ထိုင်းနိုင်ငံ၌ ပြီးခဲ့သည့် ၂၄ နာရီအတွင်း COVID-19 ဖြင့်လူ ၂၈ ဦးသေဆုံးခဲ့ပြီး လူနာသစ် ၂၂၅၇ ဦး ဆေးရုံတွင် ကုသမှုခံယူခဲ့ကာ ၎င်းတို့အနက် တစ်ဦးမှာ ပြည်ပမှဝင်ရောက်သူဖြစ်ကြောင်း ထိုင်းကျန်းမာရေးဝန်ကြီးဌာနက ယနေ့(ဇူလိုင် ၁၄ ရက်)တွင် ထုတ်ပြန်သည်။
ထိုင်းနိုင်ငံ၌ ကူးစက်ခံရသူပေါင်း ၂,၃၂၉,၇၄၆ ရှိခဲ့သည့် ဇန်နဝါရီ ၁ ရက်နောက်ပိုင်းက နိုင်ငံတွင်း ကူးစက်သေဆုံးမှုကိန်းဂဏန်းများ မြင့်တက်လာခဲ့သည်။
ဇူလိုင်လ ၁၃ ရက် ဗုဒ္ဓဟူးနေ့၌ တရုတ်က ၎င်း၏ရေပိုင်နက်ဟု ယူဆထားသော တောင်တရုတ်ပင်လယ်ရှိ ပါရာဆဲလ် ကျွန်းများအနီး အမေရိကန်၏ ပဲ့ထိန်းဒုံးကျည်ဖျက်သင်္ဘော USS Benfold သည် တရားမဝင် ဖြတ်သန်း ဝင်ရောက်လာသည်ဟုဆိုသည်။ ထို့ကြောင့် တရုတ်စစ်တပ်က ၎င်းသင်္ဘောအားဝေဟင်နှင့် ရေကြောင်းတပ်ဖွဲ့များပူးပေါင်း ခြေရာခံ၍ သတိပေးကာ မောင်းထုတ်ခဲ့ကြောင်း ပြည်သူ့ လွတ်မြောက်ရေး တပ်မတော် တောင်ပိုင်း စစ်ဌာနချုပ် (PLA) က ထုတ်ပြန်ခဲ့သည်။
စင်ကာပူနိုင်ငံတွင် ပြီးခဲ့သည့် ၂၄ နာရီအတွင်း COVID-19 ကူးစက်ခံရသူ ၁၆၈၇၀ ဦးထပ်မံတွေ့ရှိခဲ့ကာ ထပ်မံသေဆုံးသူ ၃ ဦးရှိကြောင်း ကျန်းမာရေးဝန်ကြီးဌာနက သတင်းထုတ်ပြန်သည်။ ယင်းကူးစက်မှုများအနက် ပြည်တွင်းကူးစက်မှု ၁၅၉၇၈ ဦးရှိပြီး၊ ပြည်ပမှကူးစက်မှု ၈၉၂ ဦးရှိကြောင်းသိရသည်။
ရုရှားနိုင်ငံ မော်စကိုမြို့တော်မှာ ဒွန်းညှက်စ်ပြည်သူ့သမ္မတနိုင်ငံ(DPR)ရဲ့ သံရုံးကို အင်္ဂါနေ့က ဖွင့်လှစ်ခဲ့ပါတယ်။ ဒွန်းညှက်စ်ဟာ ယူကရိန်းအရှေ့ပိုင်းရှိ ခွဲထွက်ရေးနိုင်ငံအဖြစ် ရုရှားက အသိအမှတ်ပြုထားတဲ့ နိုင်ငံ(၂)နှစ်ခုထဲက တစ်ခုဖြစ်ပါတယ်။ သံရုံးကျမ်းကျိန်ပွဲကို DPR ရဲ့ နိုင်ငံခြားရေးဝန်ကြီး နာတာလီယာနီကိုနိုရိုဗာက ဦးဆောင်ခဲ့တာ ဖြစ်ပြီး ပွဲအခမ်းအနားနဲ့ လုပ်ခဲ့တာတော့ မဟုတ်ပါဘူး။ ခွဲထွက်ရေးသမားတွေရဲ့ ပြောချက်အရတော့ ဒွန်းညှက်စ် ပြည်သူ့သမ္မတနိုင်ငံအတွင်း တိုက်ပွဲတွေပြင်းထန်နေတာကြောင့် ဖွင့်ပွဲအခမ်းအနားလုပ်မယ့် အစီအစဉ်ကို ဖျက်သိမ်းခဲ့ရတာလို့ ဆိုပါတယ်။ ရိုးရိုးရှင်းရှင်းပြုလုပ်ခဲ့တဲ့ သံရုံးဖွင့်ပွဲကို ရုရှားနိုင်ငံခြားရေးဝန်ကြီး ဆာဂေး လဗ်ရော့ဗ်လည်း တက်ရောက်ခဲ့တယ်လို့ မျှော်မှန်းရပါတယ်။
တရုတ်အစိုးရ၏ တင်းကျပ်သော ကိုဗစ်ကင်းစင်မဟာဗျူဟာသည်လျော့ပါးသွားခြင်းမရှိသေးကြောင်း လက္ခဏာအဖြစ် ကိုရိုနာဗိုင်းရပ်စ်ကူးစက်ခံရသူတစ်ဦးကို တွေ့ရှိခဲ့ပြီးနောက် လူဦးရေသုံးသိန်းကျော် နေထိုင်သည့် မြို့ငယ်တစ်မြို့ကို ဇူလိုင် ၁၂ ရက်တွင် အာဏာပိုင်များက လော့ဒေါင်းချခဲ့သည်။
တရုတ်နိုင်ငံသည် ကိုဗစ်ကင်စင်မူဝါဒကို စွဲစွဲမြဲမြဲကျင့်သုံးလျက်ရှိသည့် နောက်ဆုံးစီးပွားရေး အင်အားကြီး နိုင်ငံဖြစ်သည်။ ပြည်သူတို့၏ စိတ်ပျက်ငြီးငွေ့မှုမြင့်တက်နေကာ စီးပွားရေးကို ထိခိုက်မှုဖြစ်ပေါ်စေသော်လည်း ကူးစက်မှုအသစ်များကို တွေ့ရှိသည်နှင့်တစ်ပြိုင်တည်း ရုတ်တရက် လော့ဒေါင်းချခြင်း၊ ကွာရန်တင်းဝင်စေခြင်း၊ ကြီးလေးသည့် ခရီးသွားလာရေးကန့်သတ်ချက်များချမှတ်ခြင်းတို့ကို လုပ်ဆောင်ခဲ့သည်။
ရုရှားသမ္မတ ဗလာဒီမာပူတင်သည် တနင်္လာနေ့ (ဇူလိုင် ၁၁ ရက်) တွင် ယူကရိန်းနိုင်ငံသားအားလုံးကို ရုရှားနိုင်ငံသားအဖြစ်ခံယူခွင့်ပြုသည့်အမိန့်ကို လက်မှတ်ရေးထိုးခဲ့သည်။
မကြာသေးမီကာလများက ယူကရိန်းနိုင်ငံ Donetsk နှင့် Luhansk ဒေသများတွင် နေထိုင်သူများနှင့် တောင်ပိုင်း Zaporizhzhia နှင့် Kherson ဒေသများတွင် နေထိုင်သူများသာ ယခုအစီအစဉ်၏ ပထမအသုတ်အဖြစ် အကျုံးဝင်ခဲ့သည်။ သို့သော်ယခုအခါ ပူတင်၏အမိန့်သည် ယူကရိန်းနိုင်ငံသားအားလုံးအတွက် အကျုံးဝင်ခဲ့ပြီး ဖြစ်သည်။ ယခုအခြေအနေနှင့် ပတ်သက်၍မူ ယူကရိန်းအရာရှိများထံမှ တုံ့ပြန်မှု တစ်စုံတစ်ရာ မရရှိသေးပေ။
အမေရိကန်ပြည်ထောင်စုက တောင်ကိုရီးယားနိုင်ငံကို အဆင့်မြင့်ဂျက်တိုက်လေယာဉ်တွေ ပေးပို့လိုက်ပြီး ရက်ပိုင်းအကြာမှာပဲ မြောက်ကိုရီးယားနိုင်ငံက တနင်္ဂနွေနေ့မှာ လက်နက်ကြီးတွေပစ်ခတ်ပြီး စစ်ရေးလေ့ကျင့်ခဲ့ပုံ ရတယ်လို့ တောင်ကိုရီးယားကပြောပါတယ်။ နှစ်နိုင်ငံပူးတွဲစစ်ရေးလေ့ကျင့်ဖို့အတွက် အမေရိကန်က တောင်ကိုရီးယားကို ဂျက်တိုက်လေယာဉ်တွေ ပေးပို့ခဲ့တာပါ။ မြောက်ကိုရီးယားဖက်က ပစ်လွှတ်ခဲ့တယ်လို့ ယူဆရတဲ့ လက်နက်သွားရာလမ်းကြောင်းအတော်များများ တနင်္ဂနွေနေ့ခင်းပိုင်းမှာ ထောက်လှမ်းမိခဲ့တယ်လို့ တောင်ကိုရီးယားပူးတွဲစစ်ဦးစီးများအဖွဲ့ချုပ်အကြီးအကဲရဲ့ကြေညာချက်မှာ ဖော်ပြထားပါတယ်။
သီရိလင်္ကာသမ္မတ Gotabaya Rajapaksa သည် လာမည့်သီတင်းပတ်တွင် ရာထူးမှ နုတ်ထွက်ရန် သဘောတူခဲ့ကြောင်း လွှတ်တော်ဥက္ကဋ္ဌ Mahinda Abeywardana က ပြောကြားခဲ့သည်။၎င်းသည် ဒေါသထွက်နေသော ဆန္ဒပြလူအုပ်ကြီးလက် မှလွတ်မြောက်ရန် ဇူလိုင် ၉ ရက် တွင် ၎င်း၏အစိုးရနေအိမ်တော် မှ ထွက်ခွာလာကာ လုံခြုံသည့်နေရာတွင်ရှိနေသည်ဟုသိရှိရသည်။
စပိန်နိုင်ငံ၊ ပန်ပလိုနာမြို့မှာ နှစ်စဉ်ကျင်းပနေကျဖြစ်တဲ့ နွားရိုင်းပွဲတော်ကို ဗုဒ္ဓဟူးနေ့က မီးရှုးမီးပန်းတွေ ပစ်ဖောက်ပြီး စတင်ခဲ့ပါတယ်။ ကိုဗစ်ကပ်ရောဂါကြောင့် ၂ နှစ်ကြာရပ်ဆိုင်းထားတဲ့ စပိန်ရိုးရာနွားရိုင်းပွဲကို ပြန်လည်ကျင်းပရာမှာတော့ လူပေါင်းထောင်နဲ့ချီပြီး ပါဝင်ဆင်နွဲခဲ့ကြပါတယ်။
မီးရှုးမီးပန်းဖောက်ပြီးပြီးချင်းမှာပဲ ပွဲတော်ကိုလာရောက်တဲ့ပရိသတ်တွေဟာ တစ်ယောက်နဲ့ တစ်ယောက် အနီရောင်ဝိုင်တွေ ပက်ဖြန်းခဲ့ကြပါတယ်။ နွားရိုင်းပွဲမှာ ပါဝင်သူတွေဟာ အနီရောင်အင်္ကျီ ၊ လက်ကိုင်ပဝါအနီတွေ ဝတ်ဆင်ကိုင်ဆောင်ပြီး မြို့ရဲ့ လမ်းကျဉ်းတစ်လျှောက်မှာ ပြေးလွှားပြီး နွားရိုင်းမောင်းခဲ့ကြပါတယ်။
နိုင်ဂျီးရီးယားနိုင်ငံ၊ အဘူဂျာမြို့တော်မှာရှိတဲ့ အကျဉ်းထောင်ဟာ ယမန်နေ့က အကြမ်းဖက်တိုက်ခိုက်မှုခံခဲ့ရပြီး အကျဉ်းသား ၄၀၀ ကျော် လွတ်မြောက်နေကြောင်း သိရပါတယ်။ ဒီဖြစ်ရပ်မှာ အကျဉ်းသားလေးဦး၊ လုံခြုံရေးအစောင့်တစ်ဦးနဲ့ အကြမ်းဖက်သမားတချို့သေဆုံးခဲ့ပြီး အကျဉ်းသားအမြောက်အမြား ထွက်ပြေး လွတ်မြောက်သွားခဲ့တာဖြစ်ပါတယ်။
