မနေ့က ကျင်းပခဲ့တဲ့ အော်စကာဆုပေးပွဲမှာ “The Elephant Whisperers” ဆိုတဲ့ အိန္ဒိယရုပ်ရှင်ကားဟာ အကောင်းဆုံး မော်ကွန်း ရုပ်ရှင် ဇာတ်ကားတိုဆုကို ဆွတ်ခူးပြီး အိန္ဒိယရုပ်ရှင်လောကအတွက် သမိုင်းသစ်ရေးထိုးပေးခဲ့ပါတယ်။
ဒါကြောင့် အဲဒီရုပ်ရှင်ကားကို ရိုက်ကူးခဲ့တဲ့ တမီးလ် နဒူး ပြည်နယ်က တဲလ်ပက်ကဒူ ဆိုတဲ့ ဆင်စခန်းကို ကမ္ဘာလှည့်ခရီးသည်တွေ အများအပြား သွားရောက်လည်ပတ်နေတယ်လို့ သိရပါတယ်။
အမေရိကန်လူမှုကွန်ယက် Facebook ရဲ့မိခင်ကုမ္ပဏီကြီးဖြစ်တဲ့ Meta က ဝန်ထမ်း ၁ သောင်းလျှော့မယ်လို့ အင်္ဂါနေ့မှာကြေညာပါတယ်။ ပြီးခဲ့တဲ့ ၄ လကပဲ Meta ကုမ္ပဏီက ဝန်ထမ်း ၁၁,၀၀၀ လျှော့ချခဲ့တဲ့အတွက် ဒါဟာ နည်းပညာကုမ္ပဏီကြီးတခုက ဒုတိယအကျော့ ဝန်ထမ်းတွေအကြီးအကျယ်လျှော့ချမယ့်အကြောင်း ပထမဆုံး ကြေညာလိုက်တာလည်းဖြစ်ပါတယ်။
တရုတ်နိုင်ငံမှာ ကိုဗစ်ကပ်ရောဂါ ထိန်းချုပ်ရေး ၃ နှစ်ကြာ ချမှတ်ထားတဲ့ ကန့်သတ်ချက်တွေကို ဖယ်ရှားလိုက်ပြီး ဗုဒ္ဓဟူးနေ့ကစလို့ ပြည်ပခရီးသွားတွေအတွက် ပြည်ဝင်ခွင့်ဗီဇာ အမျိုးအစား အားလုံးကို ပြန်ထုတ်ပေးပြီး၊ နယ်စပ်တွေ အားလုံးကိုလည်း ဖွင့်ပေးတော့မယ်လို့ ပြောလိုက်ပါတယ်။ ကပ်ရောဂါ မတိုင်ခင်က ဗီဇာမလိုပဲ သွားခွင့်ရှိတဲ့ တရုတ်ဆိပ်ကမ်းမြို့ဖြစ်တဲ့ ရှန်ဟိုင်းကိုဝင်ရောက်လာတဲ့ အပျော်စီး သင်္ဘောတွေနဲ့ ဟိုင်နန်ကျွန်းတို့လို နေရာတွေမှာ အရင်လို ဗီဇာမလိုဘဲ ဝင်ရောက်ခွင့်ပြုမှာ ဖြစ်ကြောင်းလည်း တရုတ်အစိုးရက ပြောပါတယ်။
အမေရိကနှင့်တောင်ကိုရီးယားတို့စစ်ရေးလေ့ကျင့်မှုစတင်ချိန်၌ မြောက်ကိုရီးယားဘက်မှ ရေငုပ်သင်္ဘောမှ မဟာဗျူဟာမြောက်ခရုဇ်ဒုံးကျည်နှစ်စင်းအား စမ်းသပ်ပစ်လွှတ်ခဲ့ကြောင်း နိုင်ငံပိုင်သတင်းဌာန KCNA ကဖော်ပြခဲ့သည်။
“မဟာဗျူဟာ” ဟူသောစကားလုံးအား များသောအားဖြင့် နျူစွမ်းရည်ရှိသောလက်နက်များအတွက် အသုံးပြုခြင်း ဖြစ်သည်ဟုလည်း ဖော်ပြထားပြီး အဆိုပါစမ်းသပ်ပစ်လွှတ်မှုမှ ၎င်းတို့၏ ယုံကြည်စိတ်ချရမှုအား အတည်ပြုခဲ့ခြင်း ဖြစ်သည်ဟုလည်းဆိုသည်။
အဆိုပါဒုံးကျည်၏ အသေးစိတ်အချက်အလက်များအား ခွဲခြမ်းစိတ်ဖြာ လေ့လာနိုင်ရန်အတွက် တောင်ကိုရီးယား ထောက်လှမ်းရေးအေဂျင်စီအနေဖြင့် အမေရိကနှင့်ပူးပေါင်းဆောင်ရွက်နေပြီး စစ်ရေးအရအထူးသတိထား နေရသည်ဟုလည်း ပူးတွဲစစ်ဦးစီးချုပ်ကပြောကြားခဲ့သည်။
နိုင်ငံအနီးမှာ စစ်ရေးလေ့ကျင့်တာတွေကို စစ်ကြေညာခြင်းအဖြစ် ရှုမြင်နိုင်တယ်လို့ မြောက်ကိုရီးယားက သတိပေးခဲ့ပြီးနောက်မှာပဲ တောင်ကိုရီးယားနဲ့ အမေရိကန်တို့က ငါးနှစ်အတွင်း အကြီးမားဆုံး စစ်ရေးလေ့ကျင့်မှုကို စတင်လိုက်ပါတယ်။
မကြာသေးခင်လတွေမှာ ပိတ်ပင်ထားတဲ့ လက်နက်စမ်းသပ်မှုတွေကို ဆက်တိုက် လုပ်ဆောင်ခဲ့တဲ့ မြောက်ကိုရီးယားဆီက ခြိမ်းခြောက်ပြောဆိုတာတွေ များလာနေချိန်မှာပဲ အမေရိကန် နဲ့ တောင်ကိုရီးယားက ကာကွယ်ရေးပူးပေါင်းဆောင်ရွက်မှုတွေကို တိုးမြှင့်လုပ်ဆောင်နေပါတယ်။
ဆော်ဒီ ရေနံကုမ္ပဏီကြီး Aramco ဟာ စွမ်းအင်ဈေးနှုန်းမြှင့်တက်လာမှုနဲ့ ဝယ်လိုအားပမာဏများလာမှုတွေ ကြောင့် ၂၀၂၂ ခုနှစ်မှာ စံချိန်တင်အမြတ်ငွေ အမေရိကန်ဒေါ်လာ ၁၆၁.၁ ဘီလီယံအထိရရှိခဲ့တယ်လို့ တနင်္ဂနွေ နေ့က ထုတ်ပြန်ပါတယ်။ ဒါဟာ ပြီးခဲ့တဲ့ ၂၀၂၁ ခုနှစ်ကနဲ့ယှဉ်ရင် နိုင်ငံပိုင်ကုမ္ပဏီအတွက် အမြတ်ငွေ ၄၆.၅ ရာခိုင်နှုန်း မြင့်တက်လာတာဖြစ်ပါတယ်။
စစ်ရေးတိုက်ခိုက်မှုတွေကို ဟန့်တားနိုင်မယ့် အရေးကြီးတဲ့ လက်တွေ့အစီအမံတွေကို ဆောင်ရွက်ဖို့ မြောက်ကိုရီးယားက ဆုံးဖြတ်လိုက်ကြောင်း နိုင်ငံပိုင်သတင်းကနေ တနင်္ဂနွေမှာ ကြေညာလိုက်ပါတယ်။ အမေရိကန်နဲ့ တောင်ကိုရီးယားတို့ရဲ့ ၅ နှစ်အတွင်း အကြီးမားဆုံး ပူးတွဲစစ်ရေးလေ့ကျင့်မှုမစခင် တရက်အလိုမှာပဲ၊ အခုလို ပြောလိုက်တာပါ။ ဒီဆုံးဖြတ်ချက်ကိုတော့ မြောက်ကိုရီးယားခေါင်းဆောင် ကင်ဂျုံအွန်း ဦးဆောင်တဲ့ အာဏာရပါတီရဲ့ စစ်ကော်မရှင်အစည်းအဝေးတွင်းမှာ ချမှတ်လိုက်တာဖြစ်တယ်လို့ မြောက်ကိုရီးယားအစိုးရပိုင် KCNA သတင်းက ပြောပါတယ်။
ထိုင်းနိုင်ငံမြို့တော် ဘန်ကောက်မြို့မှာ လက်တလော ဖုံးလွှမ်းနေတဲ့ လေထု ညစ်ညမ်းမှု အန္တရာယ်ရှိတဲ့ အဆင့်တွေဟာ မလျော့ကျဘူးဆိုရင် ဘန်ကောက်မြို့မှာ နေထိုင်သူတွေဟာ အိမ်ကနေပဲ အလုပ်လုပ်ကြဖို့ ညွှန်ကြားခံရနိုင်ပါတယ်။ ကလေးတွေနဲ့ ကိုယ်ဝန်သည် အမျိုးသမီးတွေကိုတော့ အိမ်ထဲမှာပဲ နေကြဖို့ ညွှန်ကြားထားပြီး အပြင် ထွက်ကြသူတိုင်း နှာခေါင်းစည်း တပ်ကြဖို့ကိုလည်း တိုက်တွန်းထားပါတယ်။
ဘဏ္ဍာရေးအကျပ်အတည်းကြုံတွေ့နေရတဲ့ Silicon Valley Bank ကို ပြည်ထောင်စုအစိုးရအနေနဲ့ ငွေကြေး ကျားကန်ထောက်ပံ့ပေးမှာမဟုတ်ဘူးလို့ အမေရိကန်ဘဏ္ဍာရေးဝန်ကြီး Janet Yellen က ပြောပါတယ်။ ဒါပေမယ့်လည်း စုငွေတွေဆုံးရှုံးမလားဆိုပြီး စိတ်ပူနေသူတွေအတွက်တော့ ကူညီဆောင်ရွက်ပေးမယ်လို့ ပြောပါတယ်။
အမေရိကန်ပြည်ထောင်စုဟာ အမေရိကန်ဒေါ်လာ ၂၅ သန်းကျော် တန်ဖိုးရှိတဲ့ ရုရှားရေနံကုမ္ပဏီ Rosneft ပိုင် ဘိုးအင်းလေယာဉ်ကို သိမ်းယူဖို့ မတ်လ ၈ ရက်က ဝရမ်းတခု ရရှိခဲ့ကြောင်း အမေရိကန် တရားရေးဌာနက ပြောပါတယ်။
နယူးယောက်အရှေ့ပိုင်းခရိုင်အတွက် အမေရိကန်ခရိုင်တရားရုံးကနေ ပို့ကုန်ထိန်းချုပ်မှု ချိုးဖောက်မှုတွေနဲ့ ရုရှားအပေါ် ပိတ်ဆို့အရေးယူမှုတွေအပေါ် အခြေခံပြီး သိမ်းဆည်းမှုကို ခွင့်ပြုခဲ့တာ ဖြစ်ပါတယ်။
