ရလဒ်ဆိုးနေသော်လည်း နည်းပြရေနီယာရီကို လက်စတာအသင်းထောက်ခံ
ပရီးမီးယားလိဂ်ချန်ပီယံ လက်စတာအသင်း သည် တန်းဆင်းဇုန်နှင့် တစ်မှတ်သာ ကွာတော့သော်လည်း နည်းပြ ရေနီယာရီကို ထောက်ခံကြောင်း ကြေညာချက် ထုတ်လိုက်သည်။
အသင်းအနေဖြင့် ပရီးမီးယားလိဂ်နောက်ဆုံး ၁၅ ပွဲတွင် နှစ်ပွဲသာအနိုင်ရပြီးနောက် အီတလီလူမျိုးနည်းပြမှာ ဖိအားများအောက် သို့ ရောက်နေသည်။
သို့သော် လက်စတာအသင်း၏ထုတ်ပြန်ချက်တွင် “တစ်သင်းလုံးအနေနဲ့ နည်းပြရဲ့နောက်မှာ ညီညွတ်စွာနဲ့ ထောက်ခံနေဆဲပါ”ဟု ရေးထားပြီး ရေနီယာရီကလည်း “ဒါက အကြပ်အတည်းကာလတစ်ခု မဟုတ်ပါဘူး။ နိုင်ပွဲမရတဲ့အခါ ယုံကြည်မှုလျော့လာတတ်တာ ဓမ္မတာပါပဲ”ဟု အသင်း၏ထောက်ခံမှုရအပြီးတွင် ပြောသည်။
လက်စတာအသင်းသည် ဗုဒ္ဓဟူးနေ့တွင် ဒါဘီနှင့် အက်ဖ်အေဖလားစတုတ္ထအဆင့်ပြန်ကန်ပွဲကို အိမ်ကွင်းတွင် ကစားရမည်ဖြစ်ပြီး အသင်းပိုင်ရှင် ဆရီဗက်ဒနာပရက်ဟာသည် ထိုင်းမှလာရောက်ကာ ရေနီယာရီကိုလည်း လူသိရှင်ကြားထောက်ခံပေးမည် ဖြစ်သည်။
လက်စတာအသင်းသည် ပရီးမီးယားလိဂ်အမှတ်ပေးဇယားအဆင့် ၁၆ နေရာသို့ရောက်နေပြီး ၂၀၁၇ ခုနှစ်တွင် နိုင်ပွဲမရသေးပေ။
(ဘီဘီစီ)
