အင်ဒိုနီးရှားသမ္မတ Widodo ပြန်လည်ရွေးကောက်ခံရ
ပြီးခဲ့တဲ့ လက ကျင်းပခဲ့တဲ့ အင်ဒိုနီးရှား နိုင်ငံ သမ္မတ ရွေးကောက်ပွဲမှာ လက်ရှိ သမ္မတ Joko Widodo က မဲပေါင်း ၅၅ ဒသမ ၅ ရာခိုင်နှုန်း ရရှိခဲ့ပြီး ပြန်လည် ရွေးချယ်ခံရကြောင်း အင်ဒိုနီးရှားရွေးကောက်ပွဲကော်မရှင် KPU က အင်္ဂါနေ့က ကြေညာခဲ့ပါတယ်။ သူ့ ယှဉ်ပြိုင်ဘက် ဗိုလ်ချုပ်ကြီးဟောင်း Prabowo Subianto က မဲ ၄၄ ဒသမ ၅ ရာခိုင်နှုန်း ရရှိခဲ့ပါတယ်။
Jokowi လို့လည်း ခေါ်တဲ့ သမ္မတ Widodo မဲပေါင်း ၈၅,၆၀၇,၃၆၂ ရရှိပြီး Prabowo Subianto က မဲပေါင်း ၆၈,၆၅၀,၂၃၉ ရရှိခဲ့တယ်လို့  ရွေးကောက်ပွဲကော်မရှင်မင်းကြီး Evi Novida Ginting Manik က ကြေညာခဲ့ပါတယ်။ အင်ဒိုနီးရှားနိုင်ငံမှာ သမ္မတ ရွေးကောက်ပွဲတွေကို ၂၀၀၄ ခု က နေ ၂၀၁၄ ခုအထိ လွှတ်တော်ရွေးကောက်ပွဲတွေကျင်းပအပြီး ၃ လ အကြာမှာ ကျင်းပလေ့ ရှိခဲ့တာဖြစ်ပါတယ်။ ဒီနှစ် ပထမဆုံး အကြိမ်အဖြစ် ဧပြီလ ၂၁ ရက် သမ္မတနဲ့ ဒုတိယ သမ္မတ အပြင် လွှတ်တော်ရွေးကောက်ပွဲတွေနဲ့ ဒေသခံကောင်စီ ရွေးကောက်ပွဲတွေကို တပြိုင်နက်တည်း ကျင်းပခဲ့တာဖြစ်ပါတယ်။
နိုင်ငံတ၀ှမ်း မဲအားလုံးကို ရေတွက်ပြီး နောက်ဆုံးရလဒ်တွေကို စုစည်းပြီးခဲ့အပြီး တနာရီအကြာမှာ ဒီ ကြေညာချက်ကို အင်္ဂါနေ့က KPU က ထုတ်ပြန်တာ ဖြစ်ပါတယ်။ အင်ဒိုနီးရှား မဲဆန္ဒရှင် ၁၉၃ သန်းဟာ မဲရုံပေါင်း ၈ သိန်း ၁ သောင်းကို သွားရောက် မဲပေးခဲ့ ကြပါတယ်။ Widodo က ၂၁ ပြည်နယ်က မဲတွေကို သိမ်းကျုံး ရယူခဲ့ပြီး အစ္စလာမ္မစ် သဘောထား တင်းမာသူ ဗိုလ်ချုပ်ကြီး ဟောင်း Subianto ကတော့ ၁၃ ပြည်နယ်က မဲတွေရဲ့ ၄၄ ဒသမ ၅ ရာခိုင်နှုန်း ရရှိခဲ့ပါတယ်။
ပြီးခဲ့တဲ့ သီတင်းပတ်ကတော့ Jakarta ရှိအမေရိကန်သံရုံး က ရွေးကောက်ပွဲကော်မရှင် KPU က သမ္မတနဲ့ လွှတ်တော်ရွေးကောက်ပွဲ ရလဒ်တွေကို တရားဝင် ကြေညာတဲ့ အခါ ဆန္ဒပြမှုများ ဖြစ်မှာကို စိုးရိမ်တဲ့ အတွက် အင်ဒိုနီးရှားရောက် အမေရိကန် နိုင်ငံသားတွေ အတွက် လုံခြုံရေး နှိုးဆော်ချက် ထုတ်ပြန်ခဲ့ပါတယ်။
-Ref: VOA
