြီး မြေနိမ့်ပိုင်း ဒေသများတွင် ရေကြီးမှု သတိပေးချက်များ ထွက်ပေါ် လာသည့်အတွက် လေကြောင်းခရီးစဉ် ရာပေါင်းများစွာကို ဖျက်သိမ်းခဲ့ရကြောင်းသိရသည်။
ဆာတီ၊ သြဂုတ် ၂
အမေရိကန်က ကုလသမဂ္ဂကျော်ထောက်နောက်ခံပြု လစ်ဗျားအစိုးရ၏ တောင်းဆိုချက်အရ လစ်ဗျားနိုင်ငံတွင်းက အိုင်အက်စ်များကို လေကြောင်းထိုးစစ်ဆင်သည်။
အိုင်အက်စ်အမာခံနယ်မြေ ဆာတီဆိပ်ကမ်းမြို့ရှိ ပစ်မှတ်များကို လေကြောင်းထိုးစစ်ဖွင့်ခြင်းဖြစ်သည်။
လေကြောင်းထိုးစစ်များကြောင့် အကြီးအကျယ်ဆုံးရှုံးမှုများ ရှိကြောင်း လစ်ဗျားဝန်ကြီးချုပ် ဖာယက်စ်ဆာရက်က ရုပ်သံမိန့်ခွန်းတွင် ပြောသည်။
လစ်ဗျားတွင် အိုင်အက်စများ ကြီးထွားလာခြင်းကို အနောက်ပါဝါနိုင်ငံများက စိုးရိမ်မှုများ မြင့်တက်လာရသည်။
ဆီးရီးယားတွင် ရုရှား ရဟတ်ယာဉ်တစ်စီး ဒုံးကျည်ဖြင့် ပစ်ချခံရပြီး လူ ၅ ဦး သေဆုံးသွားကြောင်း ရုရှားအစိုးရက ကြေညာခဲ့သည်။
ဆီးရီးယားတွင် ၂၀၁၅၊ စက်တင်ဘာမှစ၍ လေကြောင်းထိုးစစ်များ စတင်ခဲ့သည့်နောက်ပိုင်း ယခုဖြစ်ရပ်သည် ရုရှားအတွက် အကြီးမားဆုံး ထိခိုက်မှုလည်း ဖြစ်ခဲ့သည်။ ထောက်ပံ့ရေး လုပ်ငန်းများ ဆောင်ရွက်နေသည့် Mi-8 ရဟတ်ယာဉ်တစ်စီးသည် အစ်ဒ်လစ်ဘ်ခရိုင်ရှိ အခြေစိုက် စခန်းသို့ ပြန်လာနေစဉ် ပစ်ချခံခဲ့ရကြောင်း ရုရှား ကာကွယ်ရေး ဝန်ကြီးဌာနက ကြေညာသည်။ အဆိုပါ ရဟတ်ယာဉ်သည် အေလက်ပိုမြို့သို့ ထောက်ပံ့ရေး ပစ္စည်းများ သွားရောက် ပို့ဆောင်ခဲ့ခြင်း ဖြစ်သည်။
မလေးရှားနိုင်ငံတွင် အစိုးရအတိုက်အခံများအား ပြင်းပြင်းထန်ထိန် ဖိနှိပ်အရေးယူနိုင်မည့် အမျိုးသား လုံခြုံရေး ကောင်စီ အက်ဥပဒေသစ်တစ်ခု သြဂုတ်လ ၁ ရက်က စတင်အသက် ၀င်လာခဲ့ပြီဖြစ်ကြောင်း သတင်းတစ်ရပ်တွင် ဖော်ပြထားသည်။
ခြစားမှုပြဿနာများဖြင့် ရင်ဆိုင်နေရသော ၀န်ကြီးချုပ်နာဂျစ်၏ အစိုးရအပေါ် ဝေဖန်တိုက်ခိုက်နေသူများအား ဖိနှိပ်ရန် ရည်ရွယ်ချက် သက်သက်ဖြင့် ယခုဥပဒေကို ပြဌာန်းခြင်းဖြစ်ကြောင်းနှင့် ယင်းမှာ ဒီမိုကရေစီ၏ အနှစ်သာရကို တိုက်စားသွားနိုင်ဖွယ်ရှိကြောင်း ဝေဖန်သူများက ပြောကြားနေကြသည်။
