တရုတ်၏ ဈေးဝယ်အက်ပ်ပလီကေးရှင်း Pinduoduo တွင် အန္တရာယ်ပြုနိုင်သော ဆော့ဖ်ဝဲထည့်သွင်းထားသည်ကို တွေ့ရှိပြီးနောက် Google က အက်ပ်စတိုးတွင် အဆိုပါအက်ပ်အား ဆိုင်းငံ့ထားလိုက်သည်။
လုံခြုံရေးစိုးရိမ်မှုများကြောင့် Google Play မှ Pinduoduo အက်ပ်ကို ဆိုင်းငံ့ထားကြောင်း Google က မတ်လ ၂၁ ရက် ထုတ်ပြန်ချက်တွင် ဖော်ပြထားသည်။
မြောက်ကိုရီးယားသည် ယနေ့နံနက်တွင် တာတိုပစ်ပဲ့ထိန်းဒုံးကျည်နှစ်စင်းအား အရှေ့ဘက်ကမ်းရိုးတန်းပင်လယ်သို့ ထပ်မံပစ်လွှတ်စမ်းသပ်ခဲ့ကြောင်း တောင်ကိုရီးယားစစ်တပ်က ပြောကြားခဲ့သည်။ မြောက်ကိုရီးယား၏ ယခုတစ်ကြိမ် ပစ်လွှတ်မှုသည် အမေရိကနှင့်တောင်ကိုရီးယားတို့၏ ပူးတွဲစစ်ရေးလေ့ကျင့်မှုအတွင်း နောက်ဆုံး အကြိမ် ပစ်လွှတ်မှုလည်းဖြစ်သည်။
အဆိုပါဒုံးကျည်နှစ်စင်းလုံးသည် ဂျပန်၏အထူးသီးသန့်စီးပွားရေးဇုန်အပြင်သို့ ကျရောက်သွားပုံပေါ်ကြောင်း ဂျပန်မီဒီယာများ၏ ဖော်ပြချက်အရသိရသည်။ တောင်ကိုရီးယားစစ်တပ်ကလည်း မြောက်ကိုရီးယား၏ ယခုလုပ်ရပ်အား ပြင်းထန်စွာရှုံ့ချသည်။
ရွှေ့ပြောင်းဝင်ရောက်သူများကြောင့် ကနေဒါနိုင်ငံရဲ့လူဦးရေမှာ တစ်သန်းကျော်အထိ ပိုများလာခဲ့ကြောင်း BBC သတင်းတစ်ရပ်က ဖော်ပြခဲ့ပါတယ်။ ပြီးခဲ့တဲ့ ၂၀၂၂ ခုနှစ် အတွင်း စစ်တမ်းများအရ ကနေဒါရဲ့ စုစုပေါင်းလူဦးရေ ၃၈ သန်းခွဲကနေ ၃၉ သန်းခွဲအထိ တိုးတက်လာခဲ့ကြောင်း ၊ ဒီပမာဏဟာ လူဦးရေတိုးတက်မှု ၂ ဒသမ ၇ ရာခိုင်နှုန်း ရှိခဲ့ပြီး ၁၉၅၇ ခုနှစ်နောက်ပိုင်း တစ်နှစ်တာအတွင်း လူဦးရေအများဆုံးတိုးတက်မှုဖြစ်ခဲ့ပါတယ်။
အခုလို လူဦးရေတိုးတက်လာမှုရဲ့အဓိကအကြောင်းရင်းတစ်ခုက ပြည်တွင်း အလုပ်သမားလိုအပ်ချက်ကြောင့် ပြည်ပရွှေ့ပြောင်းဝင်ရောက်သူတွေကို တရားဝင်နေထိုင်ခွင့်ပြုလိုက်တဲ့ ကနေဒါအစိုးရရဲ့ဆုံးဖြတ်ချက်ပဲဖြစ်ပါတယ်။ ကနေဒါအစိုးရက ထုတ်ပြန်တဲ့စာရင်းစစ်တမ်းတွေအရ လူဦးရေတိုးတက်မှုရဲ့ ၉၆ ရာခိုင်နှုန်းဟာ ရွှေ့ပြောင်း ဝင်ရောက်သူတွေကြောင့်ဖြစ်ကြောင်း သိရပါတယ်။ -Ref: BBC
မလေးရှားအစိုးရက သေဒဏ်ကို ဖျက်သိမ်းဖို့ စီစဉ်နေပါတယ်။ မူးယစ် မှောင်ခိုမှုကနေ လူသတ်မှုထိ ပြစ်မှုတွေကို ဘယ်လိုအပြစ်ပေးမလဲ တရားသူကြီးတွေအတွက် ဆုံးဖြတ်နိုင်ခွင့်ကို ဒီဥပဒေကြမ်းမှာ ဖော်ပြထားပါတယ်။
လက်နက်မှောင်ခိုမှုနဲ့ ပြန်ပေးဆွဲမှု လို ပြစ်မှုတွေမှာ ကြိုးပေးကွပ်မျက်တာကို ဒီဥပဒေနဲ့ ပယ်ဖျက်သွားမယ် ဆိုပြီး မလေးရှား ဥပဒေ ရေးရာ ဝန်ကြီး အဇာလီနာ သြသ်မန်း ဆိုက်က ပြောပါတယ်။ အဲဒီအစား ရာဇဝတ်ကောင်တွေကို ထောင် နှစ် ၄၀ ချတာနဲ့ ကြိမ်ဒဏ်ပေးတာတွေ လုပ်နိုင်ပါတယ်။ အကြမ်းဖက်မှုနဲ့ မလေးရှား မင်းမျိုးတွေကို ထိခိုက် အကြမ်းဖက်မှုလို ပြစ်မှုတွေမှာတော့ သေဒဏ် ပေးဖို့ တရားသူကြီးတွေကို ဆက်ခွင့်ပြုထားပါတယ်။
ဂျပန်ဝန်ကြီးချုပ် ကီရှီဒါ က အင်္ဂါနေ့မှာ ယူကရိန်းနိုင်ငံသို့ မကြေညာဘဲ ရုတ်တရက်သွားရောက်ခဲ့ပြီး ယူကရိန်း သမ္မတ ဗိုလိုဒီမာဇီလန်စကီး နဲ့ တွေ့ဆုံဆွေးနွေးခဲ့ကာ ယူကရိန်းအတွက် လက်နက်မဟုတ်တဲ့ အကူအညီတွေကို နေတိုးရဲ့ ရန်ပုံငွေအဖွဲ့တွေက တစ်ဆင့် ကန်ဒေါ်လာ သန်း ၃၀ ဖိုး အထိ ပေးအပ်သွားမယ်လို့ ကတိပြုပြောကြားပါတယ်။
၂၀၂၄ ခုနှစ်တွင် ကျင်းပမည့် ရုရှားသမ္မတရွေးကောက်ပွဲအတွက် ကြိုတင်ပြင်ဆင်ခြင်းတွင် ပါဝင်တာဝန်ထမ်းဆောင် ကြရမည့် ရုရှားအစိုးရအရာရှိများအနေဖြင့် iPhone သုံးစွဲခြင်းကို ရပ်တန့်ကြရန် ကရင်မ်လင် နန်းတော်မှ သတိပေးပြောကြားခဲ့ကြောင်း သိရသည်။
အဘယ်ကြောင့်ဆိုသော် ယင်းဖုန်းများသည် အနောက်နိုင်ငံ ထောက်လှမ်းရေးအဖွဲ့များက ချိတ်ဆက် ဝင်ရောက်နိုင်သဖြင့်ဟုဆိုကြောင်း မော်စကိုအခြေစိုက် Kommersant သတင်းစာကရေးသားဖော်ပြထားသည်။
အမေရိကန်ပြည်ထောင်စုကို တိုက်ထုတ်ဖို့နိုင်ငံသား ၁ ဒသမ ၄ သန်းလောက်ဟာ နိုင်ငံရဲ့စစ်တပ်မှာ စေတနာ အလျောက် ပါဝင်ဖို့ ဒါမှမဟုတ် စာရင်းသွင်းဖို့ ဆန္ဒရှိနေတယ်လို့ မြောက်ကိုရီးယားနိုင်ငံပိုင် မီဒီယာက မတ် ၂၀ ရက်မှာ ထုတ်ပြန်ပါတယ်။
နယ်ချဲ့အမေရိကန်တွေကို တန်ပြန်ဖို့ နိုင်ငံတဝန်း စစ်မှုထမ်းဖို့၊ စာရင်းသွင်းဖို့ မြောက်ကိုရီးယားလူငယ်တွေ လက်မှတ်ထိုးနေတဲ့ ဗီဒီယိုကို မြောက်ကိုရီးယားရဲ့ အစိုးရပိုင် ရုပ်မြင်သံကြားက ထုတ်လွှင့်ခဲ့ပါတယ်။
ထိုင်းနိုင်ငံ၏ အထွေထွေရွေးကောက်ပွဲ ကို မေလ ၁၄ ရက်တွင် ကျင်းပသွားမည်ဖြစ်ကြောင်း အာဏာပိုင်များက မတ်လ ၂၁ ရက်တွင် အတည်ပြုခဲ့သည်။
ပြဿနာပတ်လည်ဝိုင်းနေသည့် ဝန်ကြီးချုပ် ပရာယွတ်ချန်အိုချာသည် စစ်တပ်၏ ကျောထောက်နောက်ခံပြုမှုဖြင့် ဆယ်စုနှစ်တစ်ခုနီးပါး တိုင်းပြည်အာဏာချုပ်ကိုင်ထားမှုကို ထပ်မံသက်တမ်းတိုးနိုင်ရန် ကြိုးပမ်းနေသည်။
ဖေဖော်ဝါရီတွင် ဘေဂျင်းက ကြေညာခဲ့သည့် ငြိမ်းချမ်းရေးအစီအစဉ်အရ မော်စကိုနှင့် ကိယက်ဗ်တို့ကြား ပြန်လည်ညှိနှိုင်းဆွေးနွေး ဖျန်ဖြေပေးဖို့အတွက် တရုတ်သမ္မတ ရှီကျင့်ဖျင်သည်သမ္မတ ဗလာဒီမာပူတင်နှင့် တွေ့ဆုံရန် ရုရှားနိုင်ငံသို့ တနင်္လာနေ့က ရောက်ရှိခဲ့သည်။
