၂၀၂၂-၂၀၂၃ စပိန်စူပါဖလားပြိုင်ပွဲကို ဇန်နဝါရီတွင် ဆော်ဒီအာရေဗျ၌ တတိယအကြိမ် ကျင်းပမည်ဖြစ်ကြောင်း စပိန်ဘောလုံးအဖွဲ့ ချုပ် ထုတ်ပြန်
၂၀၂၂-၂၀၂၃ ရာသီ စပိန်စူပါဖလား ပြိုင်ပွဲကို ဇန်နဝါရီတွင် ဆော်ဒီအာရေဗျနိုင်ငံ၌ ကျင်းပမည်ဖြစ်ကြောင်း စပိန်ဘောလုံးအဖွဲ့ ချုပ် (RFEF) က ထုတ်ပြန်ကြေညာခဲ့သည်။
စပိန်စူပါဖလားပြိုင်ပွဲကို ဆော်ဒီအာရေဗျနိုင်ငံ၌ တတိယအကြိမ် ကျင်းပခြင်းဖြစ်ပြီး COVID-19 ကပ်ရောဂါကြောင့် ခရီးသွားလာမှု ကန့်သတ်ထားသည့် ၂၀၂၀-၂၀၂၁ ရာသီမှ လွဲ၍ နောက်ဆုံးလေးရာသီတွင် သုံးကြိမ်မြောက် သွားရောက်ကျင်းပခြင်းဖြစ်သည်။
ယခုနှစ် စပိန်စူပါဖလားပြိုင်ပွဲအဖြစ် ၂၀၂၁-၂၀၂၂ ရာသီ လာလီဂါချန်ပီယံ ရီးယဲလ်မက်ဒရစ်၊ ဒုတိယဆုရ ဘာစီလိုနာ၊ စပိန်ဘုရင့်ဖလားပြိုင်ပွဲချန်ပီယံ ဘက်တစ်နှင့် ဒုတိယဆုရ ဗလင်စီယာအသင်းတို့ ယှဉ်ပြိုင်ရမည် ဖြစ်သည်။
ဆီမီးဖိုင်နယ်အဖြစ် ဇန်နဝါရီ ၁၁ ရက်တွင် ဘက်တစ်နှင့် ဘာစီလိုနာ၊ ဇန်နဝါရီ ၁၂ ရက်တွင် ရီးယဲလ်မက်ဒရစ်နှင့် ဗလင်စီယာ အသင်း ယှဉ်ပြိုင်ရမည်ဖြစ်ပြီး အနိုင်ရမည့် နှစ်သင်းမှာ ဇန်နဝါရီ ၁၅ ရက်တွင် ဗိုလ်လုပွဲ ဆက်လက်ယှဉ်ပြိုင်ရမည်ဖြစ်သည်။ ယင်း ပွဲစဉ်သုံးပွဲစလုံးကို မြို့တော်ရီယက်ဒ်ရှိ ပရိသတ် ၆၀၀၀၀ ဝင်ဆံ့သည့် King Fahd International Stadium ကွင်း၌ ကျင်းပမည် ဖြစ်သည်။
ယခုနှစ် စပိန်စူပါဖလားပြိုင်ပွဲမှာ ကနဦး သုံးနှစ်စာချုပ်အရ ဆော်ဒီအာရေဗျ၌ နောက်ဆုံးအကြိမ် ပြိုင်ပွဲ ဖြစ်သော်လည်း RFEF အနေဖြင့် ၂၀၂၉ ခုနှစ်အထိ ဆက်လက်ကျင်းပရန် သဘောတူညီမှုရရှိထားသည်။ ယင်းပြိုင်ပွဲ တွင် ဘာစီလိုနာအသင်းက ချန်ပီယံဆု ၁၃ ကြိမ်ဖြင့် အအောင်မြင်ဆုံးဖြစ်နေပြီး ဆော်ဒီ ၌ ကျင်းပသည့် နှစ်ကြိမ်စလုံး ရီးယဲလ်အသင်း က ချန်ပီယံဆုရရှိထားသည်။ Elevensport
