Facebook ၊ Instagram နဲ့ WhatsApp တို့ကို ပိုင်တဲ့ Meta နည်းပညာကုမ္ပဏီဟာ ဝန်ထမ်းအင်အား ၁၃ ရာခိုင်နှုန်းလောက်ကို လျှော့ချခဲ့ပါတယ်။ ကမ္ဘာတစ်ဝန်းရှိ ဝန်ထမ်းအင်အား ၈၇,၀၀၀ လောက်ထဲက ဝန်ထမ်း ၁၁,၀၀၀ ကို လျှော့ချခဲ့တာပါ။ ဒါဟာ Meta ကုမ္ပဏီရဲ့သမိုင်းမှာ ပထမဆုံးအကြိမ် အစုအလိုက် အပြုံလိုက် ဝန်ထမ်းလျော့ချမှု ဖြစ်ပါတယ်။
ကိုယ်ပိုင်လေယာဉ်များနှင့် ဇိမ်ခံကားများ စီးနေသည့် လူနေမှုပုံစံကို အင်စတာဂရမ် ပေါ် တင်ကာ ကြွားလုံးထုတ် ဟန်ရေးပြခဲ့သည့် နိုင်ဂျီးရီးယား နိုင်ငံသား တစ်ဦးအား ဒေါ်လာသန်းပေါင်းများစွာ လိမ်လည်မှုဖြင့် ထောင်ဒဏ် ၁၁ နှစ် ချမှတ်လိုက်ကြောင်း သိရသည်။
အင်စတာဂရမ်တွင် ဖော်လိုဝါ သန်းပေါင်းများစွာရထားသူ ရေး ဟက်ရှ်ပါပီ ခေါ် ရေမွန် အဘာ့စ် ဆိုသူသည် ငွေမည်းခဝါချမှုတွင် ပူးပေါင်းကြံစည်ခဲ့ကြောင်း ပြီးခဲ့သည့်နှစ် ဧပြီလက ဖြောင့်ချက် ပေးခဲ့သည်။
အမေရိကန် ရဲ့ သက်တမ်းဝက်ရွေးကောက်ပွဲမှာ ရီပတ်ဘလီကန်တွေ က သမ္မတ ဂျိုးဘိုင်ဒန် ရဲ့ ဒီမိုကရက်တွေဆီကနေ အောက်လွှတ်တော်ကို ထိန်းချုပ်သွားမယ်လို့ မျှော်လင့်ရကြောင်း သတင်းတွေက ဖော်ပြပါတယ်။
နိုင်ငံတစ်ဝှမ်း မဲပေးမှုတွေ ပြီးဆုံးသွားချိန်မှာပဲ ရီပတ်ဘလီကန်တွေ က မူလက ဒီမိုကရက်တစ်တွေ ရယူထားတဲ့ အမတ်နေရာ ငါးနေရာကို အနိုင်ရရှိခဲ့တယ်လို့ Edison Research အဖွဲ့ က ခန့်မှန်းထားပါတယ်။ ဒါနဲ့အတူ ရီ ပတ်ဘလီကန်တွေက အောက်လွှတ်တော် လူများစုနေရာကို ထိန်းချုပ်သွားနိုင်ပါတယ်။
အိန္ဒိယနိုင်ငံခြားရေးဝန်ကြီး ဆူဘရာမန်ယမ်ဂျိုင်ရှန်ကာဟာ ရုရှားနိုင်ငံခြားရေးဝန်ကြီး ဆာဂီ လာ့ဗရော့ဗ်နဲ့ ရုရှားမြို့တော် မော်စကိုမှာ နိုဝင်ဘာ ၈ ရက်က တွေ့ဆုံခဲ့ပြီး အလားအလာရှိတဲ့ စွမ်းအင်ဆိုင်ရာ စီမံကိန်းတွေကို အဓိကထား ဆွေးနွေးခဲ့ပါတယ်။ နိုင်ငံအတွက် အကျိုးရှိလို့ ရုရှားရေနံကို အိန္ဒိယက ဆက်ဝယ်သွားမယ်လို့ ဆွေးနွေးပွဲအပြီး သတင်းစာရှင်းလင်းပွဲမှာ ဂျိုင်ရှန်ကာက ပြောပါတယ်။
ကင်ညာနိုင်ငံလေဆိပ်မှာ လေယာဉ်မှူးတွေ ၃ ရက်ကြာ ဆန္ဒဖော်ထုတ်ခဲ့တဲ့အတွက် လေကြောင်းခရီးအတော် များများ ရပ်ဆိုင်းသွားခဲ့ရပါတယ်။ အဲဒီအတွက် လေဆိပ်မှာ ခရီးသည်အများအပြား သောင်တင်နေခဲ့ရပါတယ်။ ခရီးသည်တွေဟာ သူတို့ရဲ့ ခရီးစဉ်တွေအတွက် တခြားလေကြောင်းခရီးစဉ်တွေကို ပြောင်းလဲစီးနင်းဖို့ ဖိအားပေး ခံခဲ့ရပါတယ်။
၂၀၂၂ ခုနှစ်၏ လက်ရှိအချိန်ထိ ပူသောရာသီဥတုကြောင့် ဥရောပတွင် အနည်းဆုံးလူ ၁၅၀၀၀ သေဆုံးခဲ့သည်ဟု နိုဝင်ဘာ ၇ ရက်တွင် ကမ္ဘာ့ကျန်းမာရေးအဖွဲ့ (WHO) က ထုတ်ပြန်လိုက်ပြီး အဆိုးရွားဆုံးထိခိုက်သော နိုင်ငံများထဲတွင် စပိန်နှင့် ဂျာမနီတို့ပါဝင်သည်ဟု ဆိုသည်။
မှတ်တမ်းများ စတင်ယူခဲ့ပြီးကတည်းက ဇွန်လမှ သြဂုတ်လအထိ သုံးလသည် ဥရောပတွင် အပူဆုံးလများဖြစ်ပြီး ထူးထူးခြားခြား အပူချိန်မြင့်တက်ခြင်းများက အလယ်ခေတ်နောက်ပိုင်း ဥရောပတိုက်ကြုံတွေ့ရသည့် အဆိုးရွားဆုံး မိုးခေါင်းမှုကို ဦးတည်စေခဲ့သည်ဟု ဆိုသည်။
ယူကရိန်းစစ်ပွဲအတွက် မြောက်ကိုရီးယားက ရုရှားအား အမြောက်ကျည်များပေးပို့နေသည်ဆိုသော အမေရိကန်၏ ပြောကြားချက်မှာ အခြေအမြစ်မရှိကြောင်း မြောက်ကိုရီးယားနိုင်ငံပိုင် KCNA သတင်းဌာနက ဖော်ပြခဲ့သည်။
အမေရိကန်နှင့် တောင်ကိုရီးယားတို့က ၎င်းတို့၏ အကြီးမားဆုံးလေကြောင်းစစ်ရေးလေ့ကျင့်မှုကို လုပ်ဆောင်ခဲ့ ပြီးနောက် မြောက်ကိုရီးယားက တိုက်ချင်းပစ်ပဲ့ထိန်းဒုံးကျည် စမ်းသပ်မှုအပါအဝင် ပြီးခဲ့သည့် သီတင်းပတ်အတွင်း လက်နက်စမ်းသပ်မှုများ ဆက်တိုက်ပြုလုပ်ကာ တုံ့ပြန်ခဲ့ပြီးနောက်တွင် ကိုရီးယားကျွန်းဆွယ်၌ တင်းမာမှု မြင့်တက်နေစဉ် ယခုပြောကြားချက် ထွက်ပေါ်လာခဲ့ခြင်းဖြစ်သည်။
ယူကရိန်းစစ်ပွဲဖြစ်ပေါ်နေသော်လည်း မော်စကိုနဲ့ ဝါရှင်တန်ကြား ဆက်သွယ်ရေးလမ်းကြောင်းဖွင့်ထားကြောင်း အမေရိကန်အမျိုးသားလုံခြုံရေး အကြံပေး ဂျိတ်ဆူလီဗန်က အတည်ပြုပြောကြားပါတယ်။
ကရင်မလင်နဲ့ အဆက်အသွယ် ဆက်လက်ထားရှိတာက အမေရိကန်ရဲ့ အကျိုးစီးပွားအတွက် ဖြစ်ကြောင်း မစ္စတာ ဆူလီဗန်က နယူးယောက်မြို့မှာ ပြောကြားပါတယ်။ ဒါပေမယ့် သူတို့ ဆက်ဆံနေတဲ့သူတွေနဲ့ ပတ်သက်လို့ အမေရိကန်အရာရှိတွေက ရှင်းလင်းစွာ သိရှိထားတယ်လို့ သူက ဆက်ပြောပါတယ်။
ကမ္ဘာပေါ်မှာ နျူကလီးယားလက်နက် အများဆုံး သိမ်းဆည်းထားရာနေရာတစ်ခုဖြစ်တဲ့ ကစ်ဆက်ရေတပ် အခြေစိုက်စခန်းကို လင်းပိုင်တွေက လုံခြုံရေးတာဝန်ယူပေးထားတာပါ။ ဆီယက်တယ်မြို့ကနေ မိုင် ၂၀ အကွာမှာရှိတဲ့ ကစ်ဆက်ရေတပ်အခြေစိုက်စခန်းမှာ အမေရိကန်စစ်တပ်ရဲ့ နျူကလီးယားလက်နက် ၄ ပုံ၊ ၁ ပုံနီးပါး သိမ်းဆည်းထားပါတယ်။
၂၃ နှစ်အရွယ် ကနေဒါနိုင်ငံသား အန်တိုနီမော့ဆက်ဟာ ၂၄ နာရီအတွင်း သစ်ပင် ၂၃၀၆၀ စိုက်ပျိုးပြီး ဂင်းနက်စ်စံချိန် တင်နိုင်ခဲ့ပါတယ်။ ကူဘတ်ပြည်နယ်သား မော့ဆက်ဟာ ၃.၅ စက္ကန့်မှာ သစ်ပင်တစ်ပင်နှုန်း၊ တစ်မိနစ်ကို သစ်ပင် ၁၆ ပင်နှုန်း စိုက်ပျိုးခဲ့တာပါ။ မာရသွန်ပြိုင်ပွဲ အများအပြား ဝင်ရောက်ယှဉ်ပြိုင်ခဲ့တဲ့ အပျော်တမ်း အပြေးသမား မော့ဆက်က သစ်ပင်စိုက်တာကို အားကစားနည်းတစ်ရပ်လို သဘောထားတယ်လို့ ဆိုပါတယ်။
