သမီးအလုပ်ခန့်မိလို့ ပြင်သစ် ပြည်ထဲရေး ဝန်ကြီး နုတ်ထွက်
ပြင်သစ် ပြည်ထဲရေးဝန်ကြီး Bruno Le Roux သူ့သမီး ၂ ယောက်ကို ကျောင်းသူဘဝနဲ့ လွှတ်တော် လက်ထောက်တွေအဖြစ် အလုပ်ခန့်ခဲ့တယ် ဆိုတဲ့သတင်း ထွက်လာပြီးနောက် ရာထူးက နုတ်ထွက်သွား ပါတယ်။
ဒေါ်လာ ခြောက်သောင်းလောက်တန်တဲ့ ဒီအလုပ်တွေကို မစ္စတာ Le Roux က သူ့သမီးတွေကို လွန်ခဲ့တဲ့ ၇ နှစ် လောက်က ပေးခဲ့တဲ့ ကိစ္စအတွက် စတင် စုံစမ်းနေပြီလို့လည်း ပြင်သစ်အစိုးရ ရှေ့နေတွေက ဆိုပါတယ်။
လွှတ်တော် လုပ်ထုံးတွေကို ချိုးဖောက်ခဲ့တာ မရှိကြောင်းနဲ့ သူ့သမီးတွေကလည်း အလုပ်ကို တကယ် ကြိုးကြိုးစားစား လုပ်ခဲ့တာဖြစ်ကြောင်း၊ ဒါပေမဲ့ သူ့ကြောင့် အစိုးရ အပြောအဆို ခံရတာ မဖြစ်စေချင်လို့ ထွက်တာလို့ မစ္စတာ Le Roux က ဆိုပါတယ်။
သမီးတွေကို ကျောင်းအားရက်မှာ အလုပ်ခန့်တဲ့ကိစ္စ ပြောစရာတွေ ဖြစ်နေတာကို ကျွန်တော် သိပါတယ်၊ ဒါ တရားဝင် ခန့်တာပါ၊ အမျိုးသားလွှတ်တော် စည်းမျဉ်းတွေနဲ့အညီ အတိအကျ လုပ်ခဲ့တာပါလို့ နုတ်ထွက်သွားတဲ့ ပြင်သစ် ပြည်ထဲရေးဝန်ကြီးက ဆိုပါတယ်။
ရှေးရိုးစွဲ သမ္မတလောင်း ဖြစ်တဲ့ ဖရန်ဆွာ ဖီယွန်း ကိုလည်း ငွေကြေး အလွဲသုံးစားမှုနဲ့ စာရွက်စာတမ်းအတု လုပ်တယ် ဆိုပြီး စုံစမ်းစစ်ဆေးမှုတွေ လုပ်နေပါတယ်။
BBC Burmese http://www.bbc.com/burmese
