တရားမဝင်ရွှေ့ပြောင်းနေထိုင်သူများကို တင်ဆောင်လာသော လှေတစ်စင်းသည် ဖေဖော်ဝါရီလ ၂၆ ရက် တနင်္ဂနွေနေ့တွင် အီတလီနိုင်ငံ ကာလာဘရီယာ ဒေသရှိ ကရိုတိုနေးမြို့အနီးသို့ ကမ်းကပ်ရန် ကြိုးပမ်းစဉ် ကျောက်ဆောင်တစ်ခုနှင့် တိုက်မိခဲ့သဖြင့် ပျက်စီးနစ်မြုပ်ခဲ့ရာ ကလေး ၁၂ ဦး အပါအဝင် လူ ၅၉ ဦးထက်မနည်း သေဆုံးခဲ့ကြောင်း အာဏာပိုင်များက ပြောကြားခဲ့သည်။
ရွေးကောက်ပွဲဆိုင်ရာပြောင်းလဲမှုတွေနဲ့ပတ်သက်ပြီး မက္ကဆီကို မြို့ကြီးတွေမှာ လူထု ချီတက် ဆန္ဒပြပွဲတွေ လုပ်ဆောင်ခဲ့ကြပါတယ်။ အကြီးမားဆုံး ဆန္ဒပြပွဲကို မြို့တော် မက္ကဆီကိုစီးတီးမှာ မြင်တွေ့ခဲ့ရပြီး လူပေါင်း ငါးသိန်းလောက် စုဝေးခဲ့ကြတယ်လို့ ချီတက်ပွဲ ကျင်းပသူတွေက ပြောကြားခဲ့ပေမယ့် ကိုးသောင်းလောက်ပဲ ရှိတယ်လို့ မြိုတော်အစိုးရ က ပြောပါတယ်။
ပြင်သစ် သမ္မတ အီမယ်နျူရယ်မက်ကရွန် က ဧပြီလထဲမှာ တရုတ်နိုင်ငံကို သွားရောက်လည်ပတ်မယ်လို့ စနေနေ့က ပြောကြားခဲ့ပြီး ယူကရိန်း စစ်ပွဲ အဆုံးသတ်နိုင်ရေး ရုရှားကို ဖိအားပေးဖို့လည်း သူက ပေကျင်းကို တိုက်တွန်းလိုက်ပါတယ်။
ဖေဖော်ဝါရီ ၆ ရက်က လှုပ်ခတ်ခဲ့တဲ့ အင်အားပြင်း ငလျင်ကြောင့် တူရကီနဲ့ ဆီးရီးယား နှစ်နိုင်ငံမှာ သေဆုံးသူဦးရေဟာ အယောက် ၅၀၀၀၀ ကျော်ရှိသွားပြီလို့ အာဏာပိုင်တွေက ပြောပါတယ်။
တူရကီမှာ ငလျင်ကြောင့် သေဆုံးသူဦးရေဟာ ဖေဖော်ဝါရီ ၂၄ ရက်အထိ ၄၄၂၁၈ ယောက်ရှိပြီလို့ တူရကီကပ်ဘေးနဲ့ အရေးပေး စီမံခန့်ခွဲရေး အာဏာပိုင်အဖွဲ့ (AFAD) က ပြောကြားခဲ့ပြီး ဆီးရီးယားနိုင်ငံကတော့ သေဆုံးသူ ၅၉၁၄ ဦးရှိပြီလို့ ကြေညာပါတယ်။
ရုရှားသည် Druzhba ပိုက်လိုင်းမှတစ်ဆင့် ပိုလန်သို့ ရေနံထောက်ပံ့မှုကို ရပ်ဆိုင်းလိုက်ကြောင်း ပိုလန်ရေနံချက်လုပ်ရေးကုမ္ပဏီ PKN Orlen ၏ အမှုဆောင်အရာရှိချုပ်က ပြောကြားသည်။ ကုမ္ပဏီအနေဖြင့် ရေနံလိုအပ်ချက်များအား အခြားအရင်းအမြစ်များထံမှ အစားထိုးရယူဖြည့်ဆည်းပေးနိုင်ရန် ကြိုးစားသွားမည် ဖြစ်ကြောင်းကိုလည်း သူက ဖြည့်စွက်ပြောကြားခဲ့သည်။
မြောက်ကိုရီးယားတွင် စီးပွားရေးအခက်အခဲများ ပိုမိုဆိုးရွားနေသည့်တိုင် မြို့တော် ပြုံယမ်းတွင် လူနေအိမ်ပေါင်း ၅၀၀၀၀ တည်ဆောက်မည့် ရည်မှန်းချက်ကြီးသည့် အစီအစဉ်ကို ခေါင်းဆောင်ကင်ဂျုံအွန်က တွန်းအားပေး လုပ်ဆောင်နေချိန်တွင် ပြုံယမ်း၌ ယင်း အိမ်ရာစီမံကိန်းအသစ်ကို စတင်လုပ်ဆောင် ရန် ကင်က လူငယ် လုပ်သားများကို စုဝေးခေါ် ယူခဲ့သည်ဟု နိုင်ငံပိုင်မီဒီယာ KCNA သတင်းအေဂျင်စီက ဖေဖော်ဝါရီ ၂၆ ရက်တွင် ဖော်ပြခဲ့သည်။ ကင်သည် ထောင်နှင့်ချီသည့် လူငယ် လုပ်သားများနှင့်အတူ ဖေဖော်ဝါရီ ၂၅ ရက် က ပြုံယမ်းမြို့တော်၏ ဆိုပိုဒေသတွင် ဆောက်လုပ်ရေးပရောဂျက်အတွက် ဖွင့်ပွဲ အခမ်းအနားကို တက်ရောက်ခဲ့ သည်ဟု KCNA က ဖော်ပြခဲ့သည်။
ဂျာမန်-အီရန် အမျိုးသားတဦးကို သေဒဏ်ချမှတ်တဲ့အပေါ် ဆန့်ကျင်ကန့်ကွက်တဲ့အနေနဲ့ အီရန်သံရုံး ဝန်ထမ်းနှစ်ဦးကို တိုင်းပြည်ကနေ ထွက်ခွာသွားဖို့ အမိန့်ထုတ်လိုက်ကြောင်း ဂျာမနီနိုင်ငံခြားရေးရုံးက ဖေဖော်ဝါရီ ၂၂ ရက်မှာ ကြေညာပါတယ်။
ဂျာမန်အဓိပတိ အိုလာ့ဖ်ရှို့လ်ဇ်က ဂျမ်ရှစ်ရှားမာ့ကို ပေးထားတဲ့ သေဒဏ်ကို လက်မခံနိုင်ကြောင်း ရှုတ်ချလိုက်ပြီး စီရင်ချက်ကို ပြန်ပြောင်းပေးဖို့ အီရန်ကို တောင်းဆိုလိုက်ပါတယ်။
မော်စကို၊ဖေဖော်ဝါရီ ၂၂
တရုတ်နှင့်ရုရှားတို့ကြား ပူးပေါင်းဆောင်ရွက်မှုသည် နိုင်ငံတကာအခြေနေတည်ငြိမ်အောင်ဆောင်ရွက်ရာ၌ အဓိက ကျသည်ဟုရုရှားသမ္မတပူတင်က တရုတ်နိုင်ငံတော်ကောင်စီဝင် မစ္စတာဝမ်ယိနှင့် တွေ့ဆုံစဉ်ပြောကြားခဲ့သည်။
၎င်းတို့၏တွေ့ဆုံမှုသည် တရုတ်နိုင်ငံအနေဖြင့် ယူကရိန်းအရေး၌ ကြားဝင်ဖျန်ဖြေရန် ကြိုးပမ်းနေချိန်၌ ပေါ်ပေါက် လာခြင်းဖြစ်ပြီး မဟာမိတ်ရုရှားနှင့်လည်း ဆက်ဆံရေးမပျက်မည့် နိုင်ငံရေးဖြေရှင်းနည်းကို ရရှိရန် ကြိုးပမ်း နေချိန်လည်း ဖြစ်သည်။
စန့်ရွန်းဒလူး၊ဖေဖော်ဝါရီ ၂၃
ပြင်သစ်နိုင်ငံအနောက်တောင်ပိုင်းရှိ ကျောင်းတစ်ကျောင်းမှ ဆရာမတစ်ဦးသည် ဆယ်ကျော်သက်အရွယ် ကျောင်းသားတစ်ဦး၏ ဓားဖြင့်ထိုးမှုကြောင့်သေဆုံးသွားခဲ့ကြောင်း ဒေသဆိုင်ရာအစိုးရရှေ့နေကပြောကြားခဲ့သည်။
အဆိုပါကျောင်းသား၏ ဓားဖြင့်ထိုးနှက်မှုခံရသောဆရာမသည် အသက် ၅၀ အရွယ်သာရှိပြီး ဖြစ်ဖြစ်ချင်းဆေးရုံ ပို့ပေးနိုင်ရန်ကြိုးပမ်းခဲ့သော်လည်း အသက်မမှီပဲ သေဆုံးသွားခဲ့ခြင်းဖြစ်သည်။ ၎င်းအား ဓားဖြင့်ထိုးခဲ့သည့် ကျောင်းသားကိုလည်း ချက်ချင်းဖမ်းမိခဲ့သည်ဟုသိရသည်။
အင်္ဂါနေ့က နာရီပိုင်းသာခြားတဲ့ မိန့်ခွန်းနှစ်ရပ်မှာ ရုရှားသမ္မတ ဗလာဒီမာပူတင် က အမေရိကန်နဲ့ ချုပ်ဆိုထားပြီး နောက်ဆုံးကျန်ရှိတဲ့ နျူကလီးယားလက်နက် ထိန်းချုပ်ရေး သဘောတူညီချက်ကို ဆိုင်းငံ့လိုက်ကြောင်း ပြောကြားခဲ့ပြီးနောက်မှာပဲ ပိုလန်နိုင်ငံ ဝါဆောမြို့မှာရောက်ရှိနေတဲ့ အမေရိကန် သမ္မတ ဂျိုးဘိုင်ဒန် က ယူကရိန်းကို အနောက်တိုင်းရဲ့ ထောက်ပံ့ကူညီမှုတွေ ယိမ်းယိုင်သွားမှာ မဟုတ်ကြောင်း ပြောကြားပါတယ်။
