နိုင်ငံကူးလက်မှတ်ပြုလုပ်သည့် ရုံးများအား ၂၀၂၂ ခုနှစ်၊ ဒီဇင်ဘာလမှ စတင်ကာ ယာယီရပ်နားထားခဲ့ရာမှ လာမည့် ဖေဖော်ဝါရီ (၂၄) ရက်တွင် ပြန်လည်၍ လျှောက်ထားနိုင်ပြီဖြစ်ကြောင်း သတင်းများထွက်ပေါ်လျက် ရှိသည်။
မြန်မာနိုင်ငံကူးလက်မှတ် ထုတ်ပေးရေးဌာနမှ ထုတ်ပြန်ဟန်တူသည့် သတင်းထုတ်ပြန်ချက်တစ်စောင် လူမှုကွန်ရက်တွင် ပြန့်နှံ့နေပြီး အဆိုပါ ထုတ်ပြန်ချက်တွင် လာမည့် (၂၄) ရက်၌ နိုင်ငံကူးလက်မှတ်များကို www.passport.gov. mm Website မှ တဆင့် Online Booking စနစ်သစ်ဖြင့် ပြန်လည် လျှောက်ထား နိုင်ပြီ ဖြစ်ကြောင်း သိရသည်။
စက်ရုံ၊ အလုပ်ရုံနှင့် အခြေခံဝန်ထမ်းများအတွက် ဆန်ကိုသက်သာသောစျေးနှုန်းဖြင့် ရောင်းချပေးသွားမည် ဖြစ်ကြောင်း မြန်မာနိုင်ငံဆန်စပါးအသင်းချုပ်ကထုတ်ပြန်ထားသည်။
လတ်တလော ဆန်စျေးမြင့်တက်မှုအခြေအနေကြောင့် အခြေခံအလုပ်သမား၊ ဝန်ထမ်းမိသားစုများ သက်သာစေရန် ရောင်းချပေးခြင်းဖြစ်ပြီး ရောင်းချရာတွင် ဧည့်မထ ၁၀ ရာခိုင်နှုန်းအဆင့် 10 kg(၅ ပြည်ခန့်) တစ်အိတ်ကို ၁၀၀၀၀ ကျပ်ဖြင့်ဝယ်ယူနိုင်ကြောင်း၊ ယင်းအပြင် လှိုင်သာယာ၊ ရွှေပြည်သာ၊ စက်ရုံများသို့ မှာယူသည့် အိတ်ရေအနည်း အများပေါ် မူတည်၍ အရောက်ပို့ခြင်း(သို့မဟုတ်) သတ်မှတ်နေရာတွင် လာရောက်ထုတ်ယူနိုင်ကြောင်း သိရသည်။
မြန်မာအမျိုးသားလေကြောင်းလိုင်းက မန္တလေး-ချင်းမိုင်-မန္တလေး ခရီးစဉ်ကို လာမယ့် မတ်၂ ရက်ကစတင်ပြီး အပတ်စဉ်ကြာသပတေးနေ့တိုင်း တိုက်ရိုက်ပျံသန်း ပြေးဆွဲပေးသွားမှာဖြစ်တယ်လို့ မြန်မာအမျိုးသားလေကြောင်း ကနေ သိရပါတယ်။
နိုင်ဂျီးရီးယားနိုင်ငံသားငါးဦးနှင့် မြန်မာနိုင်ငံသားခြောက်ဦးတို့ကို KBZ ဘဏ်အကောင့်ထဲမှ ငွေကျပ်သိန်းပေါင်း ၁၃၉၀ ခန့် လိမ်လည်ထုတ်ယူမှုဖြင့်ဖမ်းဆီးမိကြောင်း နစက က ထုတ်ပြန်ထားသည်။
ရန်ကုန်တိုင်း၊ သင်္ဃန်းကျွန်းမြို့နယ်တွင်နေထိုင်သည့် အမျိုးသမီးတစ်ဦး၏ KBZ ဘဏ်အကောင့်အတွင်းမှ ငွေကျပ် ၁၀၂၀ သိန်းနှင့် ကမာရွတ်မြို့နယ်တွင်နေထိုင်သူအမျိုးသမီးတစ်ဦး၏ KBZ ဘဏ်အကောင့်အတွင်းမှ ငွေကျပ် ၃၇၀ သိန်းကို အွန်လိုင်းအသုံးပြု၍ လိမ်လည်ခဲ့သည့်အတွက် သင်္ဃန်းကျွန်းမြို့နယ်နှင့် မရမ်းကုန်းမြို့နယ်ရဲစခန်း၌ အမှုဖွင့်တိုင်ကြားခဲ့ခြင်းဖြစ်ကြောင်း အဆိုပါထုတ်ပြန်ချက်အရသိရသည်။
လတ်တလော ပြည်တွင်းဆန်ဈေး ဆက်တိုက် မြင့်တက်လာနေပြီး လက်လီဈေးကွက်တွင် ဆန်တစ်အိတ်ဈေး ယခင်ထက် ကျပ် ၂၀၀၀၀ ဝန်းကျင်အထိ ဈေးမြင့်တက်နေကြောင်း သိရသည်။
ဂျပန်ဘာသာ အရည်အချင်းစစ်စာမေးပွဲအတွက် ရန်ကုန်နှင့် မန္တလေးမြို့ရှိ သင်တန်းကျောင်းများအတွက် သင်တန်းကျောင်းတစ်ကျောင်းလျှင် လျှောက်လွှာအစောင်ရေအများဆုံး ၁၅၀ နှုန်းဖြင့်သာ ရောင်းချသွားမည် ဖြစ်ကြောင်း ဖေဖော်ဝါရီ ၂၀ ရက်က JLPT စာမေးပွဲ ကျင်းပရေးကော်မတီမြန်မာနိုင်ငံ ဂျပန်ပြန်ပညာသင်ဟောင်း အသင်း (MAJA) က သတင်းထုတ်ပြန်သည်။
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီမှ ထုတ်ပြန်သည့် စားအုန်းဆီ အခြေခံလက်ကားရည်ညွှန်းဈေးနှုန်းကျဆင်းလာသော်လည်း ပြင်ပ ဈေးကွက်တွင် ဆက်လက်မြင့်တက်နေဆဲဖြစ်ကြောင်း သိရသည်။
ယခုတစ်ပါတ်အတွက် စားအုန်းဆီ အခြေခံလက်ကားရည်ညွှန်းဈေးနှုန်းမှာ တစ်ပိဿာလျှင် ၄၄၇၀ ကျပ်ဖြစ်ပြီး ယခင်တစ်ပါတ်ထက် ၂၀ ကျပ်ကျဆင်းလာဖြစ်သည်။ အဆိုပါ ရည်ညွှန်းဈေးနှုန်းသည် ဖေဖော်ဝါရီလ ၂၀ ရက်နေ့မှ ဖေဖော်ဝါရီလ ၂၆ ရက်နေ့အထိ ဖြစ်သည်။
နစက ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ဂျပန်ဝန်ကြီးချုပ်ဟောင်းနှင့်ဂျပန်-မြန်မာချစ် ကြည်ရေးအသင်း ဥက္ကဋ္ဌတို့အား ဖေဖော်ဝါရီ ၂၀ ရက်က ဂုဏ်ထူးဆောင်ဘွဲ့နှင့်စွမ်းဆောင်မှုဆိုင်ရာဘွဲ့တံဆိပ်များကို နေပြည်တော်၌ ဂုဏ်ပြုချီးမြှင့်အပ်နှင်းခဲ့သည်။
နစက ဥက္ကဋ္ဌမှ ၂၀၂၃ ခုနှစ် (၇၅)နှစ်မြောက် စိန်ရတုလွတ်လပ်ရေးနေ့အထိမ်းအမှတ်အဖြစ် နိုင်ငံတော်ဖွံ့ဖြိုး တိုးတက်ရေးနှင့်ငြိမ်းချမ်းသာယာဝပြောရေးအတွက် စွမ်းစွမ်းတမံပူးပေါင်းဆောင်ရွက်ခဲ့ကြသည့် ပုဂ္ဂိုလ်များအား ဂုဏ်ထူးဆောင်ဘွဲ့များ၊ဂုဏ်ထူးဆောင်တံဆိပ်များကို ဇန်နဝါရီ ၁ ရက်နှင့် ၂ ရက်တို့က ချီးမြှင့်အပ်နှင်းခဲ့ပြီးဖြစ်သည်။
ကိုဗစ်(၁၉)ရောဂါအခြေအနေကြောင့် ဖြတ်သန်းသွားလာခွင့်ယာယီပိတ်ထားသည်မှာ ၃ နှစ်ခန့်ကြာ မြင့်ခဲ့ပြီး ဖြစ်သည့် ရှမ်းပြည်နယ်၊တာချီလိတ်မြို့ရှိ တာချီလိတ်-မယ်ဆိုင် အမှတ်(၁)ချစ်ကြည်ရေးတံတားအား ဖေဖော်ဝါရီ ၂၀ ရက် (ယနေ့)နံနက်ပိုင်းမှစတင်၍ ပြန်လည်ဖွင့်လှစ်ခဲ့ကြောင်း သိရသည်။
အဆိုပါ တာချီလိတ်-မယ်ဆိုင် အမှတ်(၁)ချစ်ကြည်ရေးတံတားပြန်လည်ဖွင့်လှစ်နိုင်ရန် မယ်ဆိုင်မြို့ တာဝန် ရှိသူများနှင့် တာချီလိတ်မြို့တာဝန်ရှိသူများ အကြိမ်ကြိမ်တွေ့ဆုံညှိနှိုင်းဆွေးနွေးခဲ့ကြပြီးနောက် ယနေ့ ပြန်လည် ဖွင့်လှစ်နိုင်ခဲ့ခြင်းဖြစ်ကြောင်း သိရသည်။
ကျန်းမာရေးလူ့စွမ်းအားအရင်းအမြစ်ဦးစီးဌာန အောက်ရှိ သူနာပြု/သားဖွား/နှီးနွှယ်သင်တန်း ကျောင်းတွေမှာ ၂၀၂၃ ပညာသင်နှစ်အတွက် ဖွင့်လှစ်မယ့် သူနာပြု-သားဖွားဒီပလိုမာ (၃)နှစ်သင်တန်းနဲ့ ဘက်စုံသားဖွား ဒီပလိုမာ (၂)နှစ် သင်တန်း (ဒုတိယအသုတ်)ကို လာမယ့်ဧပြီလ(၁၈ရက်နေ့မှာ ဖွင့်လှစ်သွားမှာဖြစ်တယ်လို့ ကျန်းမာရေး၀န်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာန ကထုတ်ပြန်ပါတယ်။
အဲဒီ သူနာပြု-သားဖွားဒီပလိုမာသင်တန်း ဝင်ခွင့်အတွက်လည်း တက္ကသိုလ်ဝင်တန်း စာမေးပွဲအောင် ရမှတ်တွေက (မြန်မာစာ၊ အင်္ဂလိပ်စာ၊ သင်္ချာ)(၃) ဘာသာ ရမှတ်ပေါင်းပေါ် မူတည်ပြီး ရွေးချယ်မှာ ဖြစ်တယ်လို့ဆိုပါတယ်။
