ဘဏ္ဍာရေးအကျပ်အတည်းကြုံတွေ့နေရတဲ့ Silicon Valley Bank ကို ပြည်ထောင်စုအစိုးရအနေနဲ့ ငွေကြေး ကျားကန်ထောက်ပံ့ပေးမှာမဟုတ်ဘူးလို့ အမေရိကန်ဘဏ္ဍာရေးဝန်ကြီး Janet Yellen က ပြောပါတယ်။ ဒါပေမယ့်လည်း စုငွေတွေဆုံးရှုံးမလားဆိုပြီး စိတ်ပူနေသူတွေအတွက်တော့ ကူညီဆောင်ရွက်ပေးမယ်လို့ ပြောပါတယ်။
အမေရိကန်ပြည်ထောင်စုဟာ အမေရိကန်ဒေါ်လာ ၂၅ သန်းကျော် တန်ဖိုးရှိတဲ့ ရုရှားရေနံကုမ္ပဏီ Rosneft ပိုင် ဘိုးအင်းလေယာဉ်ကို သိမ်းယူဖို့ မတ်လ ၈ ရက်က ဝရမ်းတခု ရရှိခဲ့ကြောင်း အမေရိကန် တရားရေးဌာနက ပြောပါတယ်။
နယူးယောက်အရှေ့ပိုင်းခရိုင်အတွက် အမေရိကန်ခရိုင်တရားရုံးကနေ ပို့ကုန်ထိန်းချုပ်မှု ချိုးဖောက်မှုတွေနဲ့ ရုရှားအပေါ် ပိတ်ဆို့အရေးယူမှုတွေအပေါ် အခြေခံပြီး သိမ်းဆည်းမှုကို ခွင့်ပြုခဲ့တာ ဖြစ်ပါတယ်။
အင်ဒိုနီးရှားနိုင်ငံမှာ ကမ္ဘာ့အဆိုးရွားဆုံး ဖြစ်ရပ်တစ်ခုဖြစ်တဲ့ အားကစားရုံတွင်း လူအချင်းချင်း တိုးဝှေ့ပိ သေဆုံးခဲ့မှုနဲ့ ပတ်သက်လို့ ဘောလုံး တာဝန်ရှိပုဂ္ဂိုလ် နှစ်ဦးကို တာဝန်လစ်ဟင်းမှုနဲ့ တရားရုံးက ထောင်ဒဏ် ချမှတ်လိုက်ပါတယ်။
ပြီးခဲ့တဲ့ အောက်တိုဘာလက မာလန်းမြို့ အားကစားရုံတစ်ခုမှာ ဘောလုံးကွင်းထဲ ဝင်လာတဲ့ ဘောလုံးပွဲကြည့်ပရိသတ်တွေကို ရဲက မျက်ရည်ဗုံးတွေနဲ့ ပစ်ခတ် လူစုခွဲခဲ့ရာကနေ လူအချင်းချင်း တိုးဝှေ့ပိမိပြီး လူ ၁၃၅ ဦး သေဆုံးခဲ့ပါတယ်။
ဂရိနိုင်ငံမှာ ပြီးခဲ့တဲ့ တပတ်က လူ ၅၇ဦး သေဆုံးခဲ့တဲ့ ရထားနှစ်စီး တိုက်ခဲ့တဲ့ ဖြစ်ရပ်အပေါ် သယ်ယူ ပို့ဆောင်ရေးနဲ့ ပြည်သူ့ဝန်ထမ်းတွေ ဒေါသထွက်ပြီး သပိတ်မှောက်နေပါတယ်။
ကျောင်းဆရာတွေ၊ ကျန်းမာရေးဝန်ထမ်းတွေ၊ ကားသမားတွေကလည်း ရထားဝန်ထမ်းတွေရဲ့ သပိတ်မှာ ပါဝင်လာပါတယ်။ ဂရိမှာ ရထားနှစ်စင်း တိုက်မိပြီးတဲ့နောက် ရထားဝန်ထမ်းတွေက လုံခြုံရေးစနစ် ပိုမိုကောင်းမွန်ဖို့ ဆန္ဒပြခဲ့ကြပါတယ်။
ပါကစ္စတန်နိုင်ငံ လာဟိုးမြို့မှာ စီတန်းလှည့်လည်ဖို့ ကြိုးစားနေတဲ့ ပါတီ တက်ကြွ လှုပ်ရှား သူတွေကို ရေပိုက်တွေ လက်ကိုင်တုတ်တွေကို အသုံးပြုပြီး ရဲတွေက လူစုခွဲဖို့ ကြိုးစားတယ်လို့ အတိုက်အခံခေါင်းဆောင် အီမရန်ခမ်း ထောက်ခံသူတွေက ပြောပါတယ်။
လူမှုကွန်ရက် မီဒီယာပေါ်မှာ တက်လာတဲ့ ရုပ်ပုံတွေမှာ မြို့ထဲမှာ စုရုံးနေတဲ့ အမျိုးသားနဲ့ အမျိုးသမီးတွေကို တားမြစ်တာကို ချိုးဖောက်တယ်ဆိုပြီး ဖမ်းဆီးခေါ်ဆောင်သွားတာကို တွေ့ရပါတယ်။
အီရန်နိုင်ငံတွင် နိုဝင်ဘာလကုန်က တည်းကကျောင်းသားပေါင်း ၅၀၀၀ ကျော် ထူးဆန်းစွာ အဆိပ်သင့်မှုနှင့် ပတ်သက်၍ ပထမဆုံးဖမ်းဆီးမှုများကိုလုပ်ဆောင်ခဲ့ကြောင်း မတ် ၇ ရက်တွင် ထုတ်ပြန်ကြေညာခဲ့သည်။
အများပြည်သူများ၏ ဒေါသဖြစ်မှုများ မြင့်တက်နေချိန်တွင်အီရန်၏ အမြင့်ဆုံးခေါင်းဆောင် အယာတိုလာ အလီခါမေနီက ခွင့်မလွှတ်နိုင်သော ရာဇဝတ်မှုကျူးလွန်သူများကို သနားညှာတာခြင်းမရှိခြေရာခံ ထောက်လှမ်း နေသည်ဟု မတ် ၆ ရက်တွင် ပြောကြားခဲ့သည်။
ကမ္ဘာကြီးကပိုပြီး ကသောင်းကနင်းဖြစ်လာလို့ တရုတ်ဟာ ရုရှားနဲ့ ဆက်ဆံရေး အရှိန်မြှင့်ရလိမ့်မယ်လို့ တရုတ်နိုင်ငံခြားရေးဝန်ကြီး ချင်ဂန်းက မတ်လ ၇ ရက်မှာ ပြောလိုက်ပါတယ်။
တရုတ်နိုင်ငံရဲ့ မြို့တော်ပေကျင်းမှာ နိုင်ငံခြားရေးဝန်ကြီးအဖြစ် ပထမဆုံး သတင်းစာရှင်းလင်းပွဲမှာ ချင်က ခုလိုပြောလိုက်တာပါ။
တရုတ်-ရုရှား ဆက်ဆံရေးဟာ ထိပ်တိုက်မတွေ့ရေးကို အခြေခံထားပြီး ဘယ်လို တတိယအုပ်စုကိုမှ ပစ်မှတ်ထားမှာ မဟုတ်သလို ဘယ်နိုင်ငံကိုမှ ခြိမ်းခြောက်၊ စွက်ဖက်မှာ မဟုတ်ဘူးလို့လည်း ချင်ဂန်းက ဆက်ပြောပါတယ်။
ပစိဖိတ် သမုဒ္ဒရာကို ကျော်ဖြတ်ပြီး စမ်းသပ်ပစ်လွှတ်နေတဲ့ သူတို့ရဲ့ ဒုံးကျည်တွေကို ပစ်ချခဲ့ရင် စစ်ကြေညာတာ ဖြစ်လိမ့်မယ်လို့ မြောက်ကိုရီးယားက သတိပေးပြောကြားလိုက်ပါတယ်။
ပြီးခဲ့တဲ့ လတွေမှာ ပိတ်ပင်ထားတဲ့ လက်နက်စမ်းသပ်မှုတွေ အမြောက်အမြားလုပ်ဆောင်ခဲ့ပြီး နျူကလီးယား လက်နက်ပိုင်ဆိုင်ထားတဲ့ ပြုံယမ်းဆီက ခြိမ်းခြောက်မှုတွေ ရှိနေချိန် အမေရိကန် နဲ့ တောင်ကိုရီးယားတို့ စစ်ရေးပူးပေါင်းဆောင်ရွက်မှုတွေ တိုးမြှင့်ခဲ့ပါတယ်။
ဂျပန်မှာ လူအများစိတ်ဝင်စားနေကြတဲ့ ဒုံးပျံ ပစ်လွှတ်စမ်းသပ်မှု မအောင်မြင်ခဲ့တဲ့အပေါ် အာကာသအေဂျင်စီ အကြီးအကဲက တောင်းပန်လိုက်ပါတယ်။
ဒီကိစ္စနဲ့ပတ်သက်လို့ သူ့မှာ တာဝန်ရှိကြောင်းနဲ့ သူ့အနေနဲ့ လူထုယုံကြည်မှုရအောင်ပြန်ကြိုးစားသွားမယ်လို့ Hiroshi Yamakawa က သတင်းစာရှင်းပွဲမှာ ပြောပါတယ်။
လုပ်ငန်းစဉ်အပြီး သူ့အလိုလို မီးလောင် ပျက်စီးသွားအောင် စီမံထားတဲ့ ဒုံးပျံတင်ဆောင်ရာ H-3 ရော့ကတ်ဟာ ပစ်လွှတ်ပြီး မိနစ်ပိုင်းအတွင်း ဒုတိယအင်ဂျင် မီးမလောင်ဘဲ ရှိခဲ့တာပါ။
မစ္စတာရှီကျင့်ဖျင်ကို သမ္မတအဖြစ် တတိယအကြိမ် အာဏာအပ်နှင်းမယ့် ပါလီမန်အစည်းအဝေးမှာ နိုင်ငံရပ်ခြားက ခြိမ်းခြောက်မှုတွေ အရှိန်မြင့်တက်လာတယ်လို့ သတိပေးပြောကြားရင်း သူတို့ စစ်ဘက်ရဲ့ အသုံးစရိတ်ကို မြှင့်တင်လိုက်ကြောင်း တရုတ်က ကြေညာခဲ့ပါတယ်။
တရုတ်ရဲ့ စီးပွားရေးရည်မှန်းချက်ကို ၁၀ နှစ်အတွင်းမှာ အနိမ့်ဆုံးနှုန်းတစ်ခုဖြစ်တဲ့ ငါးရာခိုင်နှုန်းသာတိုးတက်ဖို့ မျှော်လင့်ကြောင်း တရုတ်ခေါင်းဆောင်တွေက ပြောကြားချိန်မှာပဲ ကမ္ဘာမှာ ဒုတိယအများဆုံး ကာကွယ်ရေးဆိုင်ရာ ဘတ်ဂျက် တိုးမြှင့်မှုထွက်ပေါ်လာတာဖြစ်ပါတယ်။
