COVID-19 ရောဂါဆိုင်ရာ ကန့်သတ်ချက်များအပေါ် ပြီးခဲ့သည့် သီတင်းပတ်ကုန်က ဆန္ဒပြမှုများ ဖြစ်ပွားမှုအတွင်း ပါဝင်ခဲ့သူအချို့ကို တရုတ်အာဏာပိုင်များက စုံစမ်းစစ်ဆေးမှုများ စတင်လုပ်ဆောင်နေကြောင်း ပေကျင်းမြို့ ဆန္ဒပြပွဲများတွင် ပါဝင်ခဲ့သူသုံးဦးက ရိုက်တာသတင်းဌာနသို့ ပြောကြားခဲ့သည်။ ပေကျင်းတွင် ဖြစ်ပွားခဲ့သော ဖြစ်စဉ်၌ သူ့ကိုယ်သူ ရဲအရာရှိဟုဆိုသောလူတစ်ဦးက ဆန္ဒပြတစ်ဦးအား နိုဝင်ဘာ ၂၇ ရက်ညပိုင်းက ၎င်း၏လှုပ်ရှားမှုများအကြောင်း မှတ်တမ်းရေးသား၍ ရဲစခန်းသို့လာရောက်ပေးပို့ရန် ပြောကြားခဲ့သည်ဟု သိရသည်။
အီတလီနိုင်ငံတောင်ပိုင်းရှိ အစ်ရှီယာကျွန်းတွင် မြေပြိုမှုဖြစ်ပွားပြီးနောက် လူခုနစ်ဦးထက်မနည်း သေဆုံးကာ လူအချို့ ပျောက်ဆုံးနေပြီး နိုဝင်ဘာ ၂၇ ရက်က အဆိုပါကျွန်းတွင် အရေးပေါ်အခြေအနေ ကြေညာခဲ့သည်ဟု သိရသည်။ နိုဝင်ဘာ ၂၆ ရက် နံနက်ပိုင်းက မြို့ငယ်လေးတစ်မြို့သည့် Casamicciola တွင် ရွှံ့ညွှန်များနှင့် အပျက်အစီးဖြင့် ဖုံးလွှမ်းနေခဲ့ပြီး ကားများသည်လည်း ပင်လယ်ရှိရာသို့ မျောပါသွားခဲ့သည်ဟု ဒေသတွင်းမီဒီယာနှင့် အရေးပေါ်ကယ်ဆယ်ရေးအဖွဲ့များက ဆိုသည်။
ဥရောပသမဂ္ဂ(အီးယူ)နိုင်ငံများမှ အဓိကအထူးပြုနယ်ပယ်များတွင် ခန့်မှန်းခြေဆရာဝန်လိုအပ်မှု ၄၀၀၀ ရှိနေခြင်း နှင့်တူ ဘရစ်ဇစ်က ဗြိတိန်တွင် ဆရာဝန်လိုအပ်ချက်ကို ပိုမိုဆိုးရွားစေခဲ့သည်ဟု နိုဝင်ဘာ ၂၇ ရက်တွင် ထုတ်ပြန် ခဲ့သော လေ့လာချက်တစ်ခု၌ ဖော်ပြထားသည်။ ကိုရိုနာဗိုင်းရပ်စ်ကူးစက် ရောဂါကြောင့် ဆေးရုံအချို့တွင် တက်ရောက်ကုသရန် စံတင်စောင့်ဆိုင်းစာရင်းများပြားနေခြင်းနှင့် ဆရာဝန်များနှင့်သူနာပြုများ ပြတ်လပ်နေခြင်း တို့နှင့်တူ နှစ်ပေါင်းများစွာ ဘဏ္ဍာရေးထောက်ပံ့မှု လျော့နည်းနေခဲ့ပြီးနောက် အစိုးရအထောက်ပံ့ခံကျန်းမာရေး ဌာနဖြစ်သည့် အကျပ်အတည်းဖြစ်ပေါ်နေသော ကျန်းမာရေးဝန်ကြီးဌာန ရုန်းကန်နေရချိန်တွင် ယခုလေ့လာချက် ထွက်ပေါ်လာခြင်းဖြစ်သည်။
မကြာသေးမီက ရုရှားတို့ထိန်းချုပ်မှု အောက်မှ လွတ်မြောက်ခဲ့သည့် ခါဆန်မြို့ တွင်နေထိုင်သည့် ယူကရိန်း အမျိုးသားတစ် ဦးဖြစ်သူ အန်ဒရီ ကရီဗော့သည် လူသားတစ် ဦးသေဆုံးပြီးနောက် ကြုံတွေ့ရဖွယ်ရှိသည့် နောက်ဘဝအကြောင်းကို တစိမ့်စိမ့်တွေးဆ နေပြီး သူနှင့်အတူ သားသမီးသုံးယောက် မွေးဖွားခဲ့သည့် သူနာပြု မိန်းကလေးနှင့် လက်ထပ်ပွဲတွင် ခင်ပွန်းဖြစ်သူ စောင့်ထိန်းရမည့် ကတိသစ္စာစကားများကို တီးတိုးရေရွတ်နေသည်။
လေထုညစ်ညမ်းစေသောအမှုန်များက ၂၀၂၀ ခုနှစ်တွင် ဥရောပသမဂ္ဂ၌ အချိန်မတိုင်မီ သေဆုံးသူ ၂၃၈,၀၀၀ ရှိစေခဲ့သည်ဟု ဥရောပသမဂ္ဂ(အီးယူ)၏ သဘာဝပတ်ဝန်းကျင်ဆိုင်ရာစောင့်ကြည့်ရေးအေဂျင်စီကနိုဝင်ဘာ ၂၄ ရက် တွင် ထုတ်ပြန်လိုက်ပြီး ထိုအရေအတွက်သည် ယခင်နှစ်ကထက် အနည်း ငယ်များလာခြင်းဖြစ်သည်ဟု ဆိုသည်။ “အဲ့ဒီနှစ်မှာ အီးယူအဖွဲ့ဝင် ၂၇ နိုင်ငံမှာ ၂၀၂၁ ခုနှစ် ကမ္ဘာ့ကျန်းမာရေးအဖွဲ့ (WHO) လမ်းညွှန်ချက် အဆင့်အထက် မှာရှိတဲ့ လေထုညစ်ညမ်းအမှုန်အမွှားတွေနဲ့ထိတွေမှုကြောင့် အချိန်မတိုင်မီ သေဆုံးသူ၂၃၈,၀၀၀ ရှိခဲ့ပါတယ်”ဟု ထုတ်ပြန်ချက်အသစ်တွင် ဥရောပပတ်ဝန်းကျင်အေဂျင်စီက ဖော်ပြခဲ့သည်။
ပါကစ္စတန်၏ နိုင်ငံပိုင်ရေနံကုမ္ပဏီ (PSO) ၏ ငွေပြန်လည်ရရှိနိုင်မှု အကျပ်အတည်းက စံချိန်တင် အမြင့်ဆုံးအတိုင်းအတာကို ရောက်ရှိနေပြီး အဆိုပါကုမ္ပဏီ၏ ရစရာရှိသည့် ကြွေးကျန်ပမာဏက ရူပီး ၆၂၁ ဒသမ ၁၆၈ ဘီလီယံအထိ မကြုံစဖူး ထိုးတက်နေကာ ပေးရန်ကျန်ရှိနေသည့် ငွေပမာဏကလည်း ရူပီး ၂၆၈ ဒသမ ၅ ဘီလီယံအထိ ရောက်ရှိနေသည်။ အဆိုပါ အခြေအနေကြောင့် ပါကစ္စတန် နိုင်ငံပိုင်ရေနံ ကုမ္ပဏီအနေဖြင့် မီးထိုးဆီနှင့် LNG သဘာဝဓာတ် ငွေ့ရည် တင်သွင်းမှုအတွက် ရူပီး ၂၁၈ ဒသမ ၅ ဘီလီယံ ပမာဏရှိသည့် ပေးစရာရှိသည့် ငွေကြေးများကို ပုံပေးနိုင်ခြင်း မရှိသည့် အခြေအနေကို ရောက်ရှိနေခဲ့ သည်။
ရုရှ၏ ကျူးကျော်စစ် စတင်ချိန်မှစပြီး ဗြိတိန်နိုင်ငံသည် ယူကရိန်းထံသို့ ပထမဆုံးအဖြစ် ရဟတ်ယာဉ်များ ပေးပို့မည်ဖြစ်ကြောင်း လန်ဒန်ရှိ ကာကွယ်ရေးဝန်ကြီးဌာနက ဗုဒ္ဓဟူးနေ့တွင် ပြောသည်။ “ဗြိတိန်မှ ယူကရိန်းထံ လှူဒါန်းသော ပထမဆုံး ရဟတ်ယာဉ်များ” အတွက် ယူကရိန်းစစ်မှုထမ်းနှင့် အင်ဂျင်နီယာ ဆယ်ဦးအဖွဲ့က ဗြိတိန်တွင် သီတင်းခြောက်ပတ်ကြာ လေ့ကျင့်သင်တန်းဆင်းနေကြောင်း ကာကွယ်ရေး ဝန်ကြီး ဌာနက ဆိုသည်။
ရက်ပ်အဆိုတော်ကာညေးဝက်စ်က နောင်လာမည့် ၂၀၂၄ သမ္မတရွေးကောက်ပွဲတွင် ဝင်ပြိုင်မည့်အကြောင်း အင်တာဗျူးတစ်ခုတွင် အတည်ပြုကြေညာသွားသည်။ Ye ဟု တရားဝင်နာမည်ပြောင်းထားသည့် ကာညေးဝက်စ်က ၎င်း၏ကြေညာမှုတွင် ရွေးကောက်ပွဲကမ်ပိန်း၌ ၎င်းကိုကူညီမည့်သူကိုလည်း မိတ်ဆက်ပေးခဲ့သည်။ ထိုအင်တာဗျူး တွင် ဝက်စ်က Ye 24 ဟုရိုက်နှိပ်ထားသည့် အကျႌကို ဝတ်ထားခဲ့သည်။ တွစ်တာလူမှုမီဒီယာကို အီလွန်မတ်စ်ဝယ်ယူ အုပ်ချုပ်လိုက်ပြီးနောက် မကြာမီကမှ ဝက်စ်၏တွစ်တာအကောင့်ပြန်ရထားပြီး အကောင့်ပြန်ရပြီးနောက် ဝက်စ်၏ အတည်ပြု ချက်ထွက်လာခြင်းဖြစ်သည်။ ဝက်စ်သည် အီလွန်မတ်စ်တွစ်တာကို လွှဲပြောင်းမယူမီက ဂျူးဆန့်ကျင်ရေး မှတ်ချက်များရေးခဲ့မှုကြောင့် တွစ်တာပေါ်လစီကိုချိုးဖောက်သူအဖြစ် အကောင့်ပိတ်ခံလိုက်ရသည်။
