မန္တလေးမြို့ရှိ မီနီအိုးဝေများ အဝါရောင်ပြောင်းလဲရမည်

မန္တလေးမြို့တော်စည်ပင်နယ်နမိတ်အတွင်း၌ပြေးဆွဲလျက်ရှိသည့် မီနီအိုးဝေများအားလုံးကို ဇွန် ၃၀ ရက် နောက်ဆုံးထား၍ အဝါရောင်တစ်ရောင်တည်းအဖြစ် ပြောင်းလဲရမည်ဟု မန္တလေးတိုင်းဒေသကြီး ယာဉ်လုပ်ငန်းများ ကြီးကြပ်ရေးလုပ်ငန်းကော်မတီ(မြို့တွင်း)မှ အသိပေးနှိုးဆော်ခဲ့သည်။

မန္တလေးမြို့တော်အား မြို့ပြအင်္ဂါရပ်နှင့်အညီ သန့်ရှင်းသာယာလှပစေရန်၊ ယာဉ်စည်းကမ်း၊ လမ်းစည်းကမ်း စနစ်တကျရှိစေရန်၊ ခရီးသည်များ လုံခြုံချောမွေ့စွာသွားလာမှု ပိုမိုအဆင်ပြေစေရန်နှင့်သယ်ယူပို့ဆောင်ရေးကဏ္ဍ စနစ်တကျဖွံ့ဖြိုးတိုးတက်စေရန် ရည်ရွယ်၍ မီနီအိုးဝေများအားလုံးကို အဝါရောင်တစ်ရောင်တည်းအဖြစ် တပြေးညီပြောင်းလဲစေခြင်းဖြစ်ကြောင်း သိရသည်။

ကိုဗစ်ကာကွယ်ဆေးထိုးပြီးကြောင်း လက်မှတ်အတုများဖြင့်နယ်စပ်ဖြတ်သန်းသွား လာမှုများရှိ၍ စီစစ်အရေးယူနေ

ကိုဗစ်(၁၉)ရောဂါအခြေအနေကြောင့် ၃ နှစ်ခန့်ယာယီပိတ်ထားခဲ့သည့် ရှမ်းပြည်နယ်၊တာချီလိတ်မြို့ရှိ တာချီလိတ်-မယ်ဆိုင် ချစ်ကြည်ရေးတံတားအမှတ်(၁)အား ဖေဖော်ဝါရီ ၂၀ ရက်က နှစ်နိုင်ငံကူသန်းသွားလာမှုနှင့် ကုန်စည် ကူးသန်း ရောင်းဝယ်မှုများအဆင်ပြေစေရေးတို့အတွက် ပြန်လည်ဖွင့်လှစ်ပေးခဲ့သည်။

ချစ်ကြည်ရေးတံတားအမှတ်(၁)ပေါ်မှ ဖြတ်သန်းသွားလာမည့်သူများအနေဖြင့် ကိုဗစ်(၁၉)ရောဂါကာကွယ်ဆေး ထိုးပြီးကြောင်း အ​ထောက်ထားပြသပါက ဖြတ်သန်းသွားလာခွင့်လက်မှတ်များကို သက်ဆိုင်ရာက ထုတ်ပေးလျက် ရှိသည်။ ထိုသို့ ဖြတ်သန်းသွားလာခွင့်လက်မှတ်များထုတ် ပေးရာတွင် ကိုဗစ်(၁၉)ရောဂါကာကွယ်ဆေး ထိုးပြီးကြောင်း လက်မှတ်အတုများပြသ၍ ဖြတ်သန်းခွင့်လက်မှတ်လာရောက်ပြုလုပ်သူများရှိနေသဖြင့် တာဝန် ရှိသူများက စီစစ်အရေးယူမှုများပြုလုပ်လျက်ရှိကြောင်း သိရသည်။

မော်တော်ယာဉ်များအားလုံး ဖောင်းကြွနံပါတ်ပြားအသစ်များ မတ် ၃၁ ရက်အပြီး အမြန်ပြောင်းလဲတပ်ဆင်ရန် ထပ်မံထုတ်ပြန်

မော်တော်ယာဉ်များအားလုံး ဖောင်းကြွနံပါတ်ပြားအသစ်များ မတ် ၃၁ ရက်အပြီး အမြန်ပြောင်းလဲတပ်ဆင်ရန် ကုန်းလမ်းပို့ဆောင်ရေးညွှန်ကြားမှုဦးစီးဌာန၏ ထပ်မံထုတ်ပြန်မှုအရ သိရသည်။

ဖောင်းကြွနံပါတ်ပြားပုံစံအသစ် ပြောင်းလဲတပ်ဆင်ခြင်း မြန်ဆန်စွာ ရာနှုန်းပြည့်ပြီးစီးရေးအတွက် နိုင်ငံပိုင် ဌာနဆိုင်ရာ ယာဉ်များ၊ အဝေးပြေးခရီးသည်တင်ယာဉ်များ၊ မြို့တွင်း ခရီးသည်တင်ယာဉ်လိုင်းများ၊ တက္ကစီယာဉ်များ၊ ကုန်တင်ယာဉ်များအားလုံးသည် ယာဉ်များတွင် မတ် ၃၁ ရက်အပြီး မပျက်မကွက် ပြောင်းလဲတပ်ဆင်ကြပါရန် ထပ်မံအသိပေးနှိုးဆော်ကြောင်း သိရသည်။

မြန်မာအလုပ်သမား ၁၀၀၀ ကျော် တောင်ကိုရီးယားသို့ ထပ်မံရောက်ရှိ

EPS စနစ်ဖြင့် တောင်ကိုရီးယားနိုင်ငံတွင် အလုပ်လုပ်ကိုင်ရန် မြန်မာအလုပ်သမား ၁၀၄၀ ဦး မတ် ၅ ရက်တွင် ထပ်မံရောက်ရှိခဲ့ကြောင်း ကိုရီးယားနိုင်ငံဆိုင်ရာ မြန်မာသံရုံး ဆိုးလ်မြို့က သတင်းထုတ်ပြန်ထားသည်။

ပြည်ပအလုပ်အကိုင်အကျိုးဆောင်အေဂျင်စီများက အလုပ်သမား ၁၀၄၀ အား တောင်ကိုရီယားနိုင်ငံ၌ အလုပ်လုပ်ကိုင်ရန် EPS စနစ်ဖြင့် စေလွှတ်ခဲ့ခြင်းဖြစ်ကြောင်း သိရသည်။

BYD အမျိုးအစား လျှပ်စစ်သုံးမော်တော်ယာဉ်များ ထပ်မံရောက်ရှိလာ

Earth Renewable Energy Co., Ltd. မှ တင်သွင်းလာသော BYD အမျိုးအစားလျှပ်စစ် သုံးယာဉ် ၁၉ စီး ထီးတန်းဆိပ်ကမ်းသို့ ထပ်မံရောက်ရှိလာကြောင်း သိရသည်။

တရားမဝင်ချေးငွေလုပ်ငန်းများ လုပ်ကိုင်လျှင်အရေးယူမည်

အွန်လိုင်းအသုံးပြုပြီး လောင်းကစားပြုလုပ်တာ၊ ကံစမ်းမဲဖောက်တာနဲ့ တရားမဝင်ချေးငွေလုပ်ငန်းတွေမှာ ပါဝင် လုပ်ကိုင်တာပြုလုပ်ရင် တည်ဆဲဥပဒေအရ အရေးယူခံရမယ်လို့ မြန်မာနိုင်ငံရဲတပ်ဖွဲ့က မတ် ၂ ရက် ရက်စွဲနဲ့ အသိပေးထုတ်ပြန်ပါတယ်။

နည်းပညာတွေ ဖွံ့ဖြိုးတိုးတက်လာတာနဲ့အမျှ အွန်လိုင်းကတစ်ဆင့် လိမ်လည်မှုကျူးလွန်တာ၊ လောင်းကစားတာ ကိုဗန်းပြပြီး ငွေကြေးလိမ်လည်မှု ကျူးလွန်တာတွေကြောင့် ပြည်သူတွေအနေနဲ့ ငွေကြေးနစ်နာ ဆုံးရှုံးမှုတွေ ဖြစ်ပေါ်နေတယ်လို့ ဆိုပါတယ်။

ထိုင်းနိုင်ငံ၌ထိန်းသိမ်းခံထားရသည့် လွတ်ရက်စေ့မြန်မာနိုင်ငံသား ၁၃၈ ဦးအား မြန်မာသို့လွှဲပြောင်း

ထိုင်းနိုင်ငံ၊ ဘန်ကောက်မြို့ရှိ လူဝင်မှုကြီးကြပ်ရေးနှင့်ထိန်းသိမ်းရေးစင်တာ၌ ထိန်းသိမ်းခံထားရသည့် လွတ်ရက်စေ့ မြန်မာနိုင်ငံသား ၁၃၈ ဦးအား မတ် ၂ ရက် နံနက် ၈ နာရီခွဲတွင် မြန်မာနိုင်ငံသို့ ပြန်လည်လွှဲပြောင်းပေးခဲ့ကြောင်း ထိုင်းနိုင်ငံဆိုင်ရာ မြန်မာသံရုံး၏သတင်းထုတ်ပြန်ချက်အရသိရသည်။

မြန်မာ- တရုတ် နှစ်နိုင်ငံကုန်သွယ်မှုမှ နှစ်လအတွင်း ယွမ်သန်း ၁၅၀ကျော်ရရှိ

၂၀၂၃ ခုနှစ်၏ မြန်မာ- တရုတ်နှစ်နိုင်ငံကုန်သွယ်မှုမှ နှစ်လအတွင်း ယွမ်သန်း ၁၅၀ ကျော်ရှိကြောင်း မြန်မာနိုင်ငံရှိ တရုတ်သံရုံးက ထုတပြန်ထားသည်။

တရုတ်-မြန်မာနယ်စပ်ဂိတ်တစ်ခုဖြစ်သည့် နုံတောင်လမ်းကြောင်း၏ နယ်စပ်ဖြတ်ကျော်ကုန်သွယ်မှုပမာဏသည် ယွမ် သန်း ၁၅၀ ရှိကြောင်း၊ ပြီးခဲ့သည့် ဖေဖော်ဝါရီလတွင် တရုတ်-မြန်မာနယ်စပ် နုံတောင်လမ်းကြောင်း၏ ပိုကုန်သွင်းကုန်ပမာဏ တန်ချိန် ၈၀၀၀၀ ရှိကြောင်းထုတ်ပြန်ချက်တွင် ဖော်ပြထားသည်။

မြန်မာ့ကျောက်မျက်ရတနာပြပွဲ ကျင်းပမည်

မြန်မာ့ကျောက်မျက်ရတနာပြပွဲကို လာမယ့် မတ် ၁၇ ရက်ကနေ ၂၃ ရက်အထိ နေပြည်တော် မဏိရတနာ ကျောက်စိမ်းခန်းမမှာ ကျင်းပသွားမယ်လို့ သယံဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာနကနေ သိရပါတယ်။ အဲဒီ ကျောက်မျက်ရတနာပြပွဲမှာတော့ မြန်မာနိုင်ငံက ထွက်ရှိတဲ့ ပုလဲ၊ ကျောက်မျက်နဲ့ ကျောက်စိမ်း အတွဲတွေကို တင်ပြရောင်းချသွားမယ်လို့ သိရပါတယ်။

၂၀၂၃ ခုနှစ် တက္ကသိုလ်ဝင်စာမေးပွဲဖြေဆိုရန် လျှောက်လွှာတင်ထားသူ ၁၈၀၀၀၀ ခန့်ရှိ

လာမည့် မတ် ၈ ရက်မှစတင်ကျင်းပမည့် ၂၀၂၃ ခုနှစ် တက္ကသိုလ်ဝင်စာမေးပွဲအား ဝင်ရောက်ဖြေဆိုရန် လျှောက်လွှာတင်ထားသူ ၁၇၉၇၄၂ ဦး ရှိကြောင်း မြန်မာနိုင်ငံစာစစ်ဦးစီးဌာနက ထုတ်ပြန်ခဲ့သည်။

အဆိုပါ ၁၇၉၇၄၂ ဦးသည် မြန်မာတစ်နိုင်ငံလုံးအတိုင်းအတာဖြင့် တက္ကသိုလ်ဝင်စာမေးပွဲဝင်ရောက်‌ဖြေဆိုရန် လျှောက်လွှာတင်ထားသူများဖြစ်ကြောင်း သိရသည်။