ကမ္ဘာ့နိုင်ငံများအကြား သဘောထားကွဲလွဲနေမှုကို ပြန်လည်သင့်မြတ်စေနိုင်သည့် အိန္ဒိယ၏ ဂျီ ၂၀ ဥက္ကဋ္ဌနေရာ

စက်မှုထိပ်သီး နိုင်ငံ ၂၀ (ဂျီ ၂၀) ၏ အလှည့်ကျ ဥက္ကဋ္ဌနေရာကို လွှဲပြောင်းရယူခဲ့သည့် အိန္ဒိယနိုင်ငံအနေဖြင့် ၎င်း၏အကျိုးစီးပွားများအတွက်သာမက ဖွံ့ဖြိုးဆဲနိုင်ငံများနှင့် ဖွံ့ဖြိုးပြီးနိုင်ငံများအကြား ပေါင်းကူးတံတား တစ်ခု အဖြစ် ဆက်သွယ်ပေးနိုင်ရန် အခွင့်အလမ်းရရှိခဲ့သည်ဟု ကျွမ်းကျင်သူများက ပြောကြားခဲ့သည်။ အိန္ဒိယသည် ဂျီ ၂၀ ဥက္ကဋ္ဌ နေရာကို အင်ဒိုနီးရှားထံမှ ဒီဇင်ဘာ ၁ ရက်တွင် တရားဝင်လွှဲပြောင်းရယူခဲ့ပြီး အိန္ဒိယဝန်ကြီးချုပ် နရင်ဒရာမိုဒီကမူ ဂျီ ၂၀ ဥက္ကဌအနေဖြင့် ဘက်ပေါင်းစုံပါဝင်ပြီး လုပ်ဆောင်ချက်ကို အခြေခံကာ တာဝန်ယူသွားမည်ဟု ကတိပြုခဲ့သည်။ ရုရှား-ယူကရိန်းစစ်ပွဲနှင့် အမေရိကန်-တရုတ် အားပြိုင်မှုကဲ့သို့ ပြဿနာများနှင့်အတူ သံတမန်ရေးရာ ဟန်ချက်ညီအောင်ထိန်းသိမ်းသည့် လုပ်ဆောင်မှု သည် လာမည့်နှစ်တွင် နယူးဒေလီ၌ ကမ္ဘာ့ခေါင်းဆောင်များကို လက်ခံကျင်းပမည့် အစည်းအဝေးတွင် အိန္ဒိယ၏ ဂျီ ၂၀ ဆောင်ပုဒ်ဖြစ်သည့် “ကမ္ဘာ တစ်ခု၊ မိသားစု တစ်စု၊ အနာဂတ် တစ်ခု” ဆိုသည့် ဆောင်ပုဒ် အတွက် စမ်းသပ်ချက်တစ်ခု ဖြစ်လာမည်ဖြစ်သည်။ အိန္ဒိယအနေဖြင့် ၎င်း၏ပြည်တွင်းရေးပြဿနာ များနှင့် အတူ သံတမန်ရေးရာ အကျိုးစီးပွားများကို ကျွမ်းကျင်ပိုင်နိုင်စွာ ကိုယ်တွင်ရန်လိုအပ်သည်ဟု ကျွမ်းကျင် သူများက ပြောကြားခဲ့သည်။

ဝန်ကြီးချုပ်မိုဒီကလည်း ကမ္ဘာတစ်ဝန်း ပရမ်းပတာအခြေအနေများနှင့် ကြုံတွေ့နေရချိန်တွင် အိန္ဒိယသည် ဂျီ ၂၀ ဥက္ကဋ္ဌ အဖြစ်တာဝန်ယူခဲ့ရသည်ဟု ဝန်ခံခဲ့သော်လည်း အိန္ဒိယအနေဖြင့် ပြဿနာကို ဖြေရှင်းသည့် အခန်းကဏ္ဍတွင် အဓိကနေရာမှ ပါဝင်သွားမည်ဟု ပြော ကြားခဲ့သည်။ “ကျွန်တော်တို့အနေနဲ့ ဂျီ ၂၀ ရဲ့ လုပ်ဆောင်ချက်တွေဟာ အတွေးအမြင်သစ်တွေကို ရရှိစေဖို့နဲ့ ပူးပေါင်းဆောင်ရွက်မှုတွေကို မြှင့်တင်ဖို့ ကမ္ဘာလုံးဆိုင်ရာ အဓိကလှုပ်ရှားသူအဖြစ် စိတ်ချသေချာစေဖို့ လုပ်ဆောင်သွားမှာပါ”ဟု မိုဒီက ပြီးခဲ့သည့်လတွင် အင်ဒိုနီးရှားနိုင်ငံ ဘာလီကျွန်းတွင်ပြုလုပ်ခဲ့သည့် ဂျီ ၂၀ ညီလာခံတွင် ပြောကြားခဲ့သည်။

အိန္ဒိယအနေဖြင့် ယင်းအစီအစဉ်အတိုင်း ဆက်လက်လုပ်ဆောင်မည် သို့မဟုတ် ပြည်ပအင်အားစုများကို မလွန်ဆန်နိုင်ဘဲ ယင်းအစီအစဉ်ကို ပယ်ဖျက်မည် ဟုတ်မဟုတ် ဆိုခြင်းကို စောင့်ကြည့်ရမည်ဟု နိုင်ငံတကာ လေ့လာရေးနှင့် မဟာဗျူဟာစင်တာမှ အမေရိကန်-အိန္ဒိယ မူဝါဒ လေ့လာရေးမှ ကျွမ်းကျင်သူ ၀ါဒါ ၀ါဒီ ချာယာနှင့် ၀ါရင့်ကျွမ်းကျင်သူ ရစ်ချက် အမ်ရော့ဆိုးက ပြောကြားခဲ့သည်။

“အခုချိန်မှာတော့ ယူကရိန်းကိုရုရှားရဲ့ ကျူးကျော်မှုနဲ့ ပတ်သက်ပြီး အိန္ဒိယရဲ့ ပျော့ပျောင်းတဲ့ ရပ်တည်ချက် အပေါ် ဖိအားတွေဟာ အနည်းငယ်လျော့ကျသွားပါပြီ။ COVID-19 ကပ်ရောဂါဟာလည်း အနည်းငယ် လျော့ကျ သွားပါပြီ။ ငွေကြေး ဖောင်းပွမှုကလွဲရင် အိန္ဒိယအနေနဲ့ သူ့ရဲ့ အစီအစဉ်အတိုင်း လုပ်ဆောင်နိုင် မယ့် အနေအထားဖြစ်နေပါတယ်”ဟု ရော့ဆိုးက CNA ၏ Asia First အစီအစဉ်ကို ပြောကြားခဲ့သည်။ “တကယ်လို့ သူတို့ (အိန္ဒိယ) အနေနဲ့ အဲဒီအခြေအနေတွေကို ထိန်းချုပ်နိုင်ပြီဆိုရင် ဒစ်ဂျစ်တယ်ကဏ္ဍ ဘက်ပေါင်းစုံပါဝင်မှုနဲ့ ပြည့်သူ့ဝန်ဆောင်မှုတွေကို ချဲ့ထွင်ပြီး အဲဒီအရာတွေဟာ သူတို့အတွက် ကမ္ဘာနဲ့ မျှဝေချင်တဲ့အရာတွေဖြစ်လိမ့်မယ်လို့ ကျွန်တော်ထင်ပါတယ်” ဟု ရော့ဆိုးက ပြောကြားခဲ့သည်။ အိန္ဒိယ အတွက် အကြီးမားဆုံး စိန်ခေါ်မှုများထဲမှ တစ်ခုမှာ ယူကရိန်းပဋိပက္ခကို အရှိန်လျှော့ချနိုင်ရေးနှင့် ယင်းပဋိပက္ခအပေါ် အများသဘောဆန္ဒတစ်ခု ထူထောင်ရေးဖြစ်သည်။

အဘယ်ကြောင့်ဆိုသော် အိန္ဒိယသည် ရုရှားနှင့် သမိုင်းဝင် ဆက်ဆံရေးရှိနေပြီး အနောက်နိုင်ငံများနှင့် လည်း ထိတွေ့ဆက်ဆံမှုများကို ဆက်လက်လုပ်ဆောင်နေသည်။ ထို့ကြောင့် ယူကရိန်းပဋိပက္ခတွင် အိန္ဒိယ၏ အခန်းကဏ္ဍကို ကမ္ဘာ့နိုင်ငံများက စောင့်ကြည့်နေပြီး ယင်းအခြေအနေသည် အောင်မြင်သည့် အစည်းအဝေးတစ်ခုဖြစ်မြောက်စေရန် အဓိကကျသည့် အခန်းကဏ္ဍတစ်ခု ဖြစ်လာနိုင်သည်။ “အိန္ဒိယ နိုင်ငံဟာ ရုရှားကိုယ်စားလှယ်တွေအတွက် ဥရောပသမဂ္ဂ၊ အမေရိကန်တို့နဲ့ အတူယှဉ်တွဲပြီး အစည်းအဝေး ထိုင်နိုင်မယ့် နေရာတစ်ခုဖြစ်လိမ့်မယ်လို့ ယူဆလို့ရပါတယ်။ ပြီးတော့ အိန္ဒိယဟာ ရုရှားနဲ့ အနောက်နိုင်ငံ တွေအကြား အနာဂတ်အတွက် ဟန်ချက်ညီမှုကို ရှာဖွေဖို့ ကြိုးပမ်းနိုင်မယ့် နေရာတစ်ခုဖြစ်နိုင်ပါတယ်။ အဲဒီလိုအခြေအနေမျိုးကို ဥရောပ၊ အမေရိကန်နဲ့ တရုတ်နိုင်ငံတွေတောင် မလုပ်ဆောင်နိုင်ပါဘူး”ဟု အိန္ဒိယကျွမ်းကျင်သူ ရူဒရာ ချန်ဒူရီက ပြောကြားခဲ့သည်။