စပိန်ထိပ်သီးကလပ် ဘာစီလိုနာအသင်းသည် ယခုရာသီ ချန်ပီယံလိဂ်ပြိုင်ပွဲတွင် အုပ်စုအဆင့်မှ ထွက်ခွာခဲ့ရ ပြီးနောက် (၂၄)နှစ်အတွင်း အသင်းသမိုင်း၏ မှတ်တမ်းဆိုးတစ်ခုကို ပထမဆုံးအကြိမ် ပြန်လည်ကြုံတွေ့ခဲ့ရကြောင်း သိရသည်။ ဘာစီလိုနာအသင်းသည် ယခုရာသီအပါဝင် ချန်ပီယံလိဂ် အုပ်စုအဆင့်မှ (၂)ရာသီဆက်တိုက် ထွက်ခွာခဲ့ရခြင်းဖြစ်ခဲ့ပြီး နည်းပြဟောင်း ဗန်ဟားလ်လက်ထက် ၁၉၉၇-၉၈၊ ၁၉၉၈-၉၉ ရာသီ (၂)ရာသီဆက်တိုက် အုပ်စုမှထွက်ခဲ့ရပြီးနောက်ပိုင်း ယင်းမှတ်တမ်းဆိုးကို တစ်ကျော့ပြန်ကြုံတွေ့ခဲ့ခြင်းဖြစ်သည်။
စပိန်တင်းနစ်သမား ရာဖေးနာဒယ်ဟာ လာမယ့်တစ်ပတ်ထဲမှာကျင်းပမယ့် ပဲရစ်မာစတာပြိုင်ပွဲမှာ ဝင်ရောက် ယှဉ်ပြိုင်မှာဖြစ်တယ်လို့ နည်းပြဖြစ်သူ ကားလို့စ်မိုရာက အတည်ပြုခဲ့ပါတယ်။ နာဒယ်ဟာ အခုနှစ်အတွင်း ဒဏ်ရာတွေနဲ့ နပမ်းလုံးနေခဲ့ရပြီး ပြိုင်ပွဲတချို့မှာဆိုရင် နာကျင်မှုကိုသက်သာစေတဲ့ ထိုးဆေးတွေထိုးပြီး ပြိုင်ပွဲ ဝင်ခဲ့ရတယ်လို့ သိရပါတယ်။
အောက်တိုဘာလ ၂၄ ရက်က လိဂ်ချန် ပီယံရှစ်ကလပ် မစ်ဒယ်ဘရော့အသင်း၏ နည်းပြသစ်အဖြစ် ခန့်အပ်ခံရသည့် မိုက်ကယ်ကာရစ်က ယခုရာထူးသည် မိမိအတွက် အထူးအခွင့်အရေးတစ်ရပ်ဖြစ်သည်ဟု ပြောကြားခဲ့သည်။
လိဂ်ချန်ပီယံရှစ်ပြိုင်ပွဲတွင် ရုန်းကန်နေရသည့် မစ်ဒယ်ဘရော့အသင်းသည် မန်ယူ နှင့် အင်္ဂလန်ကစားသမားဟောင်း ကာရစ်ကို နည်းပြသစ်အဖြစ် ခန့်အပ်ခဲ့သော်လည်း စာချုပ်သက်တမ်းကာလကို တရားဝင်ထုတ်ပြန်ခြင်းမရှိကြောင်း သိရသည်။
One Championship အဖွဲ့အစည်းက နိုဝင်ဘာ ၁၉ ရက်က စင်ကာပူနိုင်ငံ၌ကျင်းပမည့် One 163 အမည်ရပြိုင်ပွဲတွင် တွဲဆိုင်း ငါးပွဲ ထည့်သွင်းကျင်းပမည်ဖြစ်ပြီး အောင်လအန်ဆန်နှင့် အိုကာမီတို့၏တွဲဆိုင်းကို Co Main Event အဖြစ် ပြုလုပ်သွားမည်ဖြစ် ကြောင်း သိရသည်။
အမေရိကန်တင်းနစ်မယ် ဂျက်ဆီကာပီဂူလာဟာ သူမရဲ့ ကစားသမားဘဝ ပထမဆုံး WTA 1000 ပြိုင်ပွဲ ချန်ပီယံဆုအဖြစ် ဂွါဒါလာဂျာရာအိုးပင်းဆုကိုရယူခဲ့ပါတယ်။ တနင်္ဂနွေနေ့က ယှဉ်ပြိုင်ခဲ့တဲ့ ဗိုလ်လုပွဲမှာ ပီဂူလာနဲ့ ဂရိတင်းနစ်မယ် ဆက်ကာရီတို့ ရင်ဆိုင်ခဲ့ကြတာဖြစ်ပြီး ပီဂူလာက အကောင်းဆုံးလက်စွမ်းနဲ့ ပြိုင်ဘက်ကို ဖိအားပေးနိုင်ခဲ့ပါတယ်။ ဒါ့ကြောင့်လည်း ပွဲကစားချိန် ၁ နာရီနဲ့ ၁၀ မိနစ်သာကြာမြင့်ခဲ့ပြီး နောက် ပီဂူလာက (၆း၂၊၆း၃)ဆိုတဲ့ရလဒ်နဲ့ ဆက်ကာရီကိုအနိုင်ယူပြီး ချန်ပီယံဆုကိုရရှိသွားခဲ့တာ ဖြစ်ပါတယ်။
လက်စတာအသင်းနည်းပြ ဘရန်ဒန်ရော်ဂျာက ပရီးမီးယားလိဂ်ရဲ့မှတ်တမ်းသစ်တစ်ခုကို ရေးထိုးနိုင်ခဲ့တဲ့ တိုက်စစ်မှူးဗာဒီကို ချီးကျူးစကားဆိုခဲ့ပါတယ်။ အသက် ၃၅ နှစ်ရှိပြီဖြစ်တဲ့ ဗာဒီဟာ တနင်္ဂနွေနေ့က ဝူလ်ဗာဟမ်တန်အသင်းကို ၄ ဂိုးပြတ်အနိုင်ရတဲ့ပွဲမှာ လူစားဝင်လာပြီး အဆုံးသတ်အနိုင်ဂိုးကို သွင်းယူနိုင်ခဲ့တာပါ။
ပြီးခဲ့တဲ့ရက်ပိုင်းက ကမ္ဘာ့အကောင်းဆုံးဘောလုံးသမားဆု ဘလွန်းဒီအော် (Ballon d’Or) ကို ဆွတ်ခူးခဲ့တဲ့ ရီးရဲလ်မက်ဒရစ်တိုက်စစ်မှူး ဘင်ဇီမာဟာ ပြင်သစ်နိုင်ငံရဲ့ထာဝရအကြီးကျယ်ဆုံးကစားသမားဖြစ်ကြောင်း ဂန္ထဝင်ဇီဒန်းက ထုတ်ဖော်ချီးကျူးခဲ့ပါတယ်။
ဘင်ဇီမာဟာ ပြီးခဲ့တဲ့ဘောလုံးရာသီက ရီးရဲလ်မက်ဒရစ်အတွက် ပြိုင်ပွဲစုံ ၄၄ ဂိုးသွင်းယူပြီးခြေစွမ်းပြခဲ့တာကြောင့် ဘလွန်းဒီအော်ဆုကို ပထမဆုံးအကြိမ်ဆွတ်ခူးနိုင်ခဲ့ပါတယ်။
ပြင်သစ်လက်ရွေးစင်ဟောင်းဖြစ်သလို ရီးရဲလ်မက်ဒရစ်နည်းပြဟောင်းလည်းဖြစ်တဲ့ ဇီဒန်းက “ပြင်သစ်ဘောလုံး သမိုင်းတလျောက် အကောင်းဆုံးကစားသမားကိုပြပါဆိုရင် တစ်ဦးနဲ့တစ်ဦးအမြင်ချင်းမတူနိုင်ပါဘူး။ ကျွန်တော့် အမြင်ကတော့ ဘင်ဇီမာက အကောင်းဆုံးပါပဲ”လို့ ပြေကြားခဲ့ပါတယ်။
မန်ယူအသင်း၏နည်းပြ တန်ဟက်ဂ်သည် စပါးအသင်းကို အနိုင်ရခဲ့သည့်ပွဲတွင် လူစားဝင်ကစားရန် ငြင်းဆန်ခဲ့ပြီး ပွဲမပြီးဆုံးမီ အရန်ခုံတန်းမှ ထွက်ခွာသွားခဲ့သည့် ၀ါရင့်တိုက်စစ်မှူး စီရော်နယ်လ်ဒိုကို ချယ်လ်ဆီးနှင့်ပွဲ လူစာရင်းမှ ချန်လှပ်လိုက်ကြောင်း သိရသည်။
စီရော်နယ်လ်ဒို၏ လုပ်ရပ်နှင့်ပတ်သက်ပြီး မီဒီယာများ၏ ပွဲအပြီး မေးမြန်းမှုများအပေါ် အဲရစ်တန်ဟက်ဂ်က ယခုအချိန်တွင် စပါးအသင်းကို အနိုင်ရရှိခဲ့ခြင်းနှင့် ယင်းပွဲတွင်ပြသခဲ့သည့် စွမ်းဆောင်ရည်အတွက် ကျေနပ် ပျော်ရွှင်နေကြောင်း၊ စီရော်နယ်လ်ဒို၏ လုပ်ရပ်အတွက် နောက်နေ့မှ ဆွေးနွေးအဖြေရှာသွားမည်ဖြစ်ကြောင်း ပြောကြားခဲ့ပြီးနောက် ကြာသပတေးနေ့တွင် ၎င်း၏ ဆုံးဖြတ်ချက်အား မန်ယူအသင်းက အတည်ပြု ကြေညာခဲ့ခြင်းဖြစ်သည်။
အောက်တိုဘာလ ၁ ရက်က ယှဉ်ပြိုင်ကစားသည့် အင်ဒိုနီးရှားဘောလုံးလိဂ်တွင်ပွဲအပြီး ရုန်းရင်းဆန်ခတ် ဖြစ်ပွားမှုကြောင့် လူပေါင်း အနည်းဆုံး ၁၃၁ ဦး သေဆုံးခဲ့ပြီး ရာနှင့်ချီဒဏ်ရာရရှိခဲ့သည့် Kanjuruhan ကွင်းကို ဖြိုချပြီး ပြန်လည်တည်ဆောက်သွားမည်ဟု အင်ဒိုနီးရှားသမ္မတ ဂျိုကိုဝီဒိုဒိုက အတည်ပြုကြေညာခဲ့သည်။
မုဒိမ်းမှု ကျူးလွန်ရန် ကြံစည်အားထုတ်မှုဖြင့် အမှုရင်ဆိုင်နေရသည့် မန်ယူအသင်းမှ အင်္ဂလန်တိုက်စစ်မှူး ဂရင်းဝုဒ်သည် အာမခံဖြင့် ဖမ်းဆီးထိန်းသိမ်းခံရမှုမှ ပြန်လည်လွတ်မြောက်လာကြောင်း သိရှိရသည်။
အသက် (၂၁) နှစ်အရွယ်ရှိ ဂရင်းဝုဒ်သည် ၂၀၂၁ အောက်တိုဘာလအတွင်းက ဆယ်ကျော်သက် အမျိုးသမီးတစ်ဦးကို မုဒိမ်းမှုကျူးလွန်ရန် ကြံစည်အားထုတ်မှုကြောင့် ဖမ်းဆီးခံခဲ့သည့်အပြင် ကိုယ်ထိလက်ရောက်ကျူးလွန်မှု၊ အတင်းအကျပ်စေခိုင်းမှု စသည့်စွဲချက်များနှင့်ပါ အမှုရင်ဆိုင်နေရခြင်းဖြစ်သည်။
