ဗီလာရီးယဲလ်အားရှုံးနိမ့်သည့်ပွဲတွင်စပိန်ကစားသမားမပါသည့်လူစာရင်းကိုအသုံးပြုခဲ့ခြင်းအတွက်အန်ဆယ်လော့တီ ရှင်းလင်း
ရီးယဲလ်မက်ဒရစ်အသင်းနည်းပြ အန်ဆယ်လော့တီက ဗီလာရီးယဲလ်အသင်းအား ရှုံးနိမ့်သည့်ပွဲတွင် စပိန်ကစား သမားမပါဝင်သည့် ပွဲထွက်လူစာရင်းကို အသုံးပြုခဲ့ခြင်းမှာ တမင်တကာ မဟုတ်ဘဲ တိုက်ဆိုင်မှုသာဖြစ်ကြောင်း ရှင်းလင်းပြောကြားခဲ့သည်။ ဇန်နဝါရီ (၇)ရက်က ကစားခဲ့သည့် လာလီဂါပွဲစဉ် (၁၆) ဗီလာရီးယဲလ် (၂-၁) ရီးယဲလ်မက်ဒရစ်ပွဲတွင် ရီးယဲလ်မက်ဒရစ်နည်းပြ အန်ဆယ်လော့တီသည် စပိန်ကစားသမား မပါဝင်သည့်ပွဲထွက် လူစာရင်းကို အသုံးပြုခဲ့ခြင်းဖြစ်သည်။
အဆိုပါပွဲစဉ်တွင် ၄-၃-၃ ပုံစံဖြင့် ကစားခဲ့သည့် ရီးယဲလ်အသင်း၏ ပွဲထွက်စာရင်း၌ ဂိုးသမား- ကော်တိုအာ (ဘယ်လ်ဂျီယံ)၊ နောက်တန်း – အလာဘာ (သြစတြီးယား)၊ ရူဒီဂါ (ဂျာမနီ)၊ ဖာလန်းမန်ဒီ (ပြင်သစ်)၊ မီလီတို (ဘရာဇီးလ်)၊ အလယ်တန်း – မိုဒရစ် (ခရိုအေးရှား)၊ တိုနီကရို့စ် (ဂျာမနီ)၊ ချူယာမန်နီ (ပြင်သစ်)၊ ရှေ့ တန်း – ဗင်နီစီယပ်စ် (ဘရာဇီးလ်)၊ ဘန်ဇီမာ (ပြင်သစ်)နှင့် ဗယ်လ်ဗာဒီ (ဥရုဂွေး)တို့ကို အသုံးပြုခဲ့ခြင်းဖြစ်သည်။ ယင်းမှာ ၁၉၀၂ ခုနှစ်၊ မတ်လကစတင်တည်ထောင်ခဲ့ပြီး နှစ်ပေါင်း (၁၂၀) ကျော်ကြာမြင့်ခဲ့ပြီဖြစ်သည့် ရီးယဲလ်မက်ဒရစ် အသင်း၏ သမိုင်းတွင် ပထမဆုံးအကြိမ်အဖြစ် စပိန်ကစားသမား မပါဝင်သည့် ပွဲထွက်လူ စာရင်းအဖြစ် မှတ်တမ်း ဝင်ခဲ့ကြောင်း သိရှိရသည်။ ထို့ပြင် အဆိုပါပွဲစဉ်တွင် ဗီလာရီးယဲလ်အသင်းကို ရှုံးနိမ့်ခဲ့ခြင်းကြောင့် အန်ဆယ်လော့တီ ၏ ပွဲထွက်လူစာရင်းရွေးချယ်မှုကို စပိန်မီဒီယာများက ဝေဖန်ခဲ့ကြကြောင်း သိရှိရသည်။
သို့သော် အန်ဆယ်လော့တီက “ဒါက တိုက်ဆိုင်မှုသက်သက်ပါပဲ။ ရီးယဲလ်မက်ဒရစ်အသင်းမှာ ကမ္ဘာ့အနှံ့လာ ရောက်ကစားတဲ့ ကစားသမားတွေ အများကြီးရှိပေမဲ့ ဒီကလပ်အသင်းရဲ့ မိခင်က စပိန်တွေပါပဲ။ ကျွန်တော်တို့ အကယ်ဒမီမှာ စပိန်ကစားသမားတွေ အများကြီး ရှိပါတယ်။ ရီးယဲလ်မက်ဒရစ်က ကစားသမားတွေကို မွေးထုတ် ပေးတဲ့ အသင်းဖြစ်ပြီး အခုကတော့ တိုက်ဆိုင်မှုပါပဲ”ဟု ဆိုခဲ့သည်။ ထို့ပြင် အယ်လ်နာဆာအသင်းသို့ စီရော်နယ်လ်ဒို ပြောင်းရွှေ့ခြင်းနှင့်ပတ်သက်ပြီးလည်း အန်ဆယ်လော့တီက “ကျွန်တော် ဝမ်းသာပါတယ်။ စီရော်နယ်လ်ဒိုကို ခေါ်ယူနိုင်တာ အယ်လ်နာဆာအတွက် ဂုဏ်ယူစရာပါပဲ။ သူဟာ ဘေးလ်လိုပဲ ရီးယဲလ်ဂန္ထဝင်ဖြစ်ပြီး သူ အောင်မြင်ဖို့ ကျွန်တော်ဆုတောင်းနေပါတယ်” ဟု ပြောကြားခဲ့သည်။
