မြန်မာကျွမ်းကျင်ဂဟေလုပ်သား ၃၆ ဦး ကိုရီးယားနိုင်ငံသို့ ရောက်ရှိလာ

ကိုရီးယားနိုင်ငံရှိ Hyundai MIPO Dockyard တွင် လုပ်ကိုင်မည့် မြန်မာကျွမ်းကျင်ဂဟေလုပ်သား (၃၆) ဦးသည် မတ် ၂၁ ရက်တွင် ထပ်မံရောက်ရှိလာခဲ့ကြောင်း ကိုရီးယားနိုင်ငံဆိုင်ရာ မြန်မာသံရုံး၊ဆိုးလ်မြို့မှ သိရသည်။

မြန်မာကျွမ်းကျင်ဂဟေလုပ်သားများအား မြန်မာသံရုံး၊ ဆိုးလ်မြို့မှအလုပ်သမားသံအရာရှိက ကြိုဆို၍ လိုအပ်သည် များကို ကူညီပံ့ပိုးပေးခဲ့သည်။

သုံးစွဲရန်မသင့်သည့် အလှကုန်ပစ္စည်း ၃၀ ကျော် FDA Myanmar ထုတ်ပြန်

ပြည်တွင်း၌သုံးစွဲရန်မသင့်သည့်အလှကုန်ပစ္စည်း ၃၀ ကျော်ကို မြန်မာနိုင်ငံအစားအသောက်နှင့်ဆေးဝါးကွပ်ကဲရေး ဦးစီးဌာန FDA Myanmar က မတ် ၂၁ ရက်တွင် ထုတ်ပြန်သည်။ အဆိုပါတားမြစ်ခံရသည့်အလှကုန်ပစ္စည်းများမှာ မလေးရှား၊ အင်ဒိုနီးရှား၊ ထိုင်း၊ စင်ကာပူ၊ ဘရူနိုင်းနိုင်ငံမှ အလှကုန်ပစ္စည်းများဖြစ်ပြီး အရေးပြားပေါ်တွင် လိမ်းသည့်ခရင်မ်များ၊ ဆိုးဆေးများပါဝင်ကြောင်း အဆိုပါထုတ်ပြန်ချက်အရ သိရသည်။

ကားတစ်စီး လက်လုပ်ကားမိုင်းနင်းမိပေါက်ကွဲ၍ ပြည်သူ ၃ ဦးသေဆုံး ၂ ဦးဒဏ်ရာရ

ပဲခူးတိုင်း၊ကျောက်ကြီးမြို့နယ်၊နတ်သံကွင်း- ကျောက်ကြီးသွားကားလမ်း၏ ညောင်ကွင်းတံတားရှောင်လမ်းပေါ်၌ မတ် ၂၀ ရက်နံနက်ကဖြစ်ပွားခဲ့ခြင်းဖြစ်ကြောင်း နစက သတင်းထုတ်ပြန်ရေးအဖွဲ့မှ သိရသည်။

ယမန်နေ့နံနက် ၈ နာရီခွဲခန့်က ကျောက်ကြီးမြို့မှနတ်သံကွင်းဘက်သို့ ကျောက်ကြီးမြို့နေ ဦးကြင်ကောက် မောင်းကာ အမျိုးသား ၂ ဦးနှင့်အမျိုးသမီး ၂ ဦးလိုက်လာသည့် Light Truck ကားသည် ညောင်ကုန်းတံတား ရှောင်ကွင်းလမ်းအရောက်၌ KNLA အဖွဲ့ဝင်များထောင်ထားသည့် လက်လုပ်ကားမိုင်းအားနင်းမိခဲ့သည်။

ကြူကုတ်-ဝမ်တိန်တံတား မြန်မာ-တရုတ် နှစ်နိုင်ငံနယ်စပ်ဂိတ်ပေါက် ပြန်လည်ဖွင့်လှစ်

ရှမ်းပြည်နယ် (မြောက်ပိုင်း) မူဆယ်ခရိုင် ပန်ဆိုင်း(ကြူကုတ်)မြို့မှ တရုတ်ပြည်သူ့သမ္မတနိုင်ငံသို့ ဆက်သွယ်ထားသည့် မြန်မာ-တရုတ်ကြူကုတ်-ဝမ်တိန် ချစ်ကြည်ရေးတံတား မတ် ၂၀ ရက် နံနက်ပိုင်းက ပြန်လည်ဖွင့်လှစ်ခဲ့ကြောင်း သိရသည်။

အဆိုပါ ချစ်ကြည်ရေးတံတားကို ကိုဗစ်(၁၉) ရောဂါကြောင့် သုံးနှစ်ကျော်ခန့် ပိတ်ထားရာမှ ပြန်လည် ဖွင့်လှစ်ခဲ့ခြင်းဖြစ်ပြီး ပြန်လည်ဖွင့်လှစ်လိုက်သည့်အတွက် မြန်မာတရုတ် နှစ်နိုင်ငံရှိ ဒေသခံပြည်သူများ၊ အပြန်အလှန် ဝင်ထွက်သွားလာနိုင်ပြီး ရင်းနှီးချစ်ကြည်မှုနှင့် အလုပ်အကိုင် အခွင့်အလမ်းများ ပိုမိုရရှိလာကာ လူမှုစီးပွားဘ၀များလည်း ပိုမိုဖွံ့ဖြိုး တိုးတက်လာမည်ဖြစ်ကြောင်း သိရသည်။

ရန်ကုန်လေဆိပ်၊ နေပြည်တော်လေဆိပ်နှင့် အဓိကလမ်းကွန်ရက်နေရာများတွင် EV လျှပ်စစ်အားသွင်းဆိုင်များ ထပ်မံဆောက်မည်

စမ်းသပ်ပ​ရောဂျက် ၁၉ နေရာအပြင် ရန်ကုန်အပြည်ပြည်ဆိုင်ရာလေဆိပ်၊ နေပြည်တော်လေဆိပ်၊ နေပြည်တော်ဘူတာကြီး၊ မန္တလေးဘူတာကြီးတို့တွင် EV အားသွင်းဆိုင် များတည်ဆောက်သွားရန်အတွက် စီစဉ်ထားပြီးဖြစ်ကြောင်း ဆောက်လုပ်ရေးဝန်ကြီးဌာနဒုတိယဝန်ကြီး ဦးဝင်းဖေကပြောကြားခဲ့သည်။

OWIC ကဒ်ကို ရန်ကုန်တွင် ယနေ့မှစ၍နေ့ချင်းပြီးဆောင်ရွက်ပေးမည်

ပြည်ပသို့ မိမိအစီအစဉ်ဖြင့် သွားရောက်လုပ်ကိုင်မည့် ကျွမ်းကျင်လုပ်သားများနှင့် ခွင့်ပြန်အလုပ်သမားများအတွက် ပြည်ပအလုပ်အကိုင်လက်မှတ်(OWIC) ကို နေပြည်တော်ရုံးချုပ်သို့ လျှောက်ထားရန် မလိုအပ်တော့ဘဲ ရန်ကုန်တွင် နေ့ချင်းပြီးဆောင်ရွက်ပေးမည်ဖြစ်ကြောင်း အလုပ်သမားညွန်ကြားရေးဦးစီးဌာနက ထုတ်ပြန်ထားသည်။

ယင်းသို့ လုပ်ဆောင်ရခြင်းမှာ ပွဲစားများဖြင့် ဆောင်ရွက်မှုများကို ကာကွယ်တားဆီးနိုင်ရေးနှင့် အလုပ်သမားများ အချိန်ကုန်/ငွေကုန်မှုများ သက်သာလျော့နည်းစေရေးအတွက် ဆောင်ရွက်ခြင်းဖြစ်ကြောင်း ဖော်ပြထားသည်။

ကုမ္ပဏီ ၂၀ ခုအား ခွင့်ပြုထုတ်ပေးထားသည့် Money Changer လိုင်စင်များအား ပြန်လည်ရုတ်သိမ်း

ဗဟိုဘဏ်မှ ထုတ်ပြန်ထားသည့် အမိန့်နှင့်ညွှန် ကြားချက်များအား လိုက်နာခြင်းမရှိသည့် ကုမ္ပဏီ ၂၀ ခု၏ နိုင်ငံခြားငွေများ ဝယ်ယူရောင်းချလဲလှယ်ပေးခွင့်လိုင်စင် (Money Changer License) များ အား ပြန်လည် ရုတ်သိမ်းခဲ့သည်။

မတ် ၁၄ ရက်ကပြုလုပ်ခဲ့သည့် ဒါရိုက်တာအဖွဲ့ အစည်းအဝေးအမှတ်(၁/၂၀၂၃)ဆုံးဖြတ်ချက်အရ ဗဟိုဘဏ်မှ ခွင့်ပြုထုတ်ပေးထားသည့် Money Changer လိုင်စင်များအား ပြန်လည်ရုတ်သိမ်းခဲ့ခြင်းဖြစ်ကြောင်း သိရသည်။

ထိုင်းနိုင်ငံ၌ မြန်မာနိုင်ငံသားဟုယူဆရသည့် အလောင်းသုံးလောင်းတွေ့ရှိ

ထိုင်းနိုင်ငံ(တောင်ပိုင်း)၊ စွန်ခရာခရိုင်၊ တောအုပ်ထဲရှိအမှိုက်ပုံ၌ မြန်မာနိုင်ငံသားဟုယူဆရသည့် အလောင်း သုံးလောင်းကို ယမန်နေ့ (မတ် ၁၅ ရက်) နံနက် ၇ နာရီတွင်တွေ့ရှိခဲ့ကြောင်း ထိုင်းသတင်းမီဒီယာများ၏ ဖော်ပြချက်အရသိရသည်။

အဆိုပါအလောင်းများကို ယတ်ယိုင်ဒေသနှင့် ဘန့်ကလန်းဒေသကြား လမ်းမကြီးနှင့် မီတာ ၂၀၀ ခန့်အကွာရှိ စွန့်ပစ်အမှိုက်ပုံ၌ အမှိုက်ကောက်သူတစ်ဦးက တွေ့ရှိခဲ့ခြင်းဖြစ်ပြီး မြန်မာနိုင်ငံမှရွေ့ပြောင်း အလုပ်သမားများ ဖြစ်ကြောင်း၊ အသက် (၄၀) ဝန်းကျင်အရွယ်နှစ်ဦးနှင့် အသက် (၁၈)နှစ် အရွယ်တစ်ဦးတို့ဖြစ်ကြောင်း ထိုင်းသတင်း မီဒီယာများတွင် ဖော်ပြထားသည်။

လူတိုင်းအခမဲ့စီးနိုင်ရန် EV တက္ကစီ တစ်လတိတိ အခမဲ့ပြေးဆွဲပေးမည်

လူတိုင်းအခမဲ့စီးနိုင်သည့်အပြင် မောင်းနှင်ခွင့်ပါ ပေးထားသည့် EV တက္ကစီကို တစ်လတိတိ အခမဲ့ပြေးဆွဲပေးမည် ဖြစ်ကြောင်း EV Myanmar ကုမ္ပဏီ၏ အုပ်စုခွဲဖြစ်သည့် Myan Tickets မှအသိပေးထုတ်ပြန်ထားသည်။

အခမဲ့စီးနင်းနိုင်ခွင့်ကာလအား ၂၀၂၃ ခုနှစ်၊ မတ်လ (၁၄) ရက်နေ့မှ ဧပြီလ(၁၃) ရက်နေ့ အထိသတ်မှတ်ထားပြီး အခမဲ့စီးနင်းခြင်း ခွင့်ပြုချက်ရယူနိုင်ရန်အတွက် သတ်မှတ်ထားသော စည်းမျဉ်း၊ စည်းကမ်းချက်များအား လိုက်နာရန် လိုအပ်မည်ဖြစ်ကြောင်း အသိပေးထားသည်။

မတ်လ ၁၉ ရက်မှ မတ်လ၂၄ ရက်အတွင်းအချိန်အခါမဟုတ် မိုးရွာမည်

အနောက်ဘက်မှရွေ့လျားလာသော လေပွေလှိုင်းများ၏အရှိန်ကြောင့်လည်းကောင်း၊ အပူပျံတက်တိမ်များ ဖြစ်ထွန်းမှု အားကောင်းခြင်းကြောင့်လည်းကောင်း မတ်လ ၁၉ ရက်မှ မတ်လ၂၄ ရက်အတွင်း အချိန်အခါမဟုတ် မိုးရွာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက အသိပေးထုတ်ပြန်ထားသည်။

နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်းဒေသကြီးနှင့် ကချင်၊ ရှမ်း၊ ချင်း၊ ရခိုင်ပြည်နယ်တို့တွင် နေရာကွက်ကျားမှနေရာကျဲကျဲ မိုးရွာနိုင်ကြောင်း ဖော်ပြထားသည်။